નવી દિલ્હીઃ દેશમાં એક બાજુ સતત કોરોનાનો ખતરો વધી રહ્યો છે ત્યારે બીજી બાજુ કોરોના સામેની લડાઈ ચાલી રહી છે ત્યારે સારા સમાચાર સામે આવ્યા છે. જાણકારી અનુસાર આવનારા થોડા સમયમાં દેશમાં વધુ 5 કોરોનાની રસી આવી શકે છે, જેમાંથી એક રસીને તો આગામી 10 દિવસમાં મંજૂરી મળી શકે છે.
ઓક્ટોબર સુધી આશા છે કે દેશમાં સ્પુતનિક વી (sputnik v), જોનસન એન્ડ જોનસન રસી (johnson and johnson vaccine), નોવાવેક્સ રસી (novavax vaccine), ઝાયડસ કેડિલા રસી (zydus cadila vaccine) અને ભારત બાયોટેકની ઇન્ટ્રાનસલ વેક્સીન (intranasal vaccine) આવશે. તેમાં સ્પુતનિક વી રસીને તો આગામી 10 દિવસમાં ઇમરજન્સી ઉપયોગની મંજૂરી મળી શકે છે.
સ્પુતનિક વી રસી માટે હૈદ્રાબાદની ડોક્ટર રેડ્ડીઝ લેબ, હેટરો બાયોફાર્મા, ગ્લેન્ડ ફાર્મા, સ્ટેલિસ બાયોફાર્મા અને વિક્રે બાયોટેક જેવી કંપનીઓ સાથે રશિયાની સરકારી રશિયન ડાયરેક્ટર ઇન્વેસ્ટમેન્ટ ફંડે કરાર કર્યા છે. કહેવાય છે કે, સ્પુતનિક વી રસીના દેશમાં 85 કરોડ ડોઝ બનાવવામાં આવશે.
ક્યારે કઈ રસી આવી શકે છે ?
સરકારી સૂત્રો અનુસાર સ્પુતનિક વી રસી દેશમાં જૂન સુધીમાં ઉપલબ્ધ થઈ શકે છે. જ્યારે ઓગસ્ટમાં જોનસન એન્ડ જોનસ અને ઝાયડસ કેડિલા રસી આવી શકે છે. સપ્ટેમ્બર સુધીમાં નોવાવેક્સ અને ઓક્ટોબરમાં ઇન્ટ્રાનેસલ રસી પણ ભારતમાં ઉપલબ્ધ થઈ શકે છે. દેશમાં હાલમાં કોવિશીલ્ડ અને કોવેક્સિન રસી આપવામાં આવી રહી છે. હાલમાં ક્લિનિકલ અને પ્રી ક્લિનિકલ તબક્કામાં કોરોનાની અંદાજે 20 રસી છે.
ગુજરાતમાં કેટલા લોકોને રસી અપાઈ
વેક્સિનેસન (vaccinations) કાર્યક્રમ અંતર્ગત અત્યાર સુધીમાં કુલ 80,55,986 લોકોને વેક્સિનનો પ્રથમ ડોઝ આપવામાં આવ્યો છે અને 10,67,733 લોકોને કોરોનાની રસીનો બીજો ડોઝ આપવામાં આવ્યો છે. આમ કુલ- 91,23,719 લોકોને રસીકરણના ડોઝ આપવામાં આવ્યા છે. અત્યાર સુધીમાં રાજ્યમાં એક પણ વ્યક્તિને આ રસીના કારણે ગંભીર આડઅસર જોવા મળેલ નથી.