લગ્ન પહેલા શારીરિક સંબંધો બાંધતા સાવધાન! સુપ્રીમ કોર્ટે કહ્યું કોઈ પર વિશ્વાસ ન કરો

સુપ્રીમ કોર્ટે લગ્નની ખોટી લાલચ અને શારીરિક સંબંધો અંગે મોટી ચેતવણી આપી છે. લગ્ન પહેલા અજાણ્યા વ્યક્તિ પર વિશ્વાસ ન કરવા અને કોર્ટની કડક ટિપ્પણીની સંપૂર્ણ વિગત અહીં જાણો.

Supreme Court

Source : ANI

Show Quick Read

Key points generated by AI, verified by newsroom

સુપ્રીમ કોર્ટમાં સોમવાર, 16 ફેબ્રુઆરીના રોજ લગ્નની ખોટી લાલચ આપીને દુષ્કર્મ આચરવાના એક ગંભીર કેસની જામીન અરજી પર સુનાવણી ચાલી રહી હતી. આ દરમિયાન જસ્ટિસ બી.વી. નાગરત્ના અને જસ્ટિસ ઉજ્જવલ ભુયાનની બેન્ચે લગ્ન પૂર્વેના શારીરિક સંબંધો અંગે કડક વલણ અપનાવતા આજની યુવા પેઢીને મોટી ચેતવણી આપી છે. કોર્ટે સ્પષ્ટ શબ્દોમાં કહ્યું છે કે લગ્ન પહેલા યુવક અને યુવતી એકબીજા માટે તદ્દન અજાણ્યા જ ગણાય, તેથી આવા સંબંધો બાંધતા પહેલા અત્યંત સાવધાની રાખવી જોઈએ અને કોઈના પર આંધળો વિશ્વાસ મૂકવો જોઈએ નહીં.

ઓનલાઈન વેબસાઈટ પરથી શરૂ થઈ હતી મુલાકાત

કોર્ટ સમક્ષ રજૂ કરવામાં આવેલી વિગતો અનુસાર, 30 વર્ષીય પીડિત મહિલા વર્ષ 2022 માં એક જીવનસાથી શોધતી મેટ્રિમોનિયલ વેબસાઈટ મારફતે આરોપીના સંપર્કમાં આવી હતી. આરોપી યુવકે આ મહિલાને લગ્નની પાકી ખાતરી આપી હતી અને ત્યારબાદ તેને દિલ્હી અને દુબઈ બોલાવીને તેની સાથે અનેકવાર શારીરિક સંબંધો પ્રસ્થાપિત કર્યા હતા.

દુબઈમાં અંગત પળોના વીડિયો ઉતારી બ્લેકમેલિંગનો આરોપ

ફરિયાદ પક્ષના વકીલના દાવા મુજબ, આરોપી યુવકે દુબઈમાં પીડિતાની મરજી વિરુદ્ધ તેના અંગત વીડિયો પણ રેકોર્ડ કરી લીધા હતા. જ્યારે મહિલા આ બાબતે વિરોધ કરતી ત્યારે તેને આ વીડિયો વાયરલ કરી દેવાની ધમકીઓ મળતી હતી. આ ઘટનામાં મોટો વળાંક ત્યારે આવ્યો જ્યારે પીડિતાને જાણવા મળ્યું કે આરોપી અગાઉથી જ પરણેલો હતો અને તેણે જાન્યુઆરી 2024 માં પંજાબમાં અન્ય એક યુવતી સાથે પણ લગ્ન કરી લીધા છે.

જસ્ટિસ નાગરત્નાના ધારદાર સવાલો

સુનાવણી દરમિયાન જસ્ટિસ નાગરત્નાએ ફરિયાદી મહિલાના વકીલને સીધો પ્રશ્ન કર્યો હતો કે જો તે મહિલા લગ્ન માટે આટલી ગંભીર હતી તો તે લગ્ન પહેલા જ યુવકને મળવા દુબઈ શા માટે ગઈ? ન્યાયાધીશે ટિપ્પણી કરતા કહ્યું કે કદાચ અમારા વિચારો જૂના જમાનાના લાગી શકે, પરંતુ સંબંધોમાં ગમે તેટલા ઉતાર ચઢાવ આવે તો પણ લગ્ન પહેલા આવા શારીરિક સંબંધો કેવી રીતે બાંધી શકાય તે સમજી શકાતું નથી.

આગામી સુનાવણી બુધવારે હાથ ધરાશે

સુપ્રીમ કોર્ટે બંને પક્ષોની દલીલો સાંભળ્યા બાદ આ મામલાને પરસ્પર સંમતિથી ઉકેલવા માટે મધ્યસ્થી કેન્દ્રમાં મોકલવાનો નિર્દેશ આપ્યો છે. કોર્ટે નોંધ્યું હતું કે જ્યા બંને પક્ષની સંમતિથી સંબંધો બંધાયા હોય ત્યાં સીધી જ શિક્ષાત્મક કાર્યવાહીના બદલે સમાધાનનો માર્ગ વિચારવો જોઈએ. હવે આ કેસની વધુ કાનૂની કાર્યવાહી અને સુનાવણી આગામી બુધવારે હાથ ધરવામાં આવશે.

આ પણ વાંચો

શું ભારતે રશિયા પાસેથી તેલ ન ખરીદવાનું વચન આપ્યું? મ્યુનિકમાં એસ. જયશંકરે ખોલ્યા પત્તા!