મંગળવારે ઇન્ડોનેશિયાના પાપુઆ ક્ષેત્રમાં ભૂકંપના જોરદાર આંચકા અનુભવાયા હતા. રિક્ટર સ્કેલ પર તેની તીવ્રતા 6.3 માપવામાં આવી હતી. આ ભૂકંપથી સ્થાનિક લોકોમાં ગભરાટ ફેલાયો હતો, પરંતુ સુનામીનો કોઈ ભય નથી અને અત્યાર સુધી કોઈ નુકસાન થયું નથી.
ભૂકંપનું કેન્દ્ર
ઇન્ડિયન નેશનલ સેન્ટર ફોર સિસ્મોલોજી (NCS) અનુસાર, ભૂકંપનું કેન્દ્ર જમીનથી 39 કિલોમીટર નીચે હતું. યુએસ જીઓલોજિકલ સર્વે અનુસાર, આ ભૂકંપ પાપુઆના અબેપુરા શહેરથી લગભગ 193 કિલોમીટર ઉત્તરપશ્ચિમમાં આવ્યો હતો.
સુનામીનો કોઈ ખતરો નથી
ભૂકંપ પછી, અધિકારીઓએ કહ્યું છે કે સુનામીનો કોઈ ભય નથી. હાલમાં, કોઈને ઈજા થઈ નથી કે કોઈ પણ પ્રકારના નુકસાનના અહેવાલ નથી. અગાઉ 7 ઓગસ્ટે ઇન્ડોનેશિયામાં પણ 4.9 તીવ્રતાનો ભૂકંપ આવ્યો હતો, જેનું કેન્દ્ર જમીનથી 106 કિલોમીટર નીચે હતું.
ઇન્ડોનેશિયા ભૂકંપ ક્ષેત્ર છે
ઇન્ડોનેશિયા પેસિફિક મહાસાગરના "રિંગ ઓફ ફાયર" પર સ્થિત છે, જ્યાં ટેક્ટોનિક પ્લેટો અથડાય છે. આ કારણે અહીં વારંવાર ભૂકંપ આવે છે.
અગાઉના વિનાશક ભૂકંપ
જાન્યુઆરી 2021 માં, સુલાવેસીમાં 6.2 ની તીવ્રતાના ભૂકંપમાં 100 થી વધુ લોકો માર્યા ગયા હતા. 2018 માં, સુલાવેસીના પાલુમાં 7.5 ની તીવ્રતાના ભૂકંપ અને ત્યારબાદ સુનામીમાં 2200 થી વધુ લોકો માર્યા ગયા હતા. 2004 માં, આચેહ પ્રાંતમાં 9.1 ની તીવ્રતાના ભૂકંપ અને સુનામીમાં 1,70,000 થી વધુ લોકો માર્યા ગયા હતા.
ભૂકંપ શા માટે આવે છે ?
જ્યારે પૃથ્વીની સપાટી નીચે ટેક્ટોનિક પ્લેટો અથડાય છે અને સરકી જાય છે ત્યારે ભૂકંપ આવે છે. આ પ્લેટો વચ્ચે જમા તણાવ અચાનક મુક્ત થાય છે, જેના કારણે જમીનમાં કંપન થાય છે, જેને ભૂકંપ કહેવામાં આવે છે. ભૂકંપનું કેન્દ્ર તે સ્થાન છે જ્યાંથી કંપનો શરૂ થાય છે અને એપીસેન્ટર જમીનની સપાટી પર સૌથી વધુ અસર કરે છે. ખાસ કરીને "રિંગ ઓફ ફાયર" જેવા વિસ્તારોમાં, ટેક્ટોનિક પ્લેટો વધુ સક્રિય હોય છે, તેથી ત્યાં વારંવાર ભૂકંપ આવે છે.
ભૂકંપ આવે ત્યારે બચવા શું કરશો -
ભૂકંપ આવતા જો તમે ઘરમાં છો તો જમીન પર બેસી જાવ.મજબૂત ટેબલ કે કોઈ ફર્નીચરની નીચે શરણ લો.ટેબલ ન હોય તો હાથ વડે ચેહરા અને માથાને ઢાંકી લો.ઘરના કોઈ ખૂણામાં જતા રહો.કાંચ બારીઓ દરવાજા અને દિવાલથી દૂર રહો.પથારી પર છો તો સૂઈ રહો. ઓશિકા વડે માથુ ઢાંકી લો.આસપાસ ભારે ફર્નીચર હોય તો તેનાથી દૂર રહો.લિફ્ટનો ઉપયોગ કરતા બચો.લાઈટ જવાથી પણ લિફ્ટ રોકાય શકે છે.ઝટકો આવતા સુધી ઘરની અંદર જ રહોઆંચકા આવતા બંધ થાય ત્યારે બહાર નીકળો.