Rain Forecast: દેશભરમાં અત્યારે ચોમાસુ જોરદાર એક્ટિવ થઇ ચૂક્યુ છે. દેશમાં સાર્વત્રિક વરસાદ વરસી રહ્યો છે, ક્યાંક પૂર તો ક્યાંક ભૂસ્ખલનની સ્થિતિ પેદા થઇ છે. આ બધાની વચ્ચે હવે ભારતીય હવામાન વિભાગે દેશભરમાં મુસળધાર વરસાદની ગંભીર ચેતવણી જાહેર કરી છે. બંગાળની ખાડીમાં સર્જાયેલા સક્રિય ડીપ ડિપ્રેશનના કારણે પૂર્વ અને ઉત્તર ભારતના રાજ્યોમાં તોફાની પવન સાથે ભારે વરસાદ પડી રહ્યો છે, જેના પગલે સ્થાનિક તંત્ર અને માછીમારોને સુરક્ષા કડક કરવા સૂચના આપવામાં આવી છે.
બંગાળની ખાડીમાં વાતાવરણીય ફેરફારોને કારણે બનેલી આ સિસ્ટમ હવે વધુ મજબૂત બનીને ઉત્તર-પશ્ચિમ તરફ આગળ વધી રહી છે. આ સિસ્ટમની સીધી અસર હેઠળ પશ્ચિમ બંગાળ, ઓડિશા, ઝારખંડ અને બિહારના વિસ્તારોમાં ભારેથી અતિભારે વરસાદની સંભાવના વ્યક્ત કરવામાં આવી છે. તે સિવાય ઉત્તર ભારતના પહાડી અને મેદાની રાજ્યોમાં પણ આગામી દિવસોમાં મધ્યમથી ભારે વરસાદ પડી શકે છે. પશ્ચિમ બંગાળ અને ઓડિશાના દરિયાકાંઠાના વિસ્તારોમાં પ્રતિ કલાકે 60 થી 70 કિલોમીટરની ઝડપે તોફાની પવન ફૂંકાવાની શક્યતા છે. દરિયામાં ઊંચા મોજાં ઉછળવાની અને સ્થિતિ અત્યંત પ્રતિકૂળ રહેવાની ભીતિ હોવાથી માછીમારોને દરિયો ન ખેડવા અને કિનારે રહેલા જહાજોને લંગારી દેવાની તાકીદ કરવામાં આવી છે.
અંબાલાલ પટેલની ડરામણી આગાહી: 5 ઓગસ્ટથી આ વિસ્તારમાં ભુક્કા કાઢશે વરસાદ, પૂરની ભીતિ
હવામાન વિભાગની આ ગંભીર ચેતવણી બાદ સંબંધિત રાજ્ય સરકારો અને ડિઝાસ્ટર મેનેજમેન્ટ ટીમો સંપૂર્ણ એલર્ટ મોડ પર આવી ગઈ છે. નીચાણવાળા અને દરિયાકાંઠાના વિસ્તારોમાંથી લોકોને સુરક્ષિત સ્થળે ખસેડવાની તૈયારીઓ શરૂ કરી દેવામાં આવી છે. આવનારા દિવસોમાં પૂરની સ્થિતિ અને વાહનવ્યવહાર ખોરવાઈ જવાની આશંકા હોવાથી નાગરિકોને પણ બિનજરૂરી બહાર ન નીકળવા અને સરકારી માર્ગદર્શિકાનું પાલન કરવા વિનંતી કરાઈ છે.