અમેરિકી સુપ્રીમ કોર્ટનો ટ્રમ્પને ઝટકો: ભારત માટે ખુલશે ફાયદાના દ્વાર, નિકાસકારોને મળશે મોટી રાહત
યુએસ સુપ્રીમ કોર્ટે ડોનાલ્ડ ટ્રમ્પના મનસ્વી ટેરિફ રદ કરતા ભારતીય નિકાસકારોને મોટી રાહત મળી છે. જાણો ટેક્સટાઈલ, જેમ્સ અને આઈટી સેક્ટર પર આ ઐતિહાસિક નિર્ણયની શું અસર થશે.
US Supreme Court Trump Tariff Ruling: અમેરિકામાં યોજાનારી મધ્યસત્ર ચૂંટણી પહેલા રાષ્ટ્રપતિ ડોનાલ્ડ ટ્રમ્પને ન્યાયતંત્ર તરફથી મોટો આંચકો લાગ્યો છે. શુક્રવારે (20 February, 2026) યુએસ સુપ્રીમ કોર્ટે એક ઐતિહાસિક ચુકાદો આપતા IEEPA (International Emergency Economic Powers Act) હેઠળ લાદવામાં આવેલા વ્યાપક ટેરિફને ગેરકાયદેસર ઠેરવી રદ કર્યા છે. કોર્ટે સ્પષ્ટ કર્યું છે કે રાષ્ટ્રપતિ પાસે કોંગ્રેસની મંજૂરી વિના આવા મનસ્વી ટેરિફ લાદવાની બંધારણીય સત્તા નથી. આ નિર્ણયથી ભારત અને અમેરિકા વચ્ચેના વેપાર સંબંધોમાં સ્થિરતા આવશે અને લાંબા સમયથી અનિશ્ચિતતાનો સામનો કરી રહેલા ભારતીય નિકાસકારો માટે આશાનું નવું કિરણ જાગ્યું છે.
ભારતીય નિકાસકારો માટે કેમ આ 'ગેમ ચેન્જર' છે?
અત્યાર સુધી ટ્રમ્પ વહીવટીતંત્ર દ્વારા અચાનક લાદવામાં આવતા ટેરિફને કારણે ભારતીય વેપારીઓમાં ભયનો માહોલ હતો. ખાસ કરીને એન્જિનિયરિંગ ગુડ્સ, ઓટો પાર્ટ્સ, કેમિકલ્સ, ટેક્સટાઈલ (કાપડ) અને જ્વેલરી જેવા મુખ્ય ક્ષેત્રોને મોટું આર્થિક નુકસાન વેઠવું પડતું હતું. સુપ્રીમ કોર્ટના આ આદેશ બાદ:
- વેપારમાં રહેલી અસ્થિરતા અને જોખમોમાં નોંધપાત્ર ઘટાડો થશે.
- નિકાસકારો માટે યુએસ માર્કેટમાં 'બિઝનેસ પ્લાનિંગ' કરવું સરળ બનશે.
- જે કંપનીઓએ અગાઉ આકરા ટેરિફ ચૂકવ્યા છે, તેમને હવે રિફંડ મળવાની પણ શક્યતા સેવાઈ રહી છે.
વાટાઘાટોમાં ભારતનો પક્ષ મજબૂત થશે
અત્યાર સુધી ટ્રમ્પ પોતાની મનસ્વીતાથી ટેરિફ નક્કી કરતા હતા, પરંતુ હવે આ સત્તા ફરીથી 'યુએસ કોંગ્રેસ' હસ્તક આવતા વેપાર નીતિ કાયદાકીય માળખામાં પરત ફરી છે. હવે કોઈપણ નવા ટેરિફ લાદતા પહેલા યોગ્ય તપાસ અને ચર્ચા અનિવાર્ય બનશે. ભારત માટે આ એક સુવર્ણ તક છે કારણ કે હવે વાટાઘાટો વધુ વ્યવસ્થિત અને પારદર્શક બનશે. માર્ચમાં ભારત અને અમેરિકા વચ્ચે વચગાળાના વેપાર કરાર પર હસ્તાક્ષર થવાની અપેક્ષા છે, જેમાં ભારત માટે ટેરિફ દર ઘટાડીને 18% કરવાની જોગવાઈ પહેલેથી જ વિચારણા હેઠળ છે.
સ્ટીલ અને એલ્યુમિનિયમ પર સ્થિતિ યથાવત
જોકે, ભારતીય સ્ટીલ અને એલ્યુમિનિયમ ઉદ્યોગ માટે રાહતના સમાચાર મર્યાદિત છે. સુપ્રીમ કોર્ટનો આ નિર્ણય 1962 ના ટ્રેડ એક્સપાન્શન એક્ટની કલમ 232 (Section 232) હેઠળ લાદવામાં આવેલા ટેરિફને અસર કરશે નહીં. એટલે કે, રાષ્ટ્રીય સુરક્ષાના આધારે સ્ટીલ, એલ્યુમિનિયમ અને અમુક ઓટોમોબાઈલ વસ્તુઓ પર લાદવામાં આવેલા ટેક્સ હાલ પૂરતા યથાવત રહેશે.
વૈશ્વિક સપ્લાય ચેઈનમાં ભારતનું વર્ચસ્વ વધશે
ચીન, કેનેડા અને મેક્સિકો જેવા દેશો પર પણ ટ્રમ્પે ઉંચા ટેરિફ લાદ્યા હતા, જેમાં હવે રાહત મળતા વૈશ્વિક બજારમાં સ્પર્ધા વધશે. નિષ્ણાતો માને છે કે ટ્રમ્પ યુગના કડક નિયમો હળવા થવાથી ભારતીય ઉત્પાદકોને ફાયદો થશે. ઘણી આંતરરાષ્ટ્રીય કંપનીઓ હવે જોખમી સ્ત્રોતો પર નિર્ભરતા ઘટાડીને ભારત તરફ વળશે, જે ભારતની કુલ નિકાસમાં જંગી વધારો કરી શકે છે.
ટોપ સ્ટોરી
ટ્રેન્ડિંગ સમાચાર
