Anna Hazare letter to PM Modi: NEET પેપર લીક મામલે દેશભરમાં ભારે રોષ જોવા મળી રહ્યો છે. ત્યારે 20 જુલાઈના રોજ દિલ્હીમાં વિરોધ પ્રદર્શન કરી રહેલા વિદ્યાર્થીઓ પર થયેલા લાઠીચાર્જથી વરિષ્ઠ સામાજિક કાર્યકર અન્ના હજારે ખૂબ જ દુઃખી છે. આ મામલે તેમણે સીધા દેશના વડાપ્રધાન નરેન્દ્ર મોદીને પત્ર લખીને લોકશાહીમાં સરકારની દમનકારી નીતિ સામે ગંભીર ચિંતા વ્યક્ત કરી છે. એટલું જ નહીં, વિદ્યાર્થીઓના સમર્થનમાં અન્ના હજારે આવતીકાલે અહલ્યાનગરમાં 2 કલાકનો મૌન વિરોધ પણ કરવા જઈ રહ્યા છે. તેમનું સ્પષ્ટ માનવું છે કે સરકારે દંડો ઉગામવાને બદલે સંવાદથી સમસ્યાનો ઉકેલ લાવવો જોઈએ.
આવતીકાલે અહલ્યાનગરમાં "શહેરનું જંતર મંતર" બનશે વિરોધનું કેન્દ્ર
વિદ્યાર્થીઓ અને વિપક્ષ હાલમાં કેન્દ્રીય શિક્ષણ મંત્રીના રાજીનામાની ઉગ્ર માંગ પર અડગ છે. આ જ સિલસિલામાં 20 જુલાઈના રોજ દિલ્હીમાં કોકરોચ જનતા પાર્ટી (CJP) દ્વારા "સંસદ ચલો" કૂચનું આયોજન કરવામાં આવ્યું હતું. આ શાંતિપૂર્ણ કૂચ દરમિયાન પોલીસ દ્વારા થયેલા લાઠીચાર્જનો વિરોધ નોંધાવવા માટે અન્ના હજારે આવતીકાલે સવારે 11 વાગ્યાથી બપોરે 1 વાગ્યા સુધી અહલ્યાનગરના વાડિયા પાર્ક ખાતે આવેલા ગાંધી સ્મારક પર મૌન ધરણા કરશે. ખાસ વાત એ છે કે, લોકોનું ધ્યાન ખેંચવા માટે અન્નાના આ વિરોધ સ્થળને પ્રતીકાત્મક રીતે "શહેરનું જંતર મંતર" એવું નામ આપવામાં આવશે.
"લોકશાહીમાં દમન નહીં, વાટાઘાટોથી આવે ઉકેલ"
સરકારના વલણ પર સવાલ ઉઠાવતા અન્ના હજારેએ સ્પષ્ટ કહ્યું છે કે, "દેશમાં પેપર લીક, વધતી બેરોજગારી અને નોકરીની ભરતી પ્રક્રિયામાં થતો વિલંબ અત્યંત ચિંતાજનક વિષય છે. સરકારે વિદ્યાર્થીઓના આ આંદોલનને માત્ર કાયદો અને વ્યવસ્થાના ચશ્માથી જોવાને બદલે તેમની લોકભાવના સમજવી જોઈએ." તેમણે ઉમેર્યું કે, લોકશાહીમાં કોઈપણ સમસ્યાનો ઉકેલ દમન કે લાઠીચાર્જથી નહીં, પણ સીધી વાતચીતથી જ આવવો જોઈએ. અન્નાએ સરકારને મહાત્મા ગાંધીના સત્યાગ્રહના માર્ગ પર ચાલીને લોકશાહી મૂલ્યોનું રક્ષણ કરવા અપીલ કરી છે.
PM મોદીને પત્ર લખીને કરી આ ખાસ વિનંતી
વડાપ્રધાન નરેન્દ્ર મોદીને લખેલા પત્રમાં અન્નાએ દિલ્હીમાં વિદ્યાર્થી આંદોલન દરમિયાન થયેલી હિંસા પર ઊંડી વ્યથા વ્યક્ત કરી છે. પત્રમાં તેમણે લખ્યું છે કે, લોકશાહીમાં દરેક નાગરિકને પોતાની અસંમતિ કે વિરોધ દર્શાવવાનો પૂરો અધિકાર છે. આવા સંવેદનશીલ કિસ્સાઓમાં સરકારે બળપ્રયોગ કરવાને બદલે સંવેદનશીલતા દાખવીને વાટાઘાટો કરવી જોઈએ.
અંતમાં તેમણે વડાપ્રધાનને વિનંતી કરી છે કે તેઓ સરકાર તરફથી એક સકારાત્મક સંદેશ અને પહેલ મોકલે, જેથી આંદોલનકારી યુવાનોમાં સરકાર પ્રત્યે ફરીથી વિશ્વાસ ઊભો થાય. અન્નાએ આશા વ્યક્ત કરી છે કે સરકાર અને વિદ્યાર્થીઓ વચ્ચેની અર્થપૂર્ણ વાતચીત જ આ મડાગાંઠનો અંત લાવી શકશે અને લોકશાહી મૂલ્યો અનુસાર શાંતિપૂર્ણ ઉકેલ નીકળશે.