Mumbai Heavy Rain: દેશની આર્થિક રાજધાની મુંબઈમાં આજે વહેલી સવારથી જ શરૂ થયેલા અવિરત અને મુશળધાર વરસાદને કારણે સમગ્ર મુંબઈગરાઓનું જનજીવન ભારે પ્રભાવિત થયું છે. ચોમાસાની સિસ્ટમ મજબૂત બનતા માયાનગરીના નીચાણવાળા વિસ્તારો પૂરના પાણીમાં ડૂબી ગયા છે. મુંબઈના સૌથી વ્યસ્ત ગણાતા કિંગસર્કલ, દાદર અને હિંદમાતા જેવા વિસ્તારોમાં ઘૂંટણસમા પાણી ભરાઈ જવાથી વાહનવ્યવહાર સંપૂર્ણપણે ઠપ થઈ ગયો છે.
મુશળધાર વરસાદની સીધી અસર મુંબઈની લાઈફલાઈન ગણાતી લોકલ ટ્રેન સેવા પર પડી છે. દાદર સ્ટેશન નજીક રેલવે ટ્રેક પાણીમાં ગરકાવ થઈ જતાં સેન્ટ્રલ લાઈન, વેસ્ટર્ન રેલવે લાઈન અને હારબર લાઈન પર દોડતી ટ્રેનો પોતાના નિર્ધારિત સમય કરતાં ઘણી મોડી ચાલી રહી છે અથવા કેટલીક જગ્યાએ અટકાવી દેવામાં આવી છે, જેના લીધે લાખો મુસાફરો રેલવે સ્ટેશનો પર અટવાઈ પડ્યા છે.
સ્થાનિક વહીવટી તંત્ર અને બીએમસી (BMC) દ્વારા પાણીના નિકાલ માટે પંપો મુકવામાં આવ્યા હોવા છતાં, વરસાદની તીવ્રતા એટલી વધારે છે કે રસ્તાઓ નદીમાં ફેરવાઈ ગયા છે. આ ભયાનક જળબંબાકારની સ્થિતિ વચ્ચે દાદર ઈસ્ટમાં આવેલા પવિત્ર સ્વામિનારાયણ મંદિરની આસપાસ પણ ભારે પાણી ભરાયા હોવાના અહેવાલો સામે આવ્યા છે.
Rain: ગીર સોમનાથમાં મેઘરાજાની તોફાની બેટિંગ, સૂત્રાપાડામાં બે કલાકમાં 3 ઈંચ વરસાદથી રસ્તાઓ પાણી-પાણી
રસ્તાઓ પર પાણી ફરી વળતા ઓફિસે જતા કર્મચારીઓ અને શાળા-કોલેજના વિદ્યાર્થીઓ ભારે મુશ્કેલીમાં મુકાયા છે, જ્યારે મુખ્ય હાઈવે પર વાહનોની લાંબી કતારો જોવા મળી રહી છે. હવામાન વિભાગે આગામી કલાકોમાં હજુ પણ ભારે વરસાદની ચેતવણી આપી હોવાથી મહાનગરપાલિકાએ લોકોને બિનજરૂરી ઘરની બહાર ન નીકળવાની સખત અપીલ કરી છે.