Delhi-Jaipur Vande Bharat Express: ભારતીય રેલવે મુસાફરોની સુવિધા માટે દેશના વિવિધ રૂટ પર નવી વંદે ભારત એક્સપ્રેસ ચલાવવાનો સતત પ્રયાસ કરી રહી છે. આજે દિલ્હી અને જયપુરના મુસાફરોની વંદે ભારત ટ્રેનની રાહનો અંત આવવાનો છે. પીએમ મોદી આજે એટલે કે 12 એપ્રિલ, 2023ના રોજ રાજસ્થાનની પ્રથમ વંદે ભારત ટ્રેનને લીલી ઝંડી આપવાના છે. પીએમ મોદી સવારે 11 વાગ્યે રાજસ્થાનના જયપુરથી દિલ્હી માટે આ રૂટ પરની પ્રથમ વંદે ભારત ટ્રેનને રવાના કરશે. પીએમ આ ટ્રેનને દિલ્હીથી વીડિયો કોન્ફરન્સિંગ દ્વારા રવાના કરશે.
આ વંદે ભારત ટ્રેનનો રૂટ કેવો હશે
દિલ્હી જયપુર વંદે ભારત ટ્રેનની નિયમિત સેવા 13 એપ્રિલ, 2023થી શરૂ થશે. જયપુરથી જનારી આ ટ્રેન અલવર અને ત્યારબાદ હરિયાણાના ગુરુગ્રામમાં 2-2 મિનિટ રોકાશે. પીએમઓનું કહેવું છે કે આ ટ્રેન રાજસ્થાનના મુખ્ય પ્રવાસન સ્થળોને જોડવામાં મદદ કરશે. આ ટ્રેન અજમેરથી દિલ્હી કેન્ટ વચ્ચે માત્ર 5.15 કલાકમાં મુસાફરી કરશે. અગાઉ શતાબ્દી આ રૂટ પર 6.15 કલાકમાં પહોંચતી હતી. આવી સ્થિતિમાં આ રૂટ પર મુસાફરોનો સમય અગાઉની સરખામણીમાં 60 મિનિટ એટલે કે એક કલાકની બચત થશે.
દિલ્હી-જયપુર-અજમેર વંદે ભારત એક્સપ્રેસ અન્ય વંદે ભારત ટ્રેનોની જેમ અઠવાડિયામાં 6 દિવસ દોડશે. આવતીકાલથી આ ટ્રેન નિયમિત રીતે ચલાવવામાં આવશે. આ ટ્રેન બુધવાર સિવાય દરરોજ દોડશે. ટ્રેન નંબર 20977 અજમેરથી સવારે 6.20 વાગ્યે ઉપડશે અને સવારે 7.50 વાગ્યે જયપુર, 9.35 વાગ્યે અલવર, સવારે 11.15 વાગ્યે ગુડગાંવ અને 11.35 વાગ્યે દિલ્હી કેન્ટ પહોંચશે. અને દિલ્હીથી તે ટ્રેન નંબર 20978 તરીકે 18.40 વાગ્યે ઉપડશે. આ પછી તે 18.51 વાગ્યે ગુડગાંવ, 20.17 વાગ્યે અલવર, 22.05 વાગ્યે જયપુર અને 23.55 વાગ્યે અજમેર પહોંચશે.
જયપુર-દિલ્હી વંદે ભારત ટ્રેનનું ભાડું કેટલું છે?
રેલવેએ જયપુર-દિલ્હી વંદે ભારત ટ્રેનનું ભાડું પણ જણાવ્યું છે. અજમેરથી જયપુર વચ્ચે ચેર કારનું ભાડું 505 રૂપિયા અને એક્ઝિક્યુટિવ માટે 970 રૂપિયા છે. જ્યારે જયપુરથી અલવર વચ્ચે ચેર કારનું ભાડું રૂ. 645 અને એક્ઝિક્યુટિવ ભાડું રૂ. 1,175 છે. જ્યારે જયપુરથી ગુરુગ્રામ વચ્ચેનું ભાડું 860 રૂપિયા છે અને એક્ઝિક્યુટિવનું ભાડું 1600 રૂપિયા છે. જ્યારે જયપુર અને દિલ્હી વચ્ચે ચેર કારનું ભાડું 880 રૂપિયા અને એક્ઝિક્યુટિવ ભાડું 1,650 રૂપિયા છે. જ્યારે અજમેરથી દિલ્હી વચ્ચે ચેર કારનું ભાડું 1,085 રૂપિયા છે અને એક્ઝિક્યુટિવ માટે તમારે 2.075 રૂપિયાની ફી ચૂકવવી પડશે.
દેશમાં 13 વંદે ભારત ટ્રેન દોડી રહી છે
અત્યાર સુધીમાં દેશના વિવિધ ભાગોમાં કુલ 13 વંદે ભારત ટ્રેનો પાટા પર દોડી રહી છે. નોંધનીય છે કે વંદે ભારત ટ્રેન 100 ટકા સ્વદેશી ટેક્નોલોજીથી બનેલી સેમી હાઇ સ્પીડ ટ્રેન છે. પહેલા આ ટ્રેન વારાણસીથી દિલ્હી વચ્ચે ચલાવવામાં આવી હતી. આ ટ્રેન સંપૂર્ણપણે વાતાનુકૂલિત છે અને તેમાં ઓટોમેટિક દરવાજા, જીપીએસ સિસ્ટમ અને વાઈફાઈ વગેરે જેવી ઘણી સુવિધાઓ છે.