રાજકોટ: રાજકોટની સૌરાષ્ટ્ર યુનિવર્સિટી જેની સામે ફરી સવાલ ઉઠ્યા છે. પરીક્ષામાં ચોરી કરતા પકડાયેલા વિદ્યાર્થીઓને સજા કરવામાં બેધારી નીતિ અપનાવ્યાનો આરોપ છે. વાત એમ છે કે, લીંબડીના એક વિદ્યાર્થીએ પરીક્ષામાં ડમી વિદ્યાર્થીને બેસાડતા તેને આજીવન પરીક્ષા ન આપવાની સજા ફટકારવામાં આવી છે.
જો કે, ગોંડલ માર્કેટ યાર્ડના ચેરમેન અને ભાજપના યુવા નેતા અલ્પેશ ઢોલરિયાને ફક્ત 4 વર્ષ માટે પરીક્ષા ન આપવાની સજા ફટકારાઈ હતી. ચાર વર્ષ પહેલાં ગોંડલની કૉલેજમાં અલ્પેશ ઢોલરિયાએ પોતાના બદલે ડમી વિદ્યાર્થીને બેસાડ્યો હતો અને આ કરતૂત CCTVમાં કેદ પણ થઈ ગઈ હતી. જે તે સમયે સૌરાષ્ટ્ર યુનિવર્સિટીએ અલ્પેશ ઢોલરિયાને 4 વર્ષ માટે પરીક્ષા નહીં આપી શકવાની સજા ફટકારી હતી. ત્યારે સવાલ ઉઠી રહ્યા છે કે, સૌરાષ્ટ્ર યુનિવર્સિટી તો વહાલા-દવલાની નીતિ અપનાવી રહી છે.
અમદાવાદના કાલુપુરમાં ભર બપોરે યુવકને છરીના ઘા ઝિંકી પતાવી દીધો
રિક્ષામાં ત્રણ શખ્સ જતા હતા ત્યારે પાછળ રિક્ષામાં આવેલા શખ્સોએ પહેલા રિક્ષા પર તીક્ષ્ણ હથિયારો વડે હુમલો કર્યો હતો. જેથી રિક્ષામાં બેઠેલા ત્રણેય શખ્સ ભાગ્યા હતા. તેનો પીછો કરીને આરોપી સાદિક હુસેન અને લીયાકત હુસેને ભેગા મળીને તીક્ષ્ણ હથિયારો વડે પાંચકુવા પાસે જાહેરમાં સબાન અલી મોમીનને ઘા માર્યા હતા. સબાનઅલીને VS હોસ્પિટલ લઈ જવાતા ફરજ પરના ડોક્ટરે મૃત જાહેર કર્યો હતો. ફરિયાદી મોહમ્મદ ફૈઝાન અતરવાલા, મૃતકનો માસિયાઈ ભાઈ છે. ફરિયાદીના ભાઈ કાસીમહુસેનને પણ તલવારના ઘા મરાયા હતા. પ્રાથમિક માહિતી પ્રમાણે લગ્ન પ્રસંગમાં જમવાની બાબતમાં ટોકવા જેવી બાબતમાં મનદુઃખ રાખીને આરોપીઓએ હુમલો કર્યો હતો.
સીટીએમમાં ડબલ ડેકર બ્રિજ પરથી યુવતીએ લગાવી છલાંગ
સીટીએમ પાસેના ડબલ ડેકર ઓવરબ્રિજ ઉપરથી ગઈકાલે બપોરે અજાણી યુવતીએ છલાંગ મારીને આપઘાતનો પ્રયાસ કર્યો હતો. જો કે લોકો બચાવવા જાય તે પહેલા યુવતીએ કૂદકો માર્યો હતો.ગંભીર હાલતમાં યુવતીને સારવાર માટે હોસ્પિટલમાં દાખલ કરવામાં આવી છે. આ બનાવનો વિડિયો સોશિયલ મીડિયામાં વાયરલ થયો હતો. આ કેસની વિગત એવી છે કે પૂર્વ વિસ્તારમાં ખોખરાથી સીટીએમ તરફ જતા ઓવરબ્રિજ ઉપર ગઈકાલે બપોરે એક યુવતીએ અગમ્ય કારણોસર ડબલ ડેકર ઓવર બ્રિજ ઉપરથી કૂદકો મારતી હોવાની જાણ થતાં લોકોનું ટોળું એકઠું થયું હતું. લોકો બચાવવા જાય તે પહેલા યુવતીએ બ્રિજ ઉપરથી છલાંગ મારી હતી જેથી શરીરે ગંભીર ઇજાઓ થઇ હતી. આ બનાવની જાણ થતાં એમ્બ્યુલન્સ આવી પહોચી હતી અને સ્થળ પર સારવાર કરીને વધુ સારવાર માટે હોસ્પિટલમાં ખસેડવામાં આવી હતી. પૂર્વ વિસ્તારમાં છેલ્લા કેટલાક સમયથી ગૃહ કલેશના કારણે મહિલાના આપઘાતના બનાવો વધી રહ્યા છે.