Tomorrow Weather Update 2026: આખો દિવસ આકરો તાપ સહન કર્યા પછી હવે સાંજના સમયે વાવાઝોડા અને વરસાદનો સિલસિલો જોવા મળી રહ્યો છે. ખાસ કરીને ઉત્તર ભારતના રાજ્યોમાં આ ટ્રેન્ડ વધુ જોવા મળે છે. હવામાન વિભાગ (IMD) ના લેટેસ્ટ અપડેટ મુજબ, આવતીકાલે 8 જૂને ઉત્તર પ્રદેશ, બિહાર, મહારાષ્ટ્ર, કેરળ સહિત 11 રાજ્યોમાં ભારે વરસાદ અને વાવાઝોડાની આગાહી છે. આ દરમિયાન 80 કિમી/કલાકની જોરદાર ઝડપે પવન પણ ફૂંકાઈ શકે છે. જ્યારે બીજી તરફ દિલ્હી, રાજસ્થાન, પંજાબ, હરિયાણા સહિતના કેટલાક ભાગોમાં 12 જૂન સુધી હીટવેવનું એલર્ટ પણ આપવામાં આવ્યું છે.
દેશના અલગ-અલગ રાજ્યોમાં આવતીકાલનું (8 જૂન) હવામાન કેવું રહેશે?
દિલ્હી-NCR (8 થી 11 જૂન): દિલ્હીમાં ભીષણ ગરમીથી થોડી રાહત રહેશે. મહત્તમ તાપમાન 40 ડિગ્રી આસપાસ રહી શકે છે અને છૂટાછવાયા વિસ્તારોમાં ગાજવીજ અને પવન સાથે વરસાદ પડવાની સંભાવના છે. દિલ્હીમાં ચોમાસું 25 જૂન પછી જ એન્ટ્રી મારશે.
ઉત્તર પ્રદેશ (8 થી 12 જૂન): પૂર્વાંચલના આઝમગઢ, મઉ, દેવરિયા, વારાણસી, પ્રયાગરાજ અને અયોધ્યા સહિતના અનેક જિલ્લાઓમાં વાવાઝોડા સાથે વરસાદની ચેતવણી છે.
બિહાર (8 થી 12 જૂન): 8 જૂન માટે બિહારના 12 જિલ્લાઓ (પટના, ગયા, બક્સર વગેરે) માં ઓરેન્જ એલર્ટ જારી કરાયું છે. ભાગલપુર અને બાંકામાં ભારે વરસાદ પડી શકે છે અને 9-10 જૂને મોટાભાગના વિસ્તારોમાં વરસાદની આગાહી છે.
મધ્યપ્રદેશ (8 જૂન): વિદિશા, નર્મદાપુરમ, રાયસેન અને ખંડવા જેવા જિલ્લાઓમાં 70 kmph ની ઝડપે પવન અને કરા સાથે વરસાદ પડી શકે છે. જ્યારે ભોપાલ, ઇન્દોર અને ઉજ્જૈન સહિતના 22 જિલ્લાઓમાં 50 kmph ની ઝડપે પવન ફૂંકાશે.
આ પણ વાંચોઃ ગુજરાતના 9 જિલ્લામાં વરસાદની આગાહી, ચોમાસું ક્યાં પહોંચ્યું? જુઓ વિગત
રાજસ્થાન (8 થી 11 જૂન): બિકાનેર, કોટપુતલી અને ઝાલાવાડમાં વરસાદની આગાહી છે. જોકે, 8 જૂનથી વાવાઝોડાનું જોર ઘટશે અને પશ્ચિમ રાજસ્થાનના સરહદી વિસ્તારોમાં તાપમાન ફરી 44-46 ડિગ્રી સેલ્સિયસ સુધી પહોંચી શકે છે.
મહારાષ્ટ્ર (8 થી 15 જૂન): મહારાષ્ટ્રમાં ચોમાસાની એન્ટ્રી થઈ ચૂકી છે. વિદર્ભ, મરાઠવાડા, સિંધુદુર્ગ અને રત્નાગિરીમાં 9 જૂન સુધી મધ્યમથી ભારે વરસાદની આગાહી છે. નાગરિકોને ખુલ્લી પાવર લાઈનો અને ઝાડ નીચે ન ઊભા રહેવા સલાહ અપાઈ છે.
કેરળ અને તમિલનાડુ (8 જૂન): કેરળના મલપ્પુરમ, કોઝિકોડ સહિત 5 જિલ્લામાં ભારે વરસાદનું 'રેડ એલર્ટ' છે. જ્યારે તમિલનાડુના ઇરોડ, સેલેમ, મદુરાઈ અને કન્યાકુમારી સહિત 13 જિલ્લાઓમાં ભારે વરસાદ અને 40-50 kmph ની ઝડપે પવન ફૂંકાવાની આગાહી છે.
આંધ્રપ્રદેશ (8 થી 17 જૂન): અનંતપુર અને તિરુપતિમાંથી ચોમાસું શરૂ થઈ ગયું છે. રાયલસીમા વિસ્તારમાં 7 દિવસ સુધી વરસાદી માહોલ રહેશે અને 13-14 જૂન આસપાસ દરિયાકાંઠાના વિસ્તારોમાં પણ વરસાદનું જોર વધશે.
આ પણ વાંચોઃ મહારાષ્ટ્રમાં પહોંચ્યું ચોમાસું, ગુજરાતમાં આ તારીખે થશે એન્ટ્રી; જાણો ક્યારે બદલાશે હવામાન