west bengal 7th pay commission: પશ્ચિમ બંગાળની નવી ભાજપ સરકારે રાજ્યના કર્મચારીઓ અને નિવૃત્ત પેન્શનરોને મોટી ભેટ આપતા 7મા પગાર પંચ (7th Pay Commission) ના અમલીકરણને મંજૂરી આપી દીધી છે. સોમવારે મુખ્યમંત્રી સુવેન્દુ અધિકારીની અધ્યક્ષતામાં મળેલી કેબિનેટ બેઠકમાં આ મહત્વનો નિર્ણય લેવામાં આવ્યો હતો. આ નિર્ણયથી લાખો કર્મચારીઓના મૂળ પગાર, ભથ્થાં અને પેન્શનમાં મોટો વધારો થશે. આ સાથે જ કેબિનેટે મહિલાઓ માટે દર મહિને 3,000 રૂપિયાની આર્થિક સહાય અને સરકારી બસોમાં મફત મુસાફરી જેવી લોકકલ્યાણકારી યોજનાઓ શરૂ કરવાની પણ જાહેરાત કરી છે.
રાજ્યમંત્રી અગ્નિમિત્ર પોલે આ કેબિનેટ નિર્ણયોની સત્તાવાર જાહેરાત કરતા જણાવ્યું કે, આ ઐતિહાસિક પગલાથી કર્મચારીઓ અને નિવૃત્ત વડીલોને મોટી આર્થિક રાહત મળશે. તમને યાદ અપાવી દઈએ કે, આ અગાઉ પશ્ચિમ બંગાળમાં સપ્ટેમ્બર 2019 માં છઠ્ઠા પગાર પંચનું નોટિફિકેશન બહાર પાડવામાં આવ્યું હતું, જે અંતર્ગત કર્મચારીઓને 1 જાન્યુઆરી, 2016 થી તેમના બાકી પગાર (એરિયર્સ) ચૂકવવામાં આવ્યા હતા. હવે નવી સરકાર આવતા જ કર્મચારીઓ માટે 7મું પગાર પંચ લાગુ કરવાનો રસ્તો સાફ થઈ ગયો છે.
7મા પગાર પંચના માળખા વિશે વાત કરીએ તો, આમાં કુલ 25 સ્તર (લેવલ) રાખવામાં આવ્યા છે. આ નવા નિયમો મુજબ કર્મચારીઓનો લઘુત્તમ મૂળ પગાર (Minimum Basic Salary) 17,000 રૂપિયા થશે, જ્યારે મહત્તમ મૂળ પગાર 1,28,900 રૂપિયા સુધી પહોંચશે. અગાઉની સરકારે છઠ્ઠા પગાર પંચમાં ફિટમેન્ટ ફેક્ટર 2.57 નક્કી કર્યું હતું, જે પગાર અને પેન્શનની ગણતરીમાં ગુણાકાર તરીકે કામ કરે છે. જોકે, આ નવી વ્યવસ્થામાં નવું ફિટમેન્ટ ફેક્ટર કેટલું રહેશે તેની જાહેરાત થવામાં હજુ થોડો સમય લાગી શકે છે, જેનાથી પગાર વધારાનું ચોક્કસ ચિત્ર વધુ સ્પષ્ટ થશે.
આ પણ વાંચોઃ બંગાળમાં સુવેન્દુ અધિકારી બન્યા મુખ્યમંત્રી, અભિષેક બેનર્જીએ કહ્યું - ‘બંગાળ અને દિલ્હીમાં હવે...’
પગાર વધારાની સાથે સાથે કેબિનેટ બેઠકમાં મહિલાઓ માટે 'અન્નપૂર્ણા ભંડાર યોજના' ના પ્રસ્તાવને પણ મંજૂરી આપવામાં આવી છે. આ નવી યોજના હેઠળ રાજ્યની મહિલાઓને દર મહિને 3,000 રૂપિયાનું ભથ્થું આપવામાં આવશે. આ યોજનાને અગાઉની સરકારની 'લક્ષ્મી ભંડાર યોજના' સાથે જોડી દેવામાં આવશે, જેથી તેમાં નોંધાયેલી તમામ મહિલાઓને આ વધેલી રકમનો સીધો લાભ મળી શકે. આ ઉપરાંત, મહિલા સશક્તિકરણ અંતર્ગત આગામી 1 જૂનથી મહિલાઓ રાજ્ય સરકાર દ્વારા ચલાવવામાં આવતી તમામ સરકારી બસોમાં મફત મુસાફરી કરી શકશે. બીજી તરફ, રાજ્ય સરકારે એક મોટો નીતિગત નિર્ણય લેતા ધર્મ આધારિત ચાલતી તમામ કલ્યાણકારી યોજનાઓ તાત્કાલિક અસરથી પાછી ખેંચી લેવાની જાહેરાત પણ કરી છે.
આ પણ વાંચોઃ બંગાળમાં લોહીયાળ ખેલ: સુવેન્દુ અધિકારીના PAની જાહેરમાં ગોળી મારી હત્યા, મધ્યગ્રામમાં હડકંપ