Malvan resort swimming pool accident: વેકેશન દરમિયાન સ્વિમિંગ પૂલમાં મસ્તી કરવી કેટલી ભારે પડી શકે છે, તેનો એક હચમચાવી મૂકનારો કિસ્સો મહારાષ્ટ્રના સિંધુદુર્ગ જિલ્લામાંથી સામે આવ્યો છે. ગત 20 જૂનના રોજ માલવણના એક પ્રખ્યાત રિસોર્ટમાં 25 વર્ષીય યુવક શ્રેણિક મિલિંદ ટકલેનું સ્વિમિંગ પૂલમાં માથાભેર કૂદકો મારવાના કારણે કરુણ મોત નીપજ્યું હતું. 9 મિત્રો સાથે રજાઓ ગાળવા ગયેલા આ યુવકે અજાણતામાં છીછરા પૂલમાં છલાંગ લગાવી હતી, જેના કારણે તેના માથામાં ગંભીર ઈજાઓ પહોંચી હતી અને સારવાર મળે તે પહેલા જ તેણે પોતાનો જીવ ગુમાવ્યો હતો.
છીછરા પાણીમાં કૂદકો મારવો બન્યો જીવલેણ
મળતી માહિતી મુજબ, મૃતક શ્રેણિક ટકલે મૂળ સાંગલી/કોલ્હાપુર પંથકનો રહેવાસી હતો અને તે પોતાના 9 મિત્રો સાથે માલવણના રિસોર્ટમાં રોકાયો હતો. ઘટનાના દિવસે કેટલાક મિત્રો રૂમમાં આરામ કરી રહ્યા હતા, જ્યારે શ્રેણિક અને અન્ય મિત્રો સ્વિમિંગ પૂલમાં ન્હાવાની મજા માણી રહ્યા હતા. આ દરમિયાન શ્રેણિકે પૂલ પાસેના બાળકોના વિભાગ (Kids Section) માં અંદાજિત 8 થી 10 ફૂટની ઊંચાઈ પરથી પાણીમાં માથાભેર (Headfirst) કૂદકો માર્યો હતો. કમનસીબે, બાળકોના આ પૂલની ઊંડાઈ માત્ર 4 ફૂટ જ હતી. પાણી છીછરું હોવાને કારણે શ્રેણિકનું માથું સીધું પૂલના તળિયે જોરથી અથડાયું હતું.
હોસ્પિટલ પહોંચે તે પહેલાં જ નીપજ્યું મોત
આ ટક્કર એટલી ભયંકર હતી કે શ્રેણિકના માથાના ભાગે ગંભીર અને જીવલેણ ઈજાઓ પહોંચી હતી. ઘટનાસ્થળે હાજર તેના મિત્રોએ તાત્કાલિક તેને પૂલમાંથી બહાર કાઢ્યો હતો અને નજીકની હોસ્પિટલમાં ખસેડ્યો હતો. જોકે, હોસ્પિટલ પહોંચતા જ ફરજ પરના ડોક્ટરોએ તપાસ બાદ તેને મૃત જાહેર કર્યો હતો. ઘટનાની જાણ થતાં શ્રેણિકના પિતા અને અન્ય પરિવારજનો તાત્કાલિક માલવણ દોડી આવ્યા હતા. પોલીસે આ મામલે આકસ્મિક મૃત્યુનો ગુનો નોંધી, જરૂરી કાનૂની કાર્યવાહી પૂર્ણ કરી મૃતદેહ પરિવારને સોંપ્યો હતો. હાલ આ સમગ્ર દુર્ઘટનાનો એક હૃદયદ્રાવક વીડિયો સોશિયલ મીડિયા પર ઝડપથી વાયરલ થઈ રહ્યો છે.
સ્વિમિંગ પૂલમાં ન્હાતી વખતે શું સાવચેતી રાખવી?
આવી જીવલેણ દુર્ઘટનાઓ ટાળવા માટે નિષ્ણાતો કેટલીક મહત્વપૂર્ણ સલામતી રાખવાની સલાહ આપે છે:
એકલા ન જાવ: સ્વિમિંગ પૂલમાં ક્યારેય એકલા ન જાવ. જો તમારી સાથે આવનાર વ્યક્તિ સારો તરવૈયો હોય તો તે વધુ સુરક્ષિત રહેશે. અકસ્માત સમયે એકલા હોવાથી સમયસર સારવારના અભાવે જીવ જઈ શકે છે.
ઊંડાઈની ચકાસણી: પૂલની ઊંડાઈ વિશે ચોક્કસ માહિતી ન હોય ત્યાં સુધી અચાનક કે ઊંચાઈ પરથી કૂદકો મારવાનું ટાળો. આ નાની બેદરકારી જીવલેણ સાબિત થઈ શકે છે.
બાળકો માટે સાવધાની: બાળકોને મોટા પૂલમાં લઈ જવાનું ટાળો. જો તેમને સાથે લઈ જવા જ પડે, તો ખાતરી કરો કે તેમના માટે અલગ અને સુરક્ષિત પૂલ હોય.
લપસણી સપાટીથી બચો: પૂલની આસપાસની જગ્યા અને કિનારીઓ ઘણીવાર લપસણી હોય છે, તેથી ઈજા ટાળવા માટે સાવચેતીપૂર્વક ચાલો.
લાઈફગાર્ડની હાજરી: હંમેશા એવા પૂલમાં જ જાવ જ્યાં લાઈફગાર્ડ હાજર હોય. તમે સંભાળી શકો તેના કરતા વધુ ઊંડા પાણીમાં ન જાવ.
સ્વચ્છતા: પૂલના પાણીમાં ક્લોરિન અને અન્ય રસાયણો હોય છે જે તમારી ત્વચા અને વાળને નુકસાન પહોંચાડી શકે છે. પૂલમાંથી બહાર આવ્યા બાદ સાબુ અને શેમ્પૂથી સારી રીતે સ્નાન કરો.