Kishtwar Cloudburst: જમ્મુના કિશ્તવાડમાં વાદળ ફાટવાના કારણે આવેલા પૂરમાં 30 લોકોના મોત થયા છે. આ કુદરતી આફતમાં 100 લોકો ઘાયલ થયા હોવાનું કહેવાય છે અને તેમને હોસ્પિટલમાં દાખલ કરવામાં આવ્યા છે.
વ્હાઇટ નાઈટ કોર્પ્સના સૈનિકો બચાવ કાર્યમાં રોકાયેલાકિશ્તવાડના ચશોતી ગામમાં વાદળ ફાટ્યા બાદ, સેનાના વ્હાઇટ નાઈટ કોર્પ્સના સૈનિકો બચાવ અને રાહત કાર્ય માટે ઝડપથી એકત્ર થયા છે. આ સૈનિકોની પ્રાથમિકતા જીવ બચાવવા અને ફસાયેલા લોકોને મદદ કરવાની છે. ગુમ થયેલા લોકોની શોધ કરવામાં આવી રહી છે. આ સૈનિકો રાહત સામગ્રી, તબીબી ટીમ અને બચાવ સાધનો સાથે ઘટનાસ્થળે પહોંચી ગયા છે.
આ અંગે કેન્દ્રીય મંત્રી જીતેન્દ્ર સિંહે જણાવ્યું હતું કે જમ્મુ અને કાશ્મીરના વિપક્ષના નેતા અને સ્થાનિક ધારાસભ્ય સુનીલ કુમાર શર્મા તરફથી વાદળ ફાટવાનો સંદેશ મળ્યા બાદ તેમણે કિશ્તવાડના ડેપ્યુટી કમિશનર પંકજ કુમાર શર્મા સાથે વાત કરી હતી. તેમણે કહ્યું હતું કે ચશોતી વિસ્તારમાં ભારે વાદળ ફાટવાના કારણે ભારે જાનહાનિ થઈ શકે છે. વહીવટીતંત્ર તાત્કાલિક કાર્યવાહીમાં લાગી ગયું છે અને બચાવ ટીમ ઘટનાસ્થળે રવાના થઈ ગઈ છે. જીતેન્દ્ર સિંહે કહ્યું કે મારી ઓફિસ નિયમિતપણે અપડેટ્સ મેળવી રહી છે અને શક્ય તમામ સહાય પૂરી પાડવામાં આવશે.
વાદળ ફાટવાની ઘટનાથી હું દુઃખી છું-લેફ્ટનન્ટ ગવર્નર
આ ઉપરાંત, જમ્મુ અને કાશ્મીરના લેફ્ટનન્ટ ગવર્નર કાર્યાલયે કહ્યું, "કિશ્તવાડમાં વાદળ ફાટવાની ઘટનાથી હું દુઃખી છું. શોકગ્રસ્ત પરિવારો પ્રત્યે સંવેદના અને ઘાયલોના ઝડપી સ્વસ્થ થવા માટે પ્રાર્થના. સિવિલ, પોલીસ, સેના, NDRF અને SDRF અધિકારીઓને બચાવ અને રાહત કામગીરીને વધુ ઝડપી બનાવવા અને અસરગ્રસ્તોને શક્ય તમામ સહાય પૂરી પાડવા સૂચના આપી." હવામાન વિભાગે ચેતવણી જારી કરી છે. બીજી તરફ, શ્રીનગર હવામાન કેન્દ્રે જણાવ્યું છે કે આગામી 4-6 કલાક દરમિયાન જમ્મુ અને કાશ્મીરમાં ઘણી જગ્યાએ મધ્યમથી ભારે વરસાદ અને ગાજવીજ/વીજળી/તીવ્ર પવન સાથે હળવો વરસાદ પડી શકે છે.
કુપવાડા, બારામુલ્લા, બાંદીપોરા, શ્રીનગર, ગાંદરબલ, બડગામ, પૂંચ, રાજૌરી, રિયાસી, ઉધમપુર, ડોડા, કિશ્તવાડના પહાડી વિસ્તારો, કાઝીગુંડ-બનિહાલ-રામબન ધરીમાં થોડા સમય માટે ભારે વરસાદ પડી શકે છે. આ ઉપરાંત, કેટલાક સંવેદનશીલ સ્થળો અને પહાડી વિસ્તારોમાં વાદળ ફાટવાની, અચાનક પૂર/ભુસ્ખલન/ભેખડ ધસી પડવાની અને પથ્થર પડવાની શક્યતા છે. લોકોને છૂટા બાંધકામો/વીજળીના થાંભલા, વાયર અને જૂના વૃક્ષોથી દૂર રહેવાની સલાહ આપવામાં આવી છે. હવામાન વિભાગે વુલર તળાવ, દાલ તળાવ અને અન્ય જળાશયોમાં બોટિંગ/શિકારા સવારી અને અન્ય પ્રવૃત્તિઓ મુલતવી રાખવા પણ જણાવ્યું છે.