PM Modi reaction Bengal: પશ્ચિમ બંગાળ અને અસમ વિધાનસભા ચૂંટણી 2026 ના પરિણામોમાં ભારતીય જનતા પાર્ટી (BJP) એ પ્રચંડ બહુમતી સાથે શાનદાર જીત નોંધાવી છે. આ ઐતિહાસિક વિજય બાદ વડાપ્રધાન નરેન્દ્ર મોદીની પહેલી પ્રતિક્રિયા સામે આવી ગઈ છે. પીએમ મોદીએ આ બંને રાજ્યોમાં મળેલા ભવ્ય જનાદેશ માટે જનતાનો આભાર માન્યો છે અને પાર્ટીના તમામ નાના-મોટા કાર્યકરોને દિલથી અભિનંદન પાઠવ્યા છે. ખાસ કરીને બંગાળમાં પહેલીવાર ભાજપની સરકાર બનવા જઈ રહી છે, જેને લઈને પીએમ મોદી ખૂબ જ ઉત્સાહિત જોવા મળ્યા.
વડાપ્રધાન મોદીએ સોશિયલ મીડિયા પર પોતાની ખુશી વ્યક્ત કરતા લખ્યું છે કે, "પશ્ચિમ બંગાળમાં આખરે કમળ ખીલ્યું છે! 2026 ની પશ્ચિમ બંગાળ વિધાનસભા ચૂંટણી હંમેશા યાદ રાખવામાં આવશે. આ લોકોની શક્તિનો વિજય છે અને ભાજપની સુશાસનની રાજનીતિની જીત છે. હું પશ્ચિમ બંગાળના દરેક નાગરિકને હૃદયપૂર્વક સલામ કરું છું."
બંગાળની જનતાને ખાતરી આપતા તેમણે વધુમાં ઉમેર્યું કે, "લોકોએ ભાજપને પ્રચંડ જનાદેશ આપ્યો છે, અને હું તેમને વિશ્વાસ અપાવું છું કે અમારી પાર્ટી પશ્ચિમ બંગાળના લોકોના સપના અને આકાંક્ષાઓને પૂરા કરવા માટે પોતાના તમામ પ્રયાસો લગાવી દેશે. અમે એક એવી સરકાર આપીશું જે સમાજના તમામ વર્ગો માટે નવી તકો અને સન્માન સુનિશ્ચિત કરે."
પોતાની આગામી પોસ્ટમાં પીએમ મોદીએ પાર્ટીના કાર્યકરોના સંઘર્ષને યાદ કરતા ભાવુક સંદેશ આપ્યો હતો. તેમણે લખ્યું, "પશ્ચિમ બંગાળમાં ભાજપનો આ રેકોર્ડબ્રેક વિજય પેઢી દર પેઢીના અસંખ્ય કાર્યકરોના અથાક પ્રયત્નો અને સંઘર્ષ વિના ક્યારેય શક્ય ન હોત. હું તે તમામ કાર્યકરોને સલામ કરું છું. વર્ષોથી તેમણે પાયાના સ્તરે રહીને સખત મહેનત કરી છે, તમામ પ્રકારની મુશ્કેલીઓનો સામનો કર્યો છે અને અમારા વિકાસના એજન્ડાને લોકો સુધી પહોંચાડ્યો છે. આ કાર્યકરો જ અમારી પાર્ટીની ખરી તાકાત છે."
દેશની 70% વસ્તી પર હવે ભાજપનું રાજ? બંગાળની જીત સાથે બદલાયો ભારતનો રાજકીય નકશો