ગેસ સંકટ થશે દૂર: હોર્મુઝની ખાડી પાર કરી LPG ભરેલું જહાજ 'શિવાલિક' મુન્દ્રા પોર્ટ પહોંચ્યું, ભારતની કૂટનીતિની મોટી જીત

INS વિશાખાપટ્ટનમ અને હેલિકોપ્ટર્સની કડક સુરક્ષા વચ્ચે કેપ્ટન સુખજીત સિંહ 27 ક્રૂ મેમ્બર્સ સાથે જહાજ મુન્દ્રા લાવ્યા; અહીં 20 હજાર મેટ્રિક ટન ગેસ ઉતારીને જહાજ મેંગલોર જશે.

Indian Tankers Shivalik Nanda Devi Reach Gujarat

Source : abp asmita

Show Quick Read

Key points generated by AI, verified by newsroom

• LPG નો જથ્થો લઈને 'શિવાલિક' જહાજ મુન્દ્રા પોર્ટ પર પહોંચ્યું.
• વડાપ્રધાન મોદીની કૂટનીતિ અને ઈરાન સાથેના સંપર્કથી શક્ય બન્યું.
• 20,000 મેટ્રિક ટન ગેસ ભારતના અડધા દિવસની ખપત પૂરી કરશે.
• 22 ભારતીય જહાજો અને 611 ખલાસીઓ હજુ પણ ફસાયેલા છે.

ગુજરાત સહિત આખા દેશમાં ગેસના પુરવઠાને લઈને ઊભા થયેલા સંકટ વચ્ચે ખૂબ જ મોટા અને રાહતના સમાચાર આવ્યા છે. પર્શિયન ગલ્ફ (હોર્મુઝની ખાડી) માં ફસાયેલા ભારતીય જહાજોમાંથી LPG નો મસમોટો જથ્થો લઈને ઈન્ડિયન શિપિંગ કોર્પોરેશનનું પ્રથમ જહાજ 'શિવાલિક' આખરે સલામત રીતે કચ્છના મુન્દ્રા પોર્ટ પર આવી પહોંચ્યું છે. વડાપ્રધાન નરેન્દ્ર મોદીની સફળ વિદેશનીતિ અને ભારત સરકારના ઈરાન સાથેના સતત સંપર્કના કારણે આ શક્ય બન્યું છે. આ જહાજ મુન્દ્રામાં 20,000 મેટ્રિક ટન ગેસ ખાલી કરશે, જે હિન્દુસ્તાનની અડધા દિવસની ગેસની ખપત પૂરી કરવા માટે પૂરતો છે. રાજ્ય વિધાનસભા ગૃહમાં પણ પ્રવક્તા મંત્રી જીતુભાઈ વાઘાણીએ આ ખુશખબર આપીને જણાવ્યું હતું કે પીએમ મોદીની કૂટનીતિના કારણે જ આ જહાજ ગુજરાતની ધરતી પર પહોંચી શક્યું છે.

કડક સુરક્ષા વચ્ચે મુન્દ્રા પહોંચ્યું શિવાલિક

સોમવારે સાંજે મુન્દ્રા પોર્ટ પર આવી પહોંચેલા આ જહાજને લાંગરવાની (પાર્ક કરવાની) પ્રક્રિયા હાથ ધરવામાં આવી છે. કેપ્ટન સુખજીત સિંહના નેતૃત્વમાં કુલ 27 ક્રૂ મેમ્બર્સ આ 'શિવાલિક' જહાજને લઈને આવ્યા છે. રસ્તામાં કોઈ અનિચ્છનીય ઘટના ન બને તે માટે નૌસેનાના યુદ્ધ જહાજ 'INS વિશાખાપટ્ટનમ' દ્વારા શિવાલિકને ખાસ એસ્કોર્ટ કરવામાં આવ્યું હતું. આ ઉપરાંત, આકાશમાંથી 'ચેતક' અને 'MH-60R' હેલિકોપ્ટરે પણ સતત જહાજ પર ચાંપતી નજર રાખીને સુરક્ષા પૂરી પાડી હતી.

માલ ઉતારવાની તમામ તૈયારીઓ પૂર્ણ, હવે જશે મેંગલોર

શિપિંગ મંત્રાલયના અધિકારી રાજેશ સિંહાએ માહિતી આપી હતી કે, જહાજ મુન્દ્રા પહોંચે તે પહેલાં જ પોર્ટ પર પેપરવર્ક અને અન્ય તમામ વ્યવસ્થાઓ પૂરી કરી લેવાઈ હતી, જેથી ગેસ ઉતારવામાં સહેજ પણ વિલંબ ન થાય. અહીં 20,000 મેટ્રિક ટન જથ્થો ડિસ્ચાર્જ કર્યા પછી શિવાલિક જહાજ મેંગલોર તરફ રવાના થશે. શિવાલિક અને નંદા દેવી બાદ આવતીકાલે 'જંગ લાડકી' નામનું ક્રૂડ ઓઇલ ટેન્કર પણ મુન્દ્રા પોર્ટ પર આવી પહોંચશે.

ભારતની કૂટનીતિની કમાલ: ઈરાને નિભાવી દોસ્તી

ઉલ્લેખનીય છે કે, હોર્મુઝ સ્ટ્રેટ (ખાડી) માં કુલ 24 ભારતીય ધ્વજવાળા જહાજો ફસાયેલા હતા. જ્યારે દુનિયાના અન્ય દેશો સંકટનો સામનો કરી રહ્યા છે, ત્યારે ભારતે ઈરાન સાથે પોતાની મિત્રતા અને કૂટનીતિનો ઉપયોગ કર્યો હતો. પરિણામે, ઈરાને ભારતને મોટી રાહત આપતા 'શિવાલિક' અને 'નંદા દેવી' નામના બે જહાજોને 14 માર્ચે ત્યાંથી નીકળવાની ખાસ પરવાનગી આપી હતી. આ બંને જહાજો મળીને કુલ 92,700 ટન LPG લઈને આવી રહ્યા છે.

હજુ 22 જહાજો અને 611 ખલાસીઓ ફસાયેલા છે

જોકે, સંકટ હજુ સંપૂર્ણપણે ટળ્યું નથી. રાજેશ સિંહાના જણાવ્યા અનુસાર, હોર્મુઝની ખાડીના પશ્ચિમ ભાગમાં હજુ પણ 22 ભારતીય જહાજો ફસાયેલા છે, જેમાં 611 ભારતીય ખલાસીઓ (ક્રૂ મેમ્બર્સ) સવાર છે. ફસાયેલા આ 22 જહાજોમાંથી 6 જહાજો LPG ના અને 1 LNG નું છે. આ ઉપરાંત 4 ક્રૂડ ઓઇલ ટેન્કર, 1 કેમિકલનું જહાજ, 3 કન્ટેનર જહાજ અને 2 બલ્ક કેરિયર છે. બાકીના જહાજોમાંથી 1 ડ્રેજર અને 1 સાવ ખાલી જહાજ છે. જ્યારે અન્ય 3 જહાજો ડ્રાય ડોકમાં છે, એટલે કે તેઓ તેમના નિયમિત રિપેરિંગ અને મેન્ટેનન્સ માટે ત્યાં રાખવામાં આવ્યા છે.

આ પણ વાંચો

ગુજરાતમાં LPG અને કેરોસીન વિતરણ માટે નવા નિયમો લાગુ: જાણો કોને, કેટલો ગેસ મળશે