Refrigerator Safety Tips: ઉનાળાની આ ભયંકર ગરમીમાં આપણે AC ફાટવાના અને તેને કારણે બિલ્ડીંગોમાં મોટી આગ લાગવાના ઘણા કિસ્સાઓ વિશે સાંભળ્યું છે. પણ શું તમે જાણો છો કે માત્ર AC જ નહીં, તમારા ઘરમાં મૂકેલું રેફ્રિજરેટર (ફ્રિજ) પણ ગમે ત્યારે ફાટી શકે છે? જી હા, ગરમીની ઋતુમાં ફ્રિજ બ્લાસ્ટ થવાનું જોખમ ઘણું વધી જાય છે. જો તમને આ વિશે ખ્યાલ નથી, તો આજે અમે તમને જણાવીશું કે ફ્રિજ શા માટે ફાટે છે અને કેટલીક સરળ સાવચેતીઓ રાખીને તમે આ ખતરનાક અકસ્માતને કેવી રીતે ટાળી શકો છો.
આ કારણોસર તમારું ફ્રિજ બની શકે છે બોમ્બ:
ઘરમાં રહેલું ફ્રિજ ગમે ત્યારે મોટો અકસ્માત સર્જી શકે છે, ચાલો સમજીએ તેના મુખ્ય કારણો:
વધુ પડતી ગરમી (ઓવરહીટિંગ): ઉનાળામાં તાપમાન પહેલેથી જ ખૂબ વધારે હોય છે, જેના કારણે ફ્રિજને અંદરથી ઠંડુ રાખવા તેના કોમ્પ્રેસરને બમણી મહેનત કરવી પડે છે. આનાથી કોમ્પ્રેસર વધુ ગરમ થાય છે અને ફાટવાનું જોખમ વધી જાય છે.
હવા-ઉજાસનો અભાવ (વેન્ટિલેશન): આપણે ઘણીવાર ફ્રિજને દીવાલને સાવ અડીને કે એવી સાંકડી જગ્યામાં મૂકી દઈએ છીએ જ્યાં પાછળના ભાગમાં હવા જઈ શકતી નથી. પૂરતું વેન્ટિલેશન ન મળવાથી કોમ્પ્રેસર ગરમ થાય છે.
વોલ્ટેજમાં વધઘટ: ઘરમાં આવતી વીજળીના વોલ્ટેજમાં જો વારંવાર વધઘટ થતી રહે, તો તે ફ્રિજના કોમ્પ્રેસર માટે જોખમી બની શકે છે અને બ્લાસ્ટ પણ થઈ શકે છે.
ગેસ લીકેજ: ક્યારેક ફ્રિજમાંથી ગેસ લીક થતો હોય છે અને આપણે તેના પર ધ્યાન આપતા નથી. આ લીકેજ ભયાનક વિસ્ફોટનું કારણ બની શકે છે.
ખામીયુક્ત વાયરિંગ: ઘણી વાર ફ્રિજના વાયરિંગમાં કોઈ ખામી હોય અથવા આપણે તેને એવા પ્લગ કે સોકેટમાં લગાવી દઈએ છીએ જે ફ્રિજનો લોડ ખેંચી શકતું નથી, ત્યારે શોર્ટ સર્કિટ થવાની શક્યતા વધી જાય છે.
ફ્રીજમાં રાખેલો લોટ એટલે જાણે બેક્ટેરિયાનું ઘર! ઉનાળામાં ભૂલથી પણ ના કરશો આ કામ
ઉનાળામાં આ રીતે રાખો તમારા ફ્રિજની સંભાળ:
જેવી રીતે તમે AC ને બગડતું કે ફાટતું અટકાવવા તેની કાળજી લો છો, તેવી જ રીતે ફ્રિજનું પણ ધ્યાન રાખવું જોઈએ. આ રહી કેટલીક સરળ ટિપ્સ:
દીવાલથી દૂર રાખો: ફ્રિજને હંમેશા એવી જગ્યાએ મૂકો જ્યાં હવાની સારી અવરજવર હોય. તેને દીવાલથી ઓછામાં ઓછું 4 થી 6 ઇંચ દૂર રાખવું જોઈએ.
ગરમીથી બચાવો: ફ્રિજ પર સીધો તડકો ન પડવો જોઈએ. તેને ગેસ સ્ટોવ કે અન્ય કોઈ ગરમ વસ્તુની નજીક ક્યારેય ન મૂકો.
સફાઈ જરૂરી છે: ફ્રિજની પાછળ આવેલી કન્ડેન્સર કોઇલ પર ધૂળ જામવા ન દો. ધૂળના થર જામવાથી ફ્રિજ જલ્દી ગરમ થઈ જાય છે.
ખીચોખીચ ન ભરો: ફ્રિજમાં વધુ પડતો સામાન ઠાંસી-ઠાંસીને ન ભરો. અંદર ઠંડી હવા ફરવા માટે જગ્યા હોવી જરૂરી છે, નહીં તો કોમ્પ્રેસર પર લોડ પડશે.
વારંવાર દરવાજો ન ખોલો: ફ્રિજનો દરવાજો વારંવાર ખોલ-બંધ કરવાથી અંદરની ઠંડક બહાર જતી રહે છે, જેથી તાપમાન જાળવી રાખવા કોમ્પ્રેસરે વધારે કામ કરવું પડે છે.
સ્ટેબિલાઇઝર લગાવો: વોલ્ટેજની વધઘટથી બચવા હંમેશા સારા સ્ટેબિલાઇઝર અથવા સર્જ પ્રોટેક્ટરનો ઉપયોગ કરો. અચાનક આવતો હાઈ વોલ્ટેજ ફ્રિજને બાળી શકે છે.
અવાજ અને ગંધ પર ધ્યાન આપો: જો ફ્રિજમાંથી કોઈ વિચિત્ર કે મોટો અવાજ આવે, બળવાની ગંધ આવે કે તણખા ઝરતા દેખાય, તો તેને જરાય અવગણશો નહીં. તરત જ સ્વીચ બંધ કરો અને ટેકનિશિયનને બોલાવો.
નિયમિત સર્વિસિંગ: વર્ષમાં ઓછામાં ઓછી 1 વાર ફ્રિજની સર્વિસ ચોક્કસ કરાવો. તેમાં વાયરિંગ અને ગેસ લીકેજની ખાસ તપાસ કરાવવી જોઈએ.