Vadodara Rain: વડોદરા શહેરમાં વહેલી સવારથી જ મોડી રાતથી શરૂ થયેલો ધોધમાર વરસાદ વરસી રહ્યો છે, જેના પગલે શહેરના અનેક વિસ્તારોમાં જળબંબાકાર જેવા દ્રશ્યો સર્જાયા છે. અલકાપુરી સહિતના નીચાણવાળા વિસ્તારોમાં પાણી ભરાઈ જતાં જનજીવન પ્રભાવિત બન્યું છે. રસ્તાઓ પર પાણી ભરાઈ જવાના કારણે વાહનો બંધ પડી જતાં વાહનચાલકો ભારે મુશ્કેલીમાં મુકાયા હતા. આ દરમિયાન એક વિસ્તારમાં પાણીમાં વાહનચાલક ફસાઈ જતાં જીઆઈડીસી ફાયર બ્રિગેડની ટીમે તાત્કાલિક ઘટનાસ્થળે પહોંચી રેસ્ક્યુ ઓપરેશન હાથ ધરીને તેને સલામત રીતે બહાર કાઢ્યો હતો. જ્યારે અલકાપુરી વિસ્તારમાંથી મહાનગરપાલિકાની ટીમે તાત્કાલિક પાણીનો નિકાલ કરવાની કામગીરી હાથ ધરી હતી. આગામી કલાકોમાં પણ તીવ્ર વરસાદની શક્યતા હોવાથી વહીવટી તંત્ર દ્વારા નાગરિકોને જરૂરી કામ વગર બહાર ન નીકળવા અને વરસાદી પાણી ભરાયેલા વિસ્તારોથી દૂર રહેવા અપીલ કરવામાં આવી છે.
મધ્ય ગુજરાત અને વડોદરા જિલ્લા માટે હવામાન વિભાગ દ્વારા જાહેર કરાયેલા રેડ એલર્ટને પગલે NDRF પણ સંપૂર્ણ રીતે સજ્જ થઈ ગયું છે. કોઈપણ ઈમરજન્સી પરિસ્થિતિને પહોંચી વળવા માટે વડોદરા અને મધ્ય ગુજરાત માટે NDRF ની 3 ટીમો સ્ટેન્ડબાય રાખવામાં આવી છે. અગાઉ બનાસકાંઠા, પાટણ અને જૂનાગઢ ખાતે ડિપ્લોય કરવામાં આવેલી ટીમોને મોડી રાત્રે વડોદરા હેડક્વાર્ટર ખાતે પરત બોલાવી લેવામાં આવી છે, જેથી સ્થિતિ વણસે તો આ ટીમોને તાત્કાલિક અસરગ્રસ્ત વિસ્તારોમાં રવાના કરી શકાય.
વડોદરા જિલ્લાના શિનોર તાલુકા પંથકમાં પણ મેઘરાજાએ જબરદસ્ત બેટિંગ શરૂ કરી છે. શિનોરના તમામ ગામડાઓમાં સતત વરસી રહેલા વરસાદને કારણે ગામડાઓની ગલીઓમાં સન્નાટો છવાઈ ગયો છે. બીજી તરફ, પાદરા તાલુકામાં સંભવિત પૂરની સ્થિતિને ધ્યાનમાં રાખીને તંત્ર દ્વારા અગમચેતીના ભાગરૂપે 76 લોકોનું સલામત સ્થળે સ્થળાંતર કરવામાં આવ્યું છે. મહીસાગર નદીના ડબકા ગામ નજીક તળિયાભાઠા વિસ્તારમાં વસતા 20 પરિવારોને ગંભીરા ખાતે આવેલી શાળામાં આશરો આપવામાં આવ્યો છે. ભૂતકાળમાં પણ પૂરની સ્થિતિ વખતે આ વિસ્તારના લોકોને રેસ્ક્યુ કરવાની જરૂર પડી હોવાથી, મામલતદાર અને વડુ પોલીસ સહિતના વહીવટી તંત્રે સ્થળ પર પહોંચી આગોતરી કામગીરી કરી હતી.
ઉપરવાસમાં ભારે વરસાદના કારણે ઓરસંગ નદી આ સીઝનમાં પહેલીવાર બંને કાંઠે વહેતી જોવા મળી રહી છે. છોટાઉદેપુરની હરણ નદીમાં આવેલા ઘોડાપૂરના પાણી ઓરસંગ નદીમાં ભળતાં નદીમાં પૂર જેવી સ્થિતિ સર્જાઈ છે. ડભોઈના ચણવાડા નજીકથી પસાર થતી ઓરસંગ નદી બંને કાંઠે વહેતા જ સ્થાનિક રહીશો અને ખેડૂતોમાં આનંદ અને ઉત્સાહની લહેર છવાઈ ગઈ છે.