ઈન્ડિગોની સુરત-દિલ્લીની મોર્નિંગ ફ્લાઈટ 26 જાન્યુઆરી સુધી રદ, પરેડના કારણે લેવાયો નિર્ણય
Indigo flight: ગણતંત્ર પર્વની પરેડને લઇને ઇડિંગોએ કેટલીક મોર્નિગ ફ્લાઇ રદ કરી છે. આ સાથે ઇંડિગોએ 10 ફેબ્રુઆરી બાદ કોઇ પણ ફલાઇટ રદ ન થવાનો પણ સરકારને ભરોસો અપાવ્યો છે.
Indigo flight:દિલ્લીમાં ગણતંત્ર દિવસની પરેડને ધ્યાને રાખીને દિલ્લી- સુરત મોર્નિગ ફ્લાઈટ રદ કરી દેવામાં આવી છે. દિલ્લીથી સુરતની સવારની 7-50 વાગ્યાની ફ્લાઈટ રદ કરાઇ છે. સુરતથી સવારે 8-30 વાગ્યાથી દિલ્લી જતી ફ્લાઈટ રદ કરવામાં આવી છે.
10 ફેબ્રુઆરી પછી ઇન્ડિગોની કોઈ ફ્લાઇટ નહિ થાય રદ
ઇન્ડિગોએ નાગરિક ઉડ્ડયન મહાનિર્દેશાલય (DGCA) ને ખાતરી આપી છે કે, તે 10 ફેબ્રુઆરી, 2026 પછી કોઈપણ ફ્લાઇટ રદ કરશે નહીં. કંપની પાસે પૂરતા પાઇલટ્સ અને ક્રૂ છે, જેનાથી હવે નવા FDTL નિયમોનું પાલન સુનિશ્ચિત રીતે થઇ શકશે. ડિસેમ્બર 2025 માં વ્યાપક ફ્લાઇટ રદ થયા બાદ, DGCA એ ઇન્ડિગો પર ₹22.20 કરોડનો દંડ ફટકાર્યો હતો. નિયમનકાર હવે ઇન્ડિગોના સુધારાત્મક પગલાંથી સંતુષ્ટ છે અને પરિસ્થિતિ પર નજીકથી નજર રાખી રહ્યું છે.
હકીકતમાં, ડિસેમ્બર 2025 ની શરૂઆતમાં ઇન્ડિગોને ગંભીર ઓપરેશનલ કટોકટીનો સામનો કરવો પડ્યો હતો. કંપનીએ 1 થી 9 ડિસેમ્બર દરમિયાન કુલ 4,290 ફ્લાઇટ્સ રદ કરી હતી. આનું મુખ્ય કારણ પાઇલટ્સની અછત હતી, જે નવેમ્બરમાં અમલમાં આવેલા નવા ફ્લાઇટ ડ્યુટી ટાઇમ લિમિટેશન (FDTL) નિયમોના અમલીકરણ પછી ઊભી થઈ હતી. આ નિયમોનો હેતુ ક્રૂ સભ્યો માટે પૂરતો આરામ અને કામના કલાકો સુનિશ્ચિત કરવાનો છે. જો કે, ઇન્ડિગો આ નિયમોનું પાલન કરવામાં નિષ્ફળ ગયો, જેના કારણે તેની સમગ્ર કામગીરી ખોરવાઈ ગઈ.
દેશભરમાં ફ્લાઇટ કામગીરી સ્થગિત થવાને કારણે મુસાફરોને પડી રહેલી અસુવિધાને ધ્યાનમાં રાખીને, DGCA એ 10 ફેબ્રુઆરી સુધી FDTL ના કેટલાક નિયમોને અસ્થાયી રૂપે સ્થગિત કરીને ઇન્ડિગોને રાહત આપી હતી. જોકે, ઇન્ડિગોએ હવે DGCA ને ખાતરી આપી છે કે, તેણે બધું જ ગોઠવી દીધું છે. 10 ફેબ્રુઆરી સુધીમાં, તેને 2,280 કેપ્ટનની જરૂર છે, જ્યારે તેની પાસે 2,400 ઉપલબ્ધ છે. તેવી જ રીતે, 2,050 ફર્સ્ટ ઓફિસરની જરૂરિયાત સામે, તેની પાસે 2,240 ઉપલબ્ધ છે. આ આંકડાઓના આધારે, DGCA એ મંગળવારે એક નિવેદન જાહેર કરીને જણાવ્યું હતું કે ઇન્ડિગો હવે સ્થિર કામગીરી માટે તૈયાર છે અને વધુ ફ્લાઇટ રદ થવાની કોઈ શક્યતા નથી.
ટોપ સ્ટોરી
ટ્રેન્ડિંગ સમાચાર
