Morbi: જેતપરમાં ખેડૂતોનું આંદોલન તેજ, ન્યાયની માંગ સાથે આજથી મહિલાઓ અને પુરુષોના પ્રતિક ઉપવાસ શરૂ
Morbi Jetpar Farmers Protest: મોરબી પંથકમાં લાંબા સમયથી ચાલી રહેલા ખેડૂતોના પ્રશ્નોનું કોઈ યોગ્ય નિરાકરણ ન આવતા આજે જેતપર ગામ ફરી એકવાર આંદોલનનું કેન્દ્ર બન્યું છે
- મોરબીના જેતપર ગામે ખેડૂતોનું પ્રતિક ઉપવાસ આંદોલન શરૂ.
- મહિલાઓની સક્રિય ભાગીદારી; આજુબાજુના ગામોનું પણ સમર્થન મળ્યું.
- પડતર માંગણીઓ ન સંતોષાય તો આંદોલન ઉગ્ર બનવાની ચીમકી.
Morbi Jetpar Farmers Protest: મોરબી જિલ્લાના જેતપર ગામે પોતાની પડતર માંગણીઓ અને ન્યાય મેળવવા માટે સ્થાનિક ખેડૂતો અને મહિલાઓ દ્વારા આજથી ‘ગુજરાત છાવણી’ ખાતે અહિંસક રીતે રામધૂન બોલાવીને ફરી એકવાર પ્રતિક ઉપવાસ આંદોલનની ઉગ્ર શરૂઆત કરવામાં આવી છે.
મોરબી પંથકમાં લાંબા સમયથી ચાલી રહેલા ખેડૂતોના પ્રશ્નોનું કોઈ યોગ્ય નિરાકરણ ન આવતા આજે જેતપર ગામ ફરી એકવાર આંદોલનનું કેન્દ્ર બન્યું છે. ગામમાં વિશેષ રૂપે ઊભી કરાયેલી ‘ગુજરાત છાવણી’ ખાતે ખેડૂતોએ એકત્રિત થઈને વહીવટી તંત્ર સામે પોતાનો આક્રોશ ઠાલવ્યો હતો. આ આંદોલનને ગ્રામજનોનો અભૂતપૂર્વ સહકાર મળી રહ્યો છે અને પ્રથમ દિવસથી જ વાતાવરણમાં ભારે ઉત્તેજના જોવા મળી રહી છે.
આજથી શરૂ થયેલા આ પ્રતિક ઉપવાસ આંદોલનમાં મહિલાઓની સક્રિય ભાગીદારી આકર્ષણનું કેન્દ્ર બની છે. પ્રથમ દિવસે જ 15 જેટલી બહેનો અને 11 ભાઈઓએ સાથે મળીને ઉપવાસના સંકલ્પ સાથે આંદોલનની કમાન સંભાળી લીધી છે. આજુબાજુના અન્ય 3 ગામોમાંથી 400 થી વધુ ખેડૂતો અને સમર્થકો છાવણીની મુલાકાતે આવી પહોંચ્યા હતા અને ઉપવાસીઓને પોતાનું સમર્થન જાહેર કર્યું હતું.
આંદોલનને શાંતિપૂર્ણ અને મજબૂત બનાવવા માટે છાવણી સ્થળે સામૂહિક રામધૂન શરૂ કરવામાં આવી છે. ખેડૂત અગ્રણીઓએ ચીમકી ઉચ્ચારી છે કે જ્યાં સુધી સરકાર કે સ્થાનિક તંત્ર દ્વારા તેમની વાજબી માંગણીઓ સ્વીકારવામાં નહીં આવે ત્યાં સુધી આ લડત ક્રમશઃ વધુ ઉગ્ર બનાવવામાં આવશે. આગામી દિવસોમાં આસપાસના વધુ ગામો પણ આ ઉપવાસ છાવણીમાં જોડાશે તેવી પૂરેપૂરી સંભાવના છે.
ટોપ સ્ટોરી
ટ્રેન્ડિંગ સમાચાર
