weather forecast tomorrow may 19: દેશમાં હાલ હવામાનનો બેવડો મિજાજ જોવા મળી રહ્યો છે. એક તરફ ઉત્તર-પશ્ચિમ અને મધ્ય ભારતમાં આકરી ગરમી અને હીટવેવનો પ્રકોપ ચાલુ છે, તો બીજી તરફ આવતીકાલે એટલે કે 19 મે, 2026 ના રોજ દેશના દક્ષિણ, પૂર્વીય અને પૂર્વોત્તર ભાગોમાં ભારે વરસાદ અને વાવાઝોડાની આગાહી કરવામાં આવી છે. હવામાન વિભાગ (IMD) દ્વારા બિહાર અને ઝારખંડ સહિત કુલ 12 રાજ્યોમાં ગાજવીજ અને જોરદાર પવન સાથે વરસાદની શક્યતાને પગલે ઓરેન્જ અને યલો એલર્ટ જાહેર કરવામાં આવ્યું છે.
હવામાન વિભાગની લેટેસ્ટ આગાહી મુજબ દેશના અલગ-અલગ ભાગોમાં આવતીકાલે અને આગામી દિવસોમાં કેવું હવામાન રહેશે તેની વિસ્તૃત માહિતી નીચે મુજબ છે:
પૂર્વોત્તર રાજ્યોમાં મેઘમહેર યથાવત રહેશે
ઉત્તરપૂર્વ ભારતના રાજ્યો જેવા કે અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં 23 મે સુધી વરસાદી માહોલ જળવાઈ રહેશે. ખાસ કરીને 22 અને 23 મે ના રોજ આસામ અને મેઘાલયમાં અતિભારે વરસાદ પડી શકે છે. આ તમામ વિસ્તારોમાં 30 થી 50 કિમી પ્રતિ કલાકની ઝડપે પવન ફૂંકાવાની પણ ચેતવણી આપવામાં આવી છે, તેથી સ્થાનિક લોકોને સાવચેત રહેવા જણાવાયું છે.
દક્ષિણ ભારતમાં કરા અને ભારે વરસાદ
19 મે સુધી તમિલનાડુ, પુડુચેરી, કેરળ, લક્ષદ્વીપ, કર્ણાટક અને આંધ્રપ્રદેશના અમુક ભાગોમાં ધોધમાર વરસાદની આગાહી છે. દરિયાકાંઠાના કર્ણાટક, રાયલસીમા અને આંધ્રપ્રદેશના વિસ્તારોમાં 40 થી 60 કિમીની ઝડપે તોફાની પવન ફૂંકાઈ શકે છે, જેની સાથે ગાજવીજ પણ થશે.
આ પણ વાંચોઃ આવતીકાલનું હવામાન: આગામી 14 કલાકમાં દેશના 13 રાજ્યોમાં ભારે વરસાદ તૂટી પડશે, 70 kmph ની ઝડપે પવન ફૂંકાશે
પૂર્વ ભારતમાં કેવું રહેશે હવામાન?
પશ્ચિમ બંગાળના ઉપ-હિમાલયી વિસ્તારો અને સિક્કિમમાં 20 થી 23 મે વચ્ચે ભારે વરસાદની પૂરેપૂરી સંભાવના છે. આંદામાન અને નિકોબાર ટાપુઓમાં તો આખું અઠવાડિયું વરસાદ ચાલુ રહેશે. આ ઉપરાંત બિહાર, ઝારખંડ અને ઓડિશામાં પણ આગામી થોડા દિવસો સુધી ગાજવીજ અને પવન સાથે હળવોથી મધ્યમ વરસાદ પડવાની શક્યતા છે.
ગરમીથી શેકાતા ઝારખંડને મળશે રાહત
હાલ આકરી ગરમીનો સામનો કરી રહેલા ઝારખંડના લોકોને આ વરસાદથી મોટી રાહત મળશે. હવામાન વિભાગે 23 મે સુધી ઝારખંડના ઘણા ભાગોમાં હળવા થી મધ્યમ વરસાદની આગાહી કરી છે. 19 મે ના રોજ ધનબાદ અને ગિરિડીહ જિલ્લાઓ માટે ઓરેન્જ એલર્ટ અપાયું છે. જ્યારે 20 મે ના રોજ અન્ય 9 જિલ્લાઓમાં ઓરેન્જ એલર્ટ રહેશે.
કુલ મળીને ઝારખંડના 11 જિલ્લાઓમાં 50 થી 60 કિમીની ઝડપે પવન અને વરસાદની આગાહી કરવામાં આવી છે. જોકે, ગઢવા, પલામુ, લાતેહાર, ચતરા, કોડરમા અને હજારીબાગ જિલ્લાઓમાં વરસાદની શક્યતા થોડી ઓછી છે.
રાંચી હવામાન વિભાગના ડેપ્યુટી ડિરેક્ટર અભિષેક આનંદના જણાવ્યા મુજબ, હાલ આકાશ આંશિક વાદળછાયું રહેશે. આગામી બે દિવસમાં મહત્તમ તાપમાનમાં 2 ડિગ્રી સેલ્સિયસનો વધારો થઈ શકે છે, પરંતુ ત્યારબાદના ત્રણ દિવસ સુધી તાપમાનમાં કોઈ મોટો ફેરફાર જોવા મળશે નહીં.
આ પણ વાંચોઃ આવતીકાલનું હવામાન: આગામી 12 કલાકમાં 19 રાજ્યોમાં ભારે વરસાદ-વાવાઝોડાનું એલર્ટ, 80kmph ઝડપે ફૂંકાશે પવન