Sonam Wangchuk health update: લદ્દાખના અધિકારો માટે દિલ્હીના જંતર-મંતર ખાતે છેલ્લા 21 દિવસથી અચોક્કસ મુદતની ભૂખ હડતાળ પર બેઠેલા જાણીતા સામાજિક કાર્યકર અને શિક્ષણવિદ સોનમ વાંગચુકની તબિયત હવે ગંભીર બની રહી છે. શનિવારે (18 જુલાઈ) સવારે તેમની તબિયત અચાનક લથડતાં દિલ્હી પોલીસ તેમને બળજબરીથી જંતર-મંતરથી હટાવીને સફદરજંગ હોસ્પિટલમાં લઈ ગઈ હતી, જેને પગલે ત્યાં થોડા સમય માટે અફરાતફરીનું વાતાવરણ સર્જાયું હતું. જોકે, હોસ્પિટલમાં દાખલ થયા બાદ પણ વાંગચુકે કોઈપણ પ્રકારની તબીબી સારવાર લેવાનો સ્પષ્ટ ઇનકાર કરી દીધો છે, જેનાથી ડોક્ટરોની અને તેમના સમર્થકોની ચિંતામાં મોટો વધારો થયો છે.
ડોક્ટરોએ આપી ગંભીર ચેતવણી
સફદરજંગ હોસ્પિટલના ડોક્ટરોએ વાંગચુકના હેલ્થ અપડેટ વિશે વિસ્તૃત માહિતી આપતા જણાવ્યું છે કે, લાંબા સમયથી ભૂખ્યા રહેવાને કારણે તેમના શરીરમાં ડીહાઈડ્રેશનના ગંભીર લક્ષણો જોવા મળી રહ્યા છે. તેમની સ્થિતિ વધુ બગડતી અટકાવવા અને ભવિષ્યની કોઈ ગંભીર શારીરિક ગૂંચવણોથી બચાવવા માટે તેમને તાત્કાલિક મોં વાટે અથવા નસ દ્વારા (IV) પ્રવાહી અને ઈલેક્ટ્રોલાઈટ થેરાપી આપવી અત્યંત જરૂરી છે. ભલે તેઓ હાલમાં સભાન હોય અને તેમના પલ્સ રેટ, બ્લડ પ્રેશર તેમજ ઓક્સિજન લેવલ સામાન્ય (સ્થિર) હોય, પરંતુ તાત્કાલિક સારવાર શરૂ કરવી અનિવાર્ય છે.
AIIMS ના નિષ્ણાતોનું પણ એ જ તારણ
પરિસ્થિતિની નાજુકતાને જોતા નવી દિલ્હીની AIIMS ના એક નિષ્ણાત ડોક્ટરે પણ તેમની સ્વતંત્ર રીતે તપાસ કરી છે. આ તપાસ બાદ તેઓ પણ સફદરજંગ હોસ્પિટલના ડોક્ટરોના નિદાન સાથે સંપૂર્ણપણે સંમત થયા છે. હવે AIIMS ના ડોક્ટર પણ વાંગચુકની સારવાર અને દેખરેખ રાખતી ટીમમાં જોડાઈ ગયા છે અને તેમના સ્વાસ્થ્ય પર સતત નજર રાખી રહ્યા છે.
સારવાર લેવાનો સોનમ વાંગચુકનો સ્પષ્ટ ઇનકાર
આ સમગ્ર મામલે સૌથી મોટી મુશ્કેલી એ ઊભી થઈ છે કે, હોસ્પિટલના ડોક્ટરો અને AIIMS ના નિષ્ણાતોના વારંવાર સમજાવવા છતાં, સોનમ વાંગચુકે IV પ્રવાહી, ORS (ઓરલ રીહાઇડ્રેશન સોલ્યુશન) કે અન્ય કોઈપણ પ્રકારની દવા લેવાની ચોખ્ખી ના પાડી દીધી છે. એટલું જ નહીં, તેમના પરિવારે પણ હજુ સુધી આ સારવાર શરૂ કરવા માટે લેખિત મંજૂરી (સંમતિ) આપી નથી. હાલમાં મેડિકલ ટીમ તેમને અને તેમના પરિવારને સમજાવવાનો સતત પ્રયાસ કરી રહી છે, જેથી વહેલામાં વહેલી તકે સારવાર શરૂ કરીને તેમના સ્વાસ્થ્યને સુરક્ષિત રાખી શકાય.