શુક્રવારે (1 ઓગસ્ટ, 2025 ) ના રોજ વિદેશ મંત્રાલયે અમેરિકાના રાષ્ટ્રપતિ ડોનાલ્ડ ટ્રમ્પના તીખા હુમલાઓ પછી ભારત-રશિયા સંબંધોમાં કોઈપણ તણાવને નકારી કાઢ્યો. વિદેશ મંત્રાલયના પ્રવક્તા રણધીર જયસ્વાલે કહ્યું કે વિવિધ દેશો સાથેના અમારા દ્વિપક્ષીય સંબંધો તેમની પોતાની શરતો પર આધારિત છે અને તેને કોઈ ત્રીજા દેશની દ્રષ્ટિએ જોવું જોઈએ નહીં.
વિદેશ મંત્રાલય દ્વારા આયોજિત એક પ્રેસ કોન્ફરન્સમાં અમેરિકા અને રશિયા સાથે ભારતના સંબંધો પર ખુલ્લીને વાત કરવામાં આવી હતી. અમેરિકાના રાષ્ટ્રપતિ ડોનાલ્ડ ટ્રમ્પની ભારત વિરુદ્ધની તીખી ટીપ્પણીને નકારી કાઢતા વિદેશ મંત્રાલયના પ્રવક્તા રણધીર જયસ્વાલે કહ્યું કે બંને દેશો વચ્ચેની ભાગીદાએ ઘણા ફેરફારો અને પડકારોનો સામનો કરવો પડ્યો છે. MEA ની આ ટિપ્પણી ટ્રમ્પ દ્વારા ભારત પર 25 ટકા ટેરિફ લાદવાની ધમકી આપ્યાના એક દિવસ પછી આવી છે.
વિદેશ મંત્રાલયે કહ્યું કે ભારત અને રશિયા એક સ્થિર અને સમયની કસોટી પર ખરા ઉતરનારા ભાગીદાર છે. સંરક્ષણ સહયોગ વિશે પૂછવામાં આવતા જયસ્વાલે કહ્યું, "આપણી રક્ષા જરૂરિયાતોની પરિપૂર્ણતા સંપૂર્ણપણે આપણી રાષ્ટ્રીય સુરક્ષા જરૂરિયાતો અને રણનીતિક મૂલ્યાંકન દ્વારા નક્કી થાય છે."
વિદેશ મંત્રાલયે કહ્યું કે ભારત-અમેરિકા ભાગીદારીમાં ઘણા ફેરફારો અને પડકારોનો સામનો કરવો પડ્યો છે. ટ્રમ્પના ડેડ ઈકોનોમીવાળા નિવેદન પર, રણધીર જયસ્વાલે કહ્યું, "અમે તે નક્કર એજન્ડા પર ધ્યાન કેન્દ્રિત કરી રહ્યા છીએ જેના માટે ભારત અને અમેરિકા પ્રતિબદ્ધ છે. અમને વિશ્વાસ છે કે અમેરિકા સાથેના અમારા સંબંધો આગળ વધતા રહેશે. ભારત અને અમેરિકા પાસે સહિયારા હિતો, લોકશાહી મૂલ્યો અને મજબૂત લોકો-થી-લોકોના સંબંધો પર આધારિત વ્યાપક વૈશ્વિક વ્યૂહાત્મક ભાગીદારી છે."
રશિયન તેલનો પુરવઠો બંધ કરવાના અહેવાલ પર MEAનું નિવેદન
ઈરાન સાથે વેપાર કરતી ભારતીય કંપનીઓ પર અમેરિકા દ્વારા લાદવામાં આવેલા પ્રતિબંધો સંબંધિત પ્રશ્નો પર, રણધીર જયસ્વાલે કહ્યું, "અમે પ્રતિબંધોની નોંધ લીધી છે, અમે તેના પર વિચાર કરી રહ્યા છીએ." તેમણે એવા અહેવાલોનો પણ જવાબ આપ્યો જેમાં કહેવામાં આવ્યું હતું કે ભારતીય તેલ કંપનીઓએ રશિયન તેલનો પુરવઠો બંધ કરી દીધો છે. તેમણે કહ્યું, "ઊર્જા પુરવઠાની જરૂરિયાતો પ્રત્યેના અમારા અભિગમથી દરેક વ્યક્તિ વાકેફ છે. અમે બજારમાં ઉપલબ્ધ સંસાધનો અને વર્તમાન વૈશ્વિક પરિસ્થિતિ પર નજર રાખીએ છીએ. અમને કોઈ ચોક્કસ બાબતોની જાણ નથી."
રશિયા તાજેતરના મહિનાઓમાં ભારતનો સૌથી મોટો તેલ સપ્લાયર રહ્યો છે. ભારતની આયાતમાં તેનો હિસ્સો લગભગ 35-40 ટકા છે, જે યુક્રેન યુદ્ધ પહેલા માત્ર 0.2 ટકા હતો.