ગાઝા યુદ્ધવિરામ કરાર હેઠળ બંધકોની મુક્તિ શરૂ થઈ ગઈ છે. હમાસે સાત બંધકોને રેડ ક્રોસને સોંપ્યા છે. રેડ ક્રોસ ટીમ તેમને ઇઝરાયલ લઈ જશે. બંધકોના પરિવારો સહિત હજારો લોકો અહીં રાહ જોઈ રહ્યા છે. બંધકોની મુક્તિની જાહેરાત થતાં જ ઇઝરાયલમાં ઉજવણી શરૂ થઈ ગઈ. ઇઝરાયલી સેનાએ ટ્વિટર પર પોસ્ટ કર્યું કે, હમાસે ઉત્તરી ગાઝામાં બંધકોને રેડ ક્રોસ ટીમને સોંપ્યા છે. હમાસે જણાવ્યું હતું કે ઇઝરાયલમાં બંધકોને રાખવામાં આવેલા 1,900 થી વધુ પેલેસ્ટિનિયન કેદીઓના બદલામાં 20 જીવંત બંધકોને મુક્ત કરવામાં આવશે.
અહેવાલો અનુસાર, ગાઝા પટ્ટીના ઉત્તરીય ભાગમાં સ્થિત ગાઝા શહેરમાં સાત બંધકોને મુક્ત કરવામાં આવ્યા હતા. જીવંત બંધકોની મુક્તિનો બીજો તબક્કો દક્ષિણ ગાઝામાં સવારે 10 વાગ્યે (સ્થાનિક સમય) થશે. હમાસની લશ્કરી શાખાએ જણાવ્યું છે કે તે ઇઝરાયલ સાથે યુદ્ધવિરામ અને બંધક-કેદી કરાર માટે પ્રતિબદ્ધ છે. નિવેદનમાં કહેવામાં આવ્યું છે કે ઇઝરાયલ તેના મોટાભાગના બંધકોને જીવતા પરત કરી શક્યું હોત, પરંતુ તેની નીતિઓના પરિણામે ઘણા લોકોના મોત થયા હતા.
ઇઝરાયલમાં ઉજવણી
સોમવારે ઇઝરાયલી ટેલિવિઝન ચેનલોએ જાહેરાત કરી કે, બંધકો હમાસની કેદમાંથી મુક્ત થઇ રહ્યાં છે અને રેડ ક્રોસના હાથમાં છે. આ જાહેરાતથી બંધકોના પરિવારો અને મિત્રોમાં ઉજવણી શરૂ થઈ ગઈ. દેશભરમાં જાહેર સ્ક્રીનીંગમાં હજારો ઇઝરાયલીઓએ બંધકોની મુક્તિ નિહાળી હતી. તેલ અવીવમાં એક મોટો કાર્યક્રમ યોજાઈ રહ્યો છે.
ઇઝરાયલી ટીવી પર મુક્ત થનારા બંધકોના નામ વાંચી સંભળાવવામાં આવ્યા હતા. હોસ્ટેજ સ્ક્વેર પર ભરચક ભીડે તાળીઓ પાડી અને સૂત્રોચ્ચાર કર્યા, આ લોકોના હાથમાં પીળા બંધક રિબનવાળા ઇઝરાયલી ધ્વજ હાથમાં લીધા. કેટલાક લોકોએ બંધકોના ચહેરા દર્શાવતા પોસ્ટરો હાથમાં લીધા હતા. ઘણા લોકો રડતા જોવા મળ્યા.
2 વર્ષ બાદ રોકાયું યુદ્ધ
ઇઝરાયલ અને ગાઝા વચ્ચેની લડાઈ 7 ઓક્ટોબર, 2023 ના રોજ શરૂ થઈ હતી, જ્યારે હમાસે ઇઝરાયલ પર હુમલો કર્યો હતો, જેમાં 1,200 લોકો માર્યા ગયા હતા અને 250 લોકોને બંધક બનાવ્યા હતા. ત્યારબાદ થયેલા કરારો દ્વારા કેટલાક બંધકોને મુક્ત કરવામાં આવ્યા હતા, પરંતુ 20 બચી ગયેલા લોકો અને કેટલાક અન્ય બંધકોના મૃતદેહ ગાઝામાં જ રહે છે. આ હવે હમાસ દ્વારા ઇઝરાયલને સોંપવામાં આવી રહ્યા છે.