ગેસ બુકિંગના નામે મોટી છેતરપિંડી: શું તમને પણ 'સ્પેશિયલ ઓફર' વાળો મેસેજ મળ્યો છે?

મિડલ ઈસ્ટના તણાવની અફવાઓ વચ્ચે ગઠિયાઓ સક્રિય, ડિજિટલ ઈન્ડિયાએ આપી ચેતવણી - ગેસ એજન્સીના નામે આવતી નકલી લિંક અને 'લિમિટેડ ટાઈમ ઑફર્સ'થી બચો.

LPG Gas Booking Fraud Alert 2026 Beware of Fake Special Gas Offers

Source : PTI

Show Quick Read

Key points generated by AI, verified by newsroom

• મિડલ ઈસ્ટ તણાવને કારણે ગેસ અછતની અફવાઓ ફેલાઈ.
• ઠગો 'સ્પેશિયલ ઓફર'ના બહાને છેતરપિંડી કરી રહ્યા છે.
• સરકાર ખાતરી આપે છે કે ગેસનો પૂરતો જથ્થો ઉપલબ્ધ.
• અજાણી લિંક પર ક્લિક ન કરો, mylpg.in તપાસો.

LPG gas booking fraud: હાલમાં મિડલ ઈસ્ટ (પશ્ચિમ એશિયા)માં ચાલી રહેલા તણાવની અસર ભારતમાં પણ જોવા મળી રહી છે. દેશના કેટલાક ભાગોમાં ગેસની અછત હોવાની અફવાઓ વચ્ચે સાયબર ઠગો સક્રિય થઈ ગયા છે. આ ગઠિયાઓ લોકોને 'સ્પેશિયલ ગેસ ઓફર' અથવા 'લિમિટેડ ટાઈમ ઓફર'ના નામે આકર્ષક મેસેજ મોકલીને લલચાવી રહ્યા છે અને તેમની સાથે છેતરપિંડી કરી રહ્યા છે. જો તમારા ફોન પર પણ આવો કોઈ મેસેજ આવ્યો હોય, તો તમારે તરત જ ચેતી જવાની જરૂર છે, નહીં તો મોટું નુકસાન થઈ શકે છે.

અફવાઓથી ગભરાવવાની જરૂર નથી

ભારત સરકારે જનતાને સ્પષ્ટ ખાતરી આપી છે કે દેશમાં પેટ્રોલ, ડીઝલ, LPG ગેસ અને અનાજનો પૂરતો જથ્થો ઉપલબ્ધ છે. તેમ છતાં, કૌભાંડીઓ આ પરિસ્થિતિનો ફાયદો ઉઠાવી રહ્યા છે. તેઓ લોકોને ગેસ ખતમ થઈ જવાનો ડર બતાવીને ઉતાવળમાં ખોટા નિર્ણયો લેવા મજબૂર કરે છે.

ઠગો કેવી રીતે જાળ બિછાવે છે?

આ કૌભાંડીઓ તમને છેતરવા માટે નવી-નવી તરકીબો અપનાવી રહ્યા છે:

પ્રાયોરિટીનો દાવો: ગઠિયાઓ મેસેજમાં એવું કહે છે કે આ ખાસ ઓફર માટે 'પ્રાથમિકતા' (Priority) ના આધારે માત્ર તમારી જ પસંદગી કરવામાં આવી છે.

ખોટો ડર: લિમિટેડ સ્ટોકની અફવાઓ ફેલાવીને ગ્રાહકોને ઉતાવળમાં તેમની આપેલી લિંક પર ક્લિક કરવા કે પેમેન્ટ કરવા મજબૂર કરે છે.

નકલી ડીલરશીપની જાળ: કેટલાક ઠગો તો નકલી "એપ્રુવલ લેટર" (મંજૂરી પત્રો) મોકલીને LPG ડીલરશીપ આપવાના બહાને લોકો પાસે રિફંડપાત્ર ફી પણ માંગે છે, જે સદંતર છેતરપિંડી છે.

Scammers love a "Limited Time Offer" because it stops you from thinking clearly. In the world of essential services like LPG, the only "special deal" you should trust is the one reflecting on the official government portal. If it sounds too good to be true, it’s likely a trap.… pic.twitter.com/8lvNLCt531

— Digital India (@_DigitalIndia) April 11, 2026

ડિજિટલ ઈન્ડિયાની ચેતવણી

'ડિજિટલ ઈન્ડિયા'એ તેના સત્તાવાર X (અગાઉનું ટ્વિટર) એકાઉન્ટ પર પોસ્ટ કરીને લોકોને આ કૌભાંડોથી સાવચેત રહેવા જણાવ્યું છે. તેમાં સ્પષ્ટ કરવામાં આવ્યું છે કે છેતરપિંડી કરનારાઓ જાણીજોઈને "લિમિટેડ ટાઈમ ઓફર"નો ઉપયોગ કરે છે, જેથી લોકો વિચાર્યા વગર તરત રિએક્ટ કરે.

યાદ રાખો કે, સરકારી એજન્સીઓ અથવા BPCL, HP અને ઈન્ડિયન ઓઈલ જેવી ઓઈલ કંપનીઓ ક્યારેય પણ ગ્રાહકોને "લિમિટેડ ટાઈમ" વાળી લિંક સાથેના મેસેજ મોકલતી નથી. જો તમને કોઈ અજાણ્યા નંબર કે ઈમેલ પરથી આવી કોઈ ઓફર મળે, તો સમજી લેજો કે તે એક કૌભાંડ છે. LPG સંબંધિત કોઈપણ સાચી માહિતી, સત્તાવાર ઑફર કે અપડેટ જાણવા માટે માત્ર સરકારી પોર્ટલ mylpg.in ની જ મુલાકાત લો અને કોઈપણ અજાણી લિંક પર ક્લિક કરવાનું ટાળો.