કોલંબિયામાં 7.4 ની તીવ્રતાનો વિનાશક ભૂકંપ: 20 લોકોના મોત, અનેક ઈમારતો ધરાશાયી થઈ

107 કિમીની ઊંડાઈએ ભૂકંપનું કેન્દ્ર, મેયર દ્વારા પરિસ્થિતિ અત્યંત ગંભીર ગણાવાઈ; ઈક્વાડોરમાં પણ આંચકા અનુભવાયા, કાટમાળ નીચે અનેક લોકો ફસાયા હોવાની આશંકા.

colombia earthquake 7.4 magnitude casualty updates rescue operational news

Source : twitter

Show Quick Read

Key points generated by AI, verified by newsroom

• પશ્ચિમ કોલંબિયામાં 7.4 તીવ્રતાના ભૂકંપથી 20 લોકોના મોત.
• સાન જોસ ડેલ પાલ્મરમાં કેન્દ્રિત ભૂકંપથી અનેક ઇમારતો ધરાશાયી.
• પેરેરા, ક્વિબ્ડોમાં ગંભીર સ્થિતિ, રાષ્ટ્રપતિએ બચાવકાર્ય સંભાળ્યું.

Colombia earthquake 2026: સોમવારે પશ્ચિમ કોલંબિયામાં આવેલા 7.4 ની તીવ્રતાના શક્તિશાળી ભૂકંપે ભારે તારાજી સર્જી છે. સમાચાર એજન્સી રોઇટર્સના અહેવાલ મુજબ, આ વિનાશક ભૂકંપમાં ઓછામાં ઓછા 20 લોકોએ જીવ ગુમાવ્યા છે. ભૂકંપના આંચકા એટલા ભયાનક હતા કે ડઝનબંધ ઈમારતો પત્તાના મહેલની જેમ ધરાશાયી થઈ ગઈ છે, જેના કારણે અનેક લોકો કાટમાળ નીચે ફસાયા છે. ઘાયલોની સંખ્યા સતત વધી રહી છે અને રાજધાની બોગોટા સુધી લોકોને પોતાના ઘર ખાલી કરીને સુરક્ષિત સ્થળે જવા મજબૂર થવું પડ્યું છે.

ક્યાં હતું ભૂકંપનું કેન્દ્ર?

યુએસ જીઓલોજિકલ સર્વે (USGS) અને કોલંબિયાની સ્થાનિક એજન્સીઓના જણાવ્યા અનુસાર, આ ભૂકંપનું કેન્દ્ર પશ્ચિમ ચોકો પ્રાંતના સાન જોસ ડેલ પાલ્મર (San Jose del Palmar) માં હતું. આ વિસ્તાર રાજધાની બોગોટાથી આશરે 400 કિલોમીટર (250 માઈલ) પશ્ચિમમાં આવેલો છે અને ત્યાં લગભગ 4,800 લોકોની વસ્તી છે. આ ભૂકંપ જમીનની અંદર 107 કિલોમીટર (66 માઈલ) ની ઊંડાઈએ આવ્યો હતો. આંચકા એટલા જોરદાર હતા કે પડોશી દેશ ઈક્વાડોરમાં પણ તેની અસર અનુભવાઈ હતી.

પેરેરા અને ક્વિબ્ડો શહેરની સ્થિતિ "ગંભીર"

આ કુદરતી હોનારતની સૌથી વધુ અસર પશ્ચિમી શહેર પેરેરા (Pereira) માં જોવા મળી છે. પેરેરાના મેયર મૌરિસિયો સાલાઝારે કારાકોલ રેડિયોને માહિતી આપતા જણાવ્યું હતું કે, માત્ર તેમના જ શહેરમાં ઓછામાં ઓછા 18 લોકોના મોત થયા છે અને 20 જેટલી ઈમારતો ધરાશાયી થઈ છે. તેમણે વર્તમાન પરિસ્થિતિને અત્યંત "ગંભીર" ગણાવી છે.

ચોકો પ્રાંતના ગવર્નર નુબિયા કોર્ડોબાએ સોશિયલ મીડિયા પર જણાવ્યું કે, 1,30,000 લોકોની વસ્તી ધરાવતા પ્રાંતની રાજધાની ક્વિબ્ડો (Quibdo) શહેરમાં પણ ઈમારતોને ભારે નુકસાન પહોંચ્યું છે અને અનેક લોકો ઘાયલ થયા છે. સ્થાનિક મીડિયા દ્વારા શેર કરવામાં આવેલા ફૂટેજમાં પેરેરા, કાલી અને ક્વિબ્ડો શહેરોમાં મકાનો અને નાની ઈમારતો ધરાશાયી થતી સ્પષ્ટપણે જોઈ શકાય છે.

અન્ય શહેરોમાં પણ ભારે તારાજી

મનીઝાલેસ (Manizales): બોગોટાથી લગભગ 300 કિલોમીટર (190 માઈલ) પશ્ચિમમાં આવેલા આ શહેરમાં એક નિઓ-ગોથિક કેથેડ્રલનો ટાવર તૂટીને તેના મુખ્ય ભાગ પર પડ્યો હતો.

કાલી (Cali): 20 લાખની વસ્તી ધરાવતા કાલી શહેરના મેયર અલેજાન્ડ્રો એડરે જણાવ્યું કે, શહેરમાં ઓછામાં ઓછી 19 ઈમારતો તૂટી પડી છે અને તેમાં અનેક રહીશો ફસાયેલા હોવાની આશંકા છે.

રાષ્ટ્રપતિએ મોરચો સંભાળ્યો

કોલંબિયાના નવા રાષ્ટ્રપતિ એબેલાર્ડો ડે લા એસ્પ્રિએલા (Abelardo De La Espriella) એ સોમવારે જણાવ્યું કે, તેમણે સાન જોસ ડેલ પાલ્મરમાં આવેલી આ કટોકટીના સમયે સરકારના બચાવ કાર્યની જવાબદારી વ્યક્તિગત રીતે પોતાના હાથમાં લીધી છે. તેમણે પીડિતોને આશ્વાસન આપતા કહ્યું, "તમે એકલા નથી. રાજ્ય તમારી સાથે છે અને તાત્કાલિક કાર્યવાહી કરી રહ્યું છે."

અગાઉના ભૂકંપોનો ઇતિહાસ

મધ્ય અને પશ્ચિમ કોલંબિયામાં નાના ભૂકંપ આવવા એ સામાન્ય બાબત છે, પરંતુ 6.0 થી વધુ તીવ્રતાના ભૂકંપ ભાગ્યે જ આવે છે. નોંધનીય છે કે, અગાઉ 1999 માં આર્મેનિયા શહેર નજીક આવેલા 6.2 ની તીવ્રતાના ભૂકંપમાં 1,100 થી વધુ લોકો માર્યા ગયા હતા. આ ઉપરાંત, તાજેતરમાં જ જૂનના અંતમાં પાડોશી દેશ વેનેઝુએલામાં 7.2 અને 7.5 ની તીવ્રતાના બે શક્તિશાળી ભૂકંપ આવ્યા હતા, જેમાં સેંકડો ઈમારતો નાશ પામી હતી અને 5,000 થી વધુ લોકોએ જીવ ગુમાવ્યા હતા.