Israel Iran War: ખામેનીના મોતથી શોકમાં ડૂબ્યું ભારતનું આ ગામ, જાણો ઈરાનના સુપ્રીમ લીડરનું ઉત્તર પ્રદેશ કનેક્શન
Israel Iran War: બારાબંકીનું કિંતુર ગામ ઇઝરાયલી હુમલામાં આયાતુલ્લાહ અલી ખામેનીના મૃત્યુના સમાચારથી શોકમાં છે. ખામેનીના દાદા, સૈયદ અહમદ મુસાવી હિન્દી, 18મી અને 19મી સદી દરમિયાન આ ગામમાં રહેતા હતા.
Israel Iran War: મધ્ય પૂર્વમાં વધતા તણાવ વચ્ચે ઈઝરાયેલી હુમલામાં ઈરાનના સુપ્રીમ લીડર આયાતુલ્લા અલી ખામેનેઈના મોતના સમાચારથી આખી દુનિયા હચમચી ગઈ છે. ઈરાન અને ઈઝરાયેલ વચ્ચે ચાલી રહેલો ભીષણ સંઘર્ષ હવે મોટા યુદ્ધનું સ્વરૂપ લેતો દેખાઈ રહ્યો છે. આ ઘટના બાદ જ્યાં આંતરરાષ્ટ્રીય રાજકારણમાં હલચલ તેજ થઈ છે, ત્યાં ઉત્તર પ્રદેશના બારાબંકી જિલ્લાનું એક નાનકડું ગામ 'કિંતૂર' પણ ગમગીનીમાં ડૂબી ગયું છે.
કિંતૂર ગામ સાથે જોડાયેલા હતા પૂર્વજોના મૂળ
બારાબંકીની સિરૌલી ગૌસપુર તહેસીલમાં આવેલું કિંતૂર ગામ અચાનક ચર્ચામાં આવી ગયું છે. કહેવાય છે કે ખામેનેઈના દાદા સૈયદ અહેમદ મુસાવી હિન્દી 18મી-19મી સદી દરમિયાન આ જ ગામમાં રહેતા હતા. પરિવારે પોતાની મૂળ ઓળખ જાળવી રાખવા માટે તેમના નામ સાથે 'હિન્દી' ઉપનામ જોડ્યું હતું. ગામના વડીલો જણાવે છે કે અહીં આજે પણ કેટલાક જૂના દસ્તાવેજો અને પૂર્વજોના મકાનોની યાદો મોજૂદ છે, જેનાથી આ ઐતિહાસિક સંબંધની ખબર પડે છે. જેવા સોશિયલ મીડિયા અને ટીવી ચેનલો દ્વારા હુમલા અને મોતના સમાચાર ગામમાં પહોંચ્યા, લોકો પોતપોતાના ઘરમાં બેસીને સમાચાર જોવા લાગ્યા હતા.
ગામમાં છવાયો સન્નાટો, લોકોની આંખો થઈ નમ
સમાચાર મળતા જ કિંતૂર ગામમાં સન્નાટો છવાઈ ગયો હતો. સ્થાનિક રહેવાસી સૈયદ નિહાલ મિયાંએ નમ આંખો સાથે કહ્યું કે, આ માત્ર ઈરાનનું જ નહીં પણ આખી દુનિયાનું નુકસાન છે. તેમના મતે, ખામેનેઈને લોકો એક મોટા ધાર્મિક અને રાજકીય નેતા તરીકે ઓળખતા હતા. ડૉ. રેહાન કાઝમીએ પણ દુઃખ વ્યક્ત કરતા કહ્યું કે આ બહુ મોટી ક્ષતિ છે. ગામમાં ઘણા લોકો તેને "ઇતિહાસની પીડાદાયક ક્ષણ" ગણાવી રહ્યા છે. લોકો પરસ્પર બેસીને જૂના સંબંધો અને આ ઐતિહાસિક જોડાણની ચર્ચા કરી રહ્યા છે.
વૈશ્વિક સ્તરે વધ્યો તણાવ
ઈરાન અને ઈઝરાયેલ વચ્ચે ચાલી રહેલો સંઘર્ષ હવે વધુ ગંભીર બન્યો છે. હુમલા અને જવાબી કાર્યવાહીથી સમગ્ર મધ્ય પૂર્વમાં અસ્થિરતા વધી ગઈ છે. અનેક દેશોએ શાંતિની અપીલ કરી છે, જ્યારે સામાન્ય લોકોમાં ડર અને ચિંતાનો માહોલ છે. નિષ્ણાતો માની રહ્યા છે કે આ ઘટના આવનારા સમયમાં આંતરરાષ્ટ્રીય રાજકારણની દિશા બદલી શકે છે. હાલમાં આખી દુનિયાની નજર આ ક્ષેત્ર પર ટકેલી છે.
નાના ગામની મોટી ઓળખ
કિંતૂર ગામના લોકો ભલે સાદું જીવન જીવતા હોય, પરંતુ આ ઘટનાએ તેમના ગામને વૈશ્વિક સ્તરે હેડલાઈન્સમાં લાવી દીધું છે. ગામના લોકોનું કહેવું છે કે તેમને તેમના ઐતિહાસિક સંબંધ પર ગર્વ છે, પરંતુ આ પ્રકારના દુઃખદ સમાચારથી તેઓ અંદર સુધી હચમચી ગયા છે. યુદ્ધની આગ ભલે હજારો કિલોમીટર દૂર સળગી રહી હોય, પરંતુ તેની અસર બારાબંકીના આ નાનકડા ગામ સુધી સ્પષ્ટપણે અનુભવાઈ રહી છે.
ટોપ સ્ટોરી
ટ્રેન્ડિંગ સમાચાર
