કોકરોચ જનતા પાર્ટીને મોટો ઝટકો, દિલ્હી હાઈકોર્ટે 'X' એકાઉન્ટ તાત્કાલિક ફરી શરુ કરવાનો કર્યો ઇનકાર
Delhi High Court: કોકરોચ જનતા પાર્ટીને દિલ્હી હાઈકોર્ટમાં મોટો ઝટકો લાગ્યો છે. શુક્રવારે (29 મે) કોર્ટે કોકરોચ જનતા પાર્ટી (CJP) ના સોશિયલ મીડિયા 'X' એકાઉન્ટને તાત્કાલિક પુનઃસ્થાપિત કરવા માટે નિર્દેશ જારી કરવાનો ઇનકાર કર્યો હતો.
- દિલ્હી હાઈકોર્ટે કોકરોચ જનતા પાર્ટીના X એકાઉન્ટ પુનઃસ્થાપિત કરવાનો ઇનકાર કર્યો.
- CJP ની શરૂઆત CJI ની 'કોકરોચ' અને 'પરજીવી' ટિપ્પણીઓ પર વિવાદ બાદ થઈ.
- કોકરોચ જનતા પાર્ટી યુવાનોનો અવાજ મજબૂત કરવા સ્વતંત્ર આંદોલન ચલાવે છે.
- CJI એ પોતાની ટિપ્પણીઓ ખોટી રીતે રજૂ કરનાર મીડિયા સામે નારાજગી વ્યક્ત કરી.
Delhi High Court: કોકરોચ જનતા પાર્ટીને દિલ્હી હાઈકોર્ટ તરફથી મોટો ઝટકો લાગ્યો છે. કોર્ટે શુક્રવારે (29 મે) અભિજીત દીપકેના નેતૃત્વવાળી કોકરોચ જનતા પાર્ટી (CJP) ના સોશિયલ મીડિયા પ્લેટફોર્મ 'X' એકાઉન્ટને તાત્કાલિક પુનઃસ્થાપિત કરવાનો નિર્દેશ આપવાનો ઇનકાર કર્યો છે. દીપકેની અરજી પર જસ્ટિસ પુરુષેન્દ્ર કુમાર કૌરવે સુનાવણી કરી હતી.
પાર્ટીની શરૂઆત કેવી રીતે થઈ?
અગાઉ આમ આદમી પાર્ટી (AAP) સાથે જોડાયેલા રહેલા દીપકેએ 15 મેના રોજ એક વકીલના સિનિયર પદ સંબંધિત અરજીની સુનાવણી દરમિયાન સીજેઆઈ સૂર્યકાંતની 'કોકરોચ' અને 'પરજીવી' ટિપ્પણીઓ પર સર્જાયેલા વિવાદ વચ્ચે કોકરોચ જનતા પાર્ટી (CJP) ની શરૂઆત કરી હતી.
ડિજિટલ અભિયાન અને ફોલોઅર્સ
'X' પર કોકરોચ જનતા પાર્ટી (CJP) નું હેન્ડલ 21 મેના રોજ ભારતમાં 'બ્લોક' કરી દેવામાં આવ્યું હતું. ત્યારબાદ 'કોકરોચ ઈઝ બેક' નામે નવું હેન્ડલ બનાવવામાં આવ્યું હતું, જેના હાલના સમયમાં 2.27 લાખથી વધુ ફોલોઅર્સ છે. આ કેમ્પેઈન તેના અનોખા પ્રતીકો અને ડિજિટલ અભિયાનની પોલિસીને કારણે ચર્ચાનો વિષય બન્યું છે.
સમર્થકોએ 'કોકરોચ' ઓળખને વિરોધના પ્રતીક તરીકે દર્શાવી છે. 16 મેના રોજ શરૂ થયેલી CJP નો દાવો છે કે તેનો હેતુ યુવાનોના અવાજને મજબૂત કરવાનો અને સરકારને જવાબદાર ઠેરવવા માટે યુવાનો માટે એક સ્વતંત્ર આંદોલન ઊભું કરવાનો છે. તાજેતરમાં આ પાર્ટીએ શિક્ષણ ક્ષેત્રમાં સિસ્ટમની નિષ્ફળતા અને NEET-UG 2026 પેપર 'લીક' ને લઈને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે એક અભિયાન શરૂ કર્યું છે.
સીજેઆઈ (CJI) ની સ્પષ્ટતા
16 મેના રોજ ચીફ જસ્ટિસે પોતાની ટિપ્પણી અંગે કડક શબ્દોમાં સ્પષ્ટતા જારી કરતા કહ્યું હતું કે, તેઓ એવા સમાચારોથી 'દુઃખી' છે જેમાં એવો સંકેત આપવામાં આવ્યો હતો કે તેમણે યુવાનોની ટીકા કરી હતી. તેમણે કહ્યું કે તેમની ટિપ્પણીઓ ખાસ કરીને એવા લોકો વિરુદ્ધ હતી જેઓ 'નકલી અને ગેરકાયદેસર ડિગ્રી' દ્વારા કાયદાકીય વ્યવસાયમાં પ્રવેશી રહ્યા છે, અને મીડિયાના એક વર્ગે તેમની વાતને 'ખોટી રીતે રજૂ' કરી છે.
ટોપ સ્ટોરી
ટ્રેન્ડિંગ સમાચાર
