Modi Biden phone call Russia Ukraine: વડાપ્રધાન નરેન્દ્ર મોદીએ સોમવારે (26 ઑગસ્ટ, 2024) અમેરિકી રાષ્ટ્રપતિ જો બાઈડેન સાથે વાતચીત કરી. બંને નેતાઓની વાતચીત ફોન કૉલ પર થઈ અને આ દરમિયાન તેમણે મહત્વપૂર્ણ મુદ્દાઓ પર વિસ્તૃત ચર્ચા કરી. ભારતીય પીએમએ આ અંગે સોશિયલ મીડિયા પ્લેટફોર્મ એક્સ પર માહિતી આપી. તેમણે પોસ્ટમાં જણાવ્યું, "આજે મારી જો બાઈડેન સાથે ફોન પર વાત થઈ. અમે વિવિધ પ્રાદેશિક અને વૈશ્વિક મુદ્દાઓ પર ચર્ચા કરી, જેમાં યુક્રેનની સ્થિતિનો પણ સમાવેશ થાય છે. મેં શાંતિ અને સ્થિરતાની ઝડપી પુનઃસ્થાપના માટે ભારતનું સંપૂર્ણ સમર્થન ફરીથી દોહરાવ્યું છે."
વાતચીત દરમિયાન પીએમ મોદીએ જો બાઈડેનને તેમની તાજેતરની યુક્રેન મુલાકાત વિશે પણ જણાવ્યું. પીએમ મોદી અનુસાર, તેમણે જો બાઈડેન સાથે બાંગ્લાદેશની સ્થિતિ અંગે પણ ચર્ચા કરી અને ત્યાં સામાન્ય સ્થિતિની જલદી પુનઃસ્થાપના અને લઘુમતીઓ (ખાસ કરીને હિન્દુઓ)ની સુરક્ષા સુનિશ્ચિત કરવાની જરૂરિયાત પર ભાર મૂક્યો.
INDIA-US ભાગીદારી અંગે શું વાત થઈ?
નરેન્દ્ર મોદી અને જો બાઈડેન વચ્ચેની વાતચીત દરમિયાન ભારતીય પીએમએ ભારત અમેરિકા ભાગીદારી પ્રત્યે અમેરિકી રાષ્ટ્રપતિની પ્રતિબદ્ધતાની પ્રશંસા કરી. બંને નેતાઓએ આ દરમિયાન એ વાત પર ભાર મૂક્યો કે ભારત અમેરિકા ભાગીદારીનો ઉદ્દેશ બંને દેશોના લોકો સાથે સમગ્ર માનવતાને લાભ પહોંચાડવાનો છે. બંને આ વાત પર સહમત થયા કે તેઓ ક્વાડ સહિત બહુપક્ષીય સહયોગને વધુ મજબૂત કરવાની પ્રતિબદ્ધતા દોહરાવે છે. તેઓ આ ઉપરાંત સતત સંપર્કમાં રહેવા પર પણ સહમત થયા.
યુક્રેન પર રશિયાનો તાજો હુમલો, 3નાં મોત
સૌથી રસપ્રદ વાત એ છે કે વિશ્વના બંને રાજકીય દિગ્ગજોની વાતચીત ત્યારે થઈ, જ્યારે થોડી વાર પહેલા જ યુક્રેનના રાષ્ટ્રપતિ વોલોડિમિર ઝેલેન્સ્કીએ દાવો કર્યો હતો કે રશિયા તરફથી તેમના દેશ પર 100 મિસાઈલો અને એટલા જ ડ્રોન છોડવામાં આવ્યા છે. યુક્રેનિયન એજન્સીઓ અને મીડિયાનો આરોપ છે કે રશિયન સેનાએ દેશના અનેક વિસ્તારોમાં મોટા પાયે મિસાઈલ અને ડ્રોન હુમલા કર્યા, જેમાં રાજધાની કીવનો પણ સમાવેશ થાય છે. હુમલાઓમાં ત્રણ લોકો મારયા ગયા અને અનેક લોકો ઘાયલ થયા. ત્યાંના રક્ષા મંત્રાલયે હુમલાની પુષ્ટિ કરી અને એક્સ પર પોસ્ટ કર્યું, "રશિયાએ અઠવાડિયાની શરૂઆત યુક્રેનિયન શહેરો પર મોટા પાયે મિસાઈલ હુમલાથી કરી. રશિયન આતંકને ખતમ કરવા માટે વિશ્વએ એક થવું જોઈએ." વાસ્તવમાં, રશિયા યુક્રેન વચ્ચે બે વર્ષથી ચાલી રહેલું યુદ્ધ હાલ થમતું જોવા મળતું નથી.
રશિયા અને યુક્રેનના યુદ્ધ પર ભારતનું આ રહ્યું વલણ
પીએમ નરેન્દ્ર મોદી તાજેતરમાં જ્યારે યુક્રેન ગયા હતા ત્યારે તેમણે ત્યાંના રાષ્ટ્રપતિ ઝેલેન્સ્કી સાથે મુલાકાત કરી હતી. તેમણે ત્યાં રશિયા મુલાકાતનો પણ ઉલ્લેખ કર્યો હતો અને જણાવ્યું હતું કે રશિયન રાષ્ટ્રપતિ વ્લાદિમીર પુતિનની આંખમાં આંખ નાખીને તેમણે (પીએમ મોદીએ) શું કહ્યું હતું? પીએમએ કહ્યું હતું કે કોઈપણ સમસ્યાનો ઉકેલ યુદ્ધભૂમિમાં નથી આવતો, સમાધાનનો માર્ગ વાતચીતથી જ નીકળે છે, સંવાદ અને કૂટનીતિથી નીકળે છે અને આપણે સમય ગુમાવ્યા વિના તે દિશામાં આગળ વધવું જોઈએ. જો કે, તેમની આ મુલાકાત 1991માં યુક્રેન સ્વતંત્ર થયા પછી કોઈ ભારતીય પીએમની પ્રથમ યુક્રેન મુલાકાત રહી. પીએમ નરેન્દ્ર મોદીએ કહ્યું કે રશિયા યુક્રેન યુદ્ધ દરમિયાન ભારત 'તટસ્થ કે ઉદાસીન પ્રેક્ષક' નહોતું રહ્યું. તે હંમેશા શાંતિના પક્ષમાં રહ્યું છે.