Assembly Election Results 2026: પાંચ રાજ્યોની વિધાનસભાની ચૂંટણીના પરિણામો જાહેર કરવામાં આવ્યા છે.  ભાજપ પહેલી વાર બંગાળમાં સરકાર બનાવવા માટે તૈયાર છે.બંગાળની 293 બેઠકોમાંથી ભાજપે 206 બેઠકો જીતી હતી, જ્યારે મમતા બેનર્જીની ટીએમસી માત્ર 81 બેઠકો પર સમેટાઈ ગઈ હતી. બંગાળમાં કુલ 294 વિધાનસભા બેઠકો છે. એક ફાલ્તા બેઠક માટે 21 મેના રોજ ફરીથી મતદાન થશે. 24 મેના રોજ પરિણામો જાહેર કરવામાં આવશે.

આસામમાં વિધાનસભાની કુલ 126 બેઠકોમાંથી ભાજપે 102 બેઠકો જીતી જ્યારે કોંગ્રેસે 19 અને અન્યએ પાંચ બેઠકો જીતી હતી. કેરલમમાં વિધાસભાની કુલ 140 બેઠકોમાંથી કોંગ્રેસ ગઠબંધને 102, લેફ્ટ ગઠબંધને 35 અને અન્યએ 03 બેઠકો જીતી હતી. પુડુચેરીમાં વિધાનસભાની કુલ 30 બેઠકોમાંથી ભાજપે 18 , કોંગ્રેસે 06 અને અન્યએ 6 બેઠકો જીતી હતી. 

દેશના ચાર રાજ્યો પશ્ચિમ બંગાળ, આસામ, તમિલનાડુ, કેરળ અને કેન્દ્રશાસિત પ્રદેશ પુડુચેરીમાં યોજાયેલી વિધાનસભા ચૂંટણીના પરિણામો જાહેર કરવામાં આવ્યા. કેટલાક રાજ્યોમાં સત્તા પરિવર્તન જોવા મળ્યું, જ્યારે અન્ય રાજ્યોમાં શાસક પક્ષોએ પોતાનો ટેકો મજબૂત બનાવ્યો. પશ્ચિમ બંગાળમાં સૌથી મોટો રાજકીય ઉથલપાથલ જોવા મળી, જ્યાં ભાજપે મજબૂત પ્રદર્શન કર્યું, 15 વર્ષથી સત્તામાં રહેલી તૃણમૂલ કોંગ્રેસને હરાવી.

બંગાળમાં ભાજપે 206 બેઠકો જીતી

બંગાળ વિધાનસભા ચૂંટણીમાં ભાજપે 294 બેઠકોમાંથી 200થી વધુ બેઠકો જીતીને પ્રચંડ વિજય મેળવ્યો હતો. આ દરમિયાન મમતા બેનર્જીના નેતૃત્વ હેઠળની તૃણમૂલ કોંગ્રેસ 81 બેઠકો પર સમેટાઈ ગઈ. મમતા બેનર્જીએ પોતાની ભવાનીપુર બેઠક પણ ગુમાવી દીધી. આ દરમિયાન, ભાજપના સુવેન્દુ અધિકારીએ નંદીગ્રામ અને ભવાનીપુર બંને બેઠકો જીતી લીધી હતી. 

આસામમાં ભાજપે 102 બેઠકો જીતી

ભાજપના નેતૃત્વ હેઠળના NDAએ આસામમાં જીતની હેટ્રિક હાંસલ કરી હતી. આ જીત રાજ્યમાં પાર્ટીની પકડ અને તેના શાસનમાં જનતાનો વિશ્વાસ દર્શાવે છે. ખાસ કરીને ચાના બગીચા અને ગ્રામીણ વિસ્તારોમાં સમર્થન, આ જીતમાં મુખ્ય પરિબળ હતું. આસામમાં કોંગ્રેસના સૌથી મોટા ચહેરા અને સાંસદ ગૌરવ ગોગોઈ પણ જોરહાટથી ચૂંટણી હારી ગયા.

તમિલનાડુમાં એક્ટર વિજયની લહેર

તમિલનાડુમાં આ વખતે એક મોટું રાજકીય પરિવર્તન જોવા મળ્યું, જ્યાં અભિનેતામાંથી રાજકારણી બનેલા એક્ટર વિજયના નેતૃત્વમાં ટીવીકે સૌથી મોટા પક્ષ તરીકે ઉભરી આવ્યો. તેની પહેલી ચૂંટણીમાં 100થી વધુ બેઠકો જીતીને ટીવીકેએ રાજ્યમાં એમકે સ્ટાલિનના ડીએમકેને સત્તા પરથી હટાવવામાં મુખ્ય ભૂમિકા ભજવી હતી.  ડીએમકે 60 બેઠકો પર સમેટાઈ ગઈ જ્યારે એઆઈએડીએમકે 47 બેઠકો પર જીત મેળવી હતી. ડીએમકેના વડા અને રાજ્યના સીએમ સ્ટાલિન પણ પોતાની બેઠક જાળવી શક્યા નહીં, કારણ કે તેઓ પક્ષના બળવાખોર વીએસ બાબુથી હારી ગયા.

કેરળમાં કોંગ્રેસના ગઠબંધનનો દબદબો 

કેરળમાં કોંગ્રેસના નેતૃત્વ હેઠળના યુનાઇટેડ ડેમોક્રેટિક ફ્રન્ટે 10 વર્ષ પછી ડાબેરી મોરચાને સત્તા પરથી દૂર કર્યો. સત્તા વિરોધી, રોજગાર અને મોંઘવારી જેવા મુદ્દાઓ પર લોકોના ગુસ્સાએ કેરળમાં ડાબેરી ડેમોક્રેટિક ફ્રન્ટને સત્તા પરથી દૂર કર્યો. યુડીએફે 99 બેઠકો જીતી, જ્યારે ડાબેરી મોરચા 35 બેઠકો પર સમેટાઈ ગયો. ભાજપે કેરળમાં પણ વિજય નોંધાવ્યો, તિરુવનંતપુરમમાં ત્રણેય બેઠકો જીતી. આ પરિણામથી હવે દેશભરમાં ડાબેરીઓના એકમાત્ર ગઢને તોડી પાડવામાં આવ્યો છે.

પુડુચેરીમાં પણ એનડીએએ સત્તા જાળવી રાખી 

પુડુચેરીમાં NDAએ સત્તા જાળવી રાખી. મતદારોએ NDAના "શ્રેષ્ઠ પુડુચેરી" ના વિઝન અને છેલ્લા કાર્યકાળની તેની યોજનાઓને સમર્થન આપ્યું જેનાથી ગઠબંધનની સ્થિતિ વધુ મજબૂત થઈ. ભાજપની જીત પછી પાર્ટી મુખ્યાલય ખાતે પાર્ટી કાર્યકર્તાઓને સંબોધતા PM મોદીએ આ ચૂંટણીઓના મુખ્ય મુદ્દાઓ તરીકે રેકોર્ડ મતદાન અને મહિલા ભાગીદારીમાં વધારો ગણાવ્યો. તેમણે નિષ્પક્ષ અને શાંતિપૂર્ણ ચૂંટણી સુનિશ્ચિત કરવામાં મહત્વપૂર્ણ ભૂમિકા બદલ ચૂંટણી પંચ અને સુરક્ષા દળોની પ્રશંસા કરી હતી.