IMD Weather Updates: ભારતીય હવામાન વિભાગ (IMD) એ 20 એપ્રિલ સુધી ઘણા રાજ્યો માટે હીટવેવ ચેતવણી જારી કરી છે. IMDએ કહ્યું છે કે આ આખા અઠવાડિયે તાપમાન ખૂબ જ વધશે, જેના કારણે તીવ્ર ગરમી પડશે. લોકોને જરૂરી હોય ત્યારે જ બહાર જવા માટે કહેવામાં આવ્યું છે. જો કે, ઘણા રાજ્યોમાં હીટવેવની સાથે આકરો તાપ પણ જોવા મળશે. તે જ સમયે, ઉત્તર ભારતના ઘણા રાજ્યોમાં વરસાદ અને વાવાઝોડાની ચેતવણી પણ જારી કરવામાં આવી છે.
IMDએ જણાવ્યું હતું કે આગામી પાંચ દિવસમાં ઓડિશા, ગંગીય પશ્ચિમ બંગાળ, કોંકણ, સૌરાષ્ટ્ર અને ગુજરાતના કચ્છ, દરિયાકાંઠાના આંધ્રપ્રદેશ અને યાનમ અને તેલંગાણાના કેટલાક ભાગોમાં હીટ વેવની સ્થિતિ યથાવત રહેવાની શક્યતા છે. હવામાન વિભાગે લોકોને ગરમીથી બચવા પાણી પીવા માટે જણાવ્યું છે. IMDએ કહ્યું છે કે લોકોએ સુતરાઉ કપડાં પહેરીને, માથું ઢાંકીને અથવા કપાળ પર કપડું લપેટીને બહાર જવું જોઈએ. તે વધુ સારું છે કે લોકો ટોપી અથવા છત્રી સાથે જ બહાર જાય.
કયા રાજ્યોમાં અને ક્યારે આવશે હીટવેવ?
હવામાન વિભાગે કહ્યું છે કે 16-20 એપ્રિલ દરમિયાન ઓડિશા અને ગંગીય પશ્ચિમ બંગાળના વિવિધ વિસ્તારોમાં હીટવેવની સ્થિતિની અપેક્ષા છે. મંગળવાર-બુધવાર દરમિયાન ઉત્તર કોંકણ, સૌરાષ્ટ્ર અને કચ્છ; બુધવાર-ગુરુવારે કોસ્ટલ આંધ્રપ્રદેશ અને યાનમમાં અને મંગળવાર-ગુરુવાર દરમિયાન તેલંગાણામાં હીટ વેવની અસર જોવા મળશે.
IMD એ પશ્ચિમ બંગાળના દક્ષિણી જિલ્લાઓ માટે 20 એપ્રિલ સુધી હીટ વેવની ચેતવણી પણ જારી કરી છે, કારણ કે આ પ્રદેશમાં દિવસનું તાપમાન 40 ડિગ્રી સેલ્સિયસથી ઉપર રહેશે. દક્ષિણ અને ઉત્તર 24 પરગણા, પૂર્વ અને પશ્ચિમ બર્ધમાન, પૂર્વ અને પશ્ચિમ મેદિનીપુર, પુરુલિયા, ઝારગ્રામ, બીરભૂમ, મુર્શિદાબાદ અને બાંકુરા જિલ્લામાં આ સપ્તાહના અંત સુધી હીટ વેવની સ્થિતિ યથાવત રહેશે.
કયા રાજ્યોમાં પડશે વરસાદ?
જ્યારે આ અઠવાડિયે દક્ષિણ અને પૂર્વના કેટલાક રાજ્યોમાં હીટ વેવની સ્થિતિ યથાવત રહેશે, જ્યારે ઉત્તરીય રાજ્યોમાં વરસાદ વધતા તાપમાન અને ગરમીથી રાહત આપશે. IMD એ 18-20 એપ્રિલ સુધી પંજાબ, હરિયાણા, ચંદીગઢ, દિલ્હી, પશ્ચિમ ઉત્તર પ્રદેશ અને રાજસ્થાન જેવા ઘણા રાજ્યોમાં ગાજવીજ, વીજળી અને ભારે પવન સાથે છૂટાછવાયા વરસાદની આગાહી કરી છે. IMDનો અંદાજ છે કે 17 એપ્રિલે દિલ્હી-NCR વાદળછાયું રહેશે અને ઠંડા પવનો ફૂંકાશે.
આ દરમિયાન, RWFC દિલ્હીએ 18 એપ્રિલ, ગુરુવારે રાષ્ટ્રીય રાજધાનીમાં અંશતઃ વાદળછાયું આકાશ અને ભારે પવનની આગાહી કરી હતી. 19 એપ્રિલે વાવાઝોડાં અને ભારે પવન સાથે ખૂબ જ હળવો વરસાદ થવાની સંભાવના છે.