india monsoon 2026 update: દેશભરમાં હવે ચોમાસાએ બરાબરની ગતિ પકડી લીધી છે. હવામાન વિભાગે સોમવારે (22 જૂન, 2026) આપેલી લેટેસ્ટ માહિતી મુજબ, દક્ષિણ-પશ્ચિમ ચોમાસું હવે મહારાષ્ટ્ર, કર્ણાટક, તેલંગાણાથી લઈને છત્તીસગઢ, ઓડિશા, ઝારખંડ અને બિહારના કેટલાક ભાગોમાં પ્રવેશી ચૂક્યું છે. એક તરફ કેરળ, પૂર્વોત્તર અને દક્ષિણ ભારતમાં વરસાદ જમાવટ કરી રહ્યો છે, ત્યારે હવે સૌની નજર ઉત્તર ભારત અને ખાસ કરીને દિલ્હી-NCR પર ટકેલી છે કે ત્યાં મેઘરાજા ક્યારે મહેર કરશે અને લોકોને આકરી ગરમીમાંથી છુટકારો અપાવશે.
અત્યારે ક્યાં પહોંચી છે ચોમાસાની લાઇન?
હવામાન વિભાગના જણાવ્યા પ્રમાણે, અત્યારે ચોમાસાની ઉત્તરીય સીમા અલીબાગ, પુણે, નિઝામાબાદ, દાંતેવાડા, બાલનગીર, સુંદરગઢ, ચતરા, ગયા અને મુઝફ્ફરપુર પરથી પસાર થઈને મધ્ય અરબી સમુદ્ર તરફ આગળ વધી રહી છે. આ લાઇન છેક નેપાળની બોર્ડરની નજીક પહોંચી ગઈ છે, જેનો સીધો મતલબ એ છે કે બિહારનો મોટો વિસ્તાર હવે વરસાદની ઝપેટમાં આવી ગયો છે અને ત્યાં ચોમાસું સક્રિય થઈ ગયું છે.
આગામી 48 કલાક કેવા રહેશે?
આગામી 48 કલાકની આગાહી કરતા હવામાન વિભાગે જણાવ્યું છે કે, ચોમાસું વધુ આગળ વધે તે માટે હાલ વાતાવરણ એકદમ અનુકૂળ છે. આનાથી મુંબઈ સહિત મહારાષ્ટ્રના બાકીના વિસ્તારોને મોટો ફાયદો થશે. એટલું જ નહીં, આવતા 2 દિવસમાં તેલંગાણા, ઓડિશા, છત્તીસગઢ, ઝારખંડ અને બિહારના બાકી રહેલા વિસ્તારોમાં પણ ચોમાસાની અસર જોવા મળી શકે છે અને સારો એવો વરસાદ પડી શકે છે.
આ પણ વાંચોઃ ગુજરાતના આ 5 જિલ્લાઓમાં વરસાદ તૂટી પડ્યો, અમરેલીમાં સતત 5માં દિવસે પૂર જેવી સ્થિતિ?
દિલ્હી-NCR ના લોકોએ હજુ કેટલી રાહ જોવી પડશે?
હવે સૌથી મોટો સવાલ એ છે કે દિલ્હી-NCR ના રહેવાસીઓ માટે વરસાદ ક્યારે આવશે? હવામાન વિભાગના રેકોર્ડ પ્રમાણે, દિલ્હીમાં ચોમાસું બેસવાની સામાન્ય તારીખ 27 થી 29 જૂન, 2026 ની આસપાસ રહેલી છે. એટલે કે, બિહાર અને ઝારખંડમાં ભલે વરસાદની એન્ટ્રી થઈ ગઈ હોય, પણ દિલ્હીવાસીઓએ હજુ થોડા દિવસો કાગડોળે રાહ જોવી પડશે. જોકે, આ એક અંદાજિત તારીખ છે અને હવામાન વિભાગ આગામી દિવસોમાં દિલ્હી-NCR ના હવામાન અંગે અલગથી નવું અપડેટ આપી શકે છે.
દેશના બાકીના વિસ્તારોની સ્થિતિ
હાલની વાત કરીએ તો, કેરળ, દક્ષિણ ભારત અને પૂર્વોત્તર ભારતમાં ચોમાસું પહેલેથી જ પહોંચી ગયું છે. મધ્ય ભારતની વાત કરીએ તો મુંબઈ, પુણે અને નિઝામાબાદ બેલ્ટમાં પણ ચોમાસું તેના નિર્ધારિત સમયની આસપાસ જ પહોંચી ગયું છે. હવે આખા દેશની નજર એ વાત પર છે કે ઉત્તર ભારતના બાકીના રાજ્યોને મેઘરાજા કેટલી ઝડપથી કવર કરે છે.
આ પણ વાંચોઃ ગુજરાતમાં મેઘરાજાની ધબધબાટી: 10 કલાકમાં 38 તાલુકા ભીંજાયા, જુઓ ક્યાં કેટલો પડ્યો વરસાદ