new airlines approval India: ભારતીય આકાશમાં હવે ટૂંક સમયમાં નવા વિમાનો ઉડતા જોવા મળશે. ભારતીય એવિએશન સેક્ટર (Aviation Sector) માં પ્રવર્તમાન મોનોપોલી તોડવા અને મુસાફરોને વધુ વિકલ્પો પૂરા પાડવા માટે મોદી સરકારે એક મોટો નિર્ણય લીધો છે. કેન્દ્ર સરકારે ત્રણ નવી એરલાઇન્સને સંચાલન માટે મંજૂરી આપી દીધી છે. આ નિર્ણયનો સીધો હેતુ બજારમાં સ્પર્ધા વધારવાનો અને કનેક્ટિવિટી સુધારવાનો છે. આ સાથે જ, જો કોઈ ઉદ્યોગસાહસિક પોતાની એરલાઇન શરૂ કરવા ઈચ્છતા હોય, તો સરકાર દ્વારા તેની પ્રક્રિયા પણ નક્કી કરવામાં આવી છે.
કઈ ત્રણ કંપનીઓને મળી મંજૂરી?
કેન્દ્રીય નાગરિક ઉડ્ડયન મંત્રી (Civil Aviation Minister) રામ મોહન નાયડુએ તાજેતરમાં પુષ્ટિ કરી છે કે સરકારે ત્રણ નવી એરલાઇન્સને લીલીઝંડી આપી છે. જેમાં 'શંખ એર' (Shankh Air) ને મંત્રાલય તરફથી અગાઉ જ નો ઓબ્જેક્શન સર્ટિફિકેટ (NOC) મળી ચૂક્યું હતું. જ્યારે હવે 'અલ હિંદ એર' (Alhind Air) અને 'ફ્લાયએક્સપ્રેસ' (FlyExpress) ને પણ આ અઠવાડિયે સૈદ્ધાંતિક મંજૂરી મળી ગઈ છે. હવે આ ત્રણેય કંપનીઓ આગળની પ્રક્રિયા માટે ડિરેક્ટોરેટ જનરલ ઓફ સિવિલ એવિએશન (DGCA) પાસે જશે.
સ્પર્ધા વધશે, ટિકિટના ભાવ ઘટશે
ભારત વિશ્વના સૌથી ઝડપથી વિકસતા એવિએશન માર્કેટ્સમાંનું એક છે. અત્યારે બજારમાં ઈન્ડિગો જેવી જૂજ કંપનીઓનું વર્ચસ્વ છે. સરકાર ઈચ્છે છે કે બજારમાં તંદુરસ્ત સ્પર્ધા થાય, જેથી મુસાફરોને સસ્તા દરે ટિકિટ મળી રહે. સરકારની 'ઉડાન યોજના' (UDAN Scheme) હેઠળ સ્ટાર એર અને ફ્લાય91 જેવી નાની કંપનીઓ સફળ રહી છે. હવે નવી કંપનીઓના આગમનથી ખાસ કરીને નાના શહેરો વચ્ચેની કનેક્ટિવિટી (Connectivity) વધુ મજબૂત બનશે.
નવી એરલાઇન શરૂ કરવા માટેની પ્રક્રિયા શું છે?
જો કોઈ ભારતીય કંપની કે વ્યક્તિ એરલાઇન બિઝનેસ (Airline Business) શરૂ કરવા માંગતી હોય, તો તેના માટે સરકારે ચોક્કસ માર્ગદર્શિકા નક્કી કરેલી છે:
NOC મેળવવું: સૌપ્રથમ નાગરિક ઉડ્ડયન મંત્રાલય પાસેથી 'નો ઓબ્જેક્શન સર્ટિફિકેટ' માટે અરજી કરવી પડે છે. આ માટે અરજદાર ભારતીય હોવા જોઈએ અને તેમની પાસે સરકાર દ્વારા નક્કી કરેલી લઘુત્તમ મૂડી (Capital) હોવી જોઈએ.
ફ્લીટ પ્લાનિંગ: તમારી પાસે વિમાનોનો કાફલો (Fleet) અને ભવિષ્યનું આયોજન તૈયાર હોવું જોઈએ.
DGCA ની મંજૂરી: સૌથી મહત્ત્વનો તબક્કો 'એર ઓપરેટર સર્ટિફિકેટ' (Air Operator Certificate) મેળવવાનો છે. DGCA તમારી સુરક્ષા વ્યવસ્થા, પાયલટ ટ્રેનિંગ, મેન્ટેનન્સ અને ઓપરેશનલ ક્ષમતાની ઝીણવટભરી તપાસ કર્યા બાદ જ આ લાયસન્સ આપે છે.
ટાયર-2 અને ટાયર-3 શહેરો પર ફોકસ
નવી આવનારી એરલાઇન્સ મોટા મેટ્રો સિટીને બદલે પ્રાદેશિક કનેક્ટિવિટી પર વધુ ભાર મૂકી રહી છે. ઉદાહરણ તરીકે, શંખ એર ઉત્તર પ્રદેશ સ્થિત છે અને તે શરૂઆતમાં લખનૌ, વારાણસી, અયોધ્યા, ઈન્દોર અને દેહરાદૂન જેવા શહેરોને જોડશે. આ દર્શાવે છે કે યોગ્ય બિઝનેસ પ્લાન સાથે ઉડ્ડયન ક્ષેત્રમાં નવી કંપનીઓ માટે ઉજળી તકો રહેલી છે.