વર્ષ 2026 માં અત્યારે મધ્ય પૂર્વમાં જે રીતે અમેરિકા, ઇઝરાયલ અને ઈરાન વચ્ચે ભયંકર સંઘર્ષ અને યુદ્ધ ફાટી નીકળ્યું છે, તેના કારણે સમગ્ર વિશ્વમાં ત્રીજા વિશ્વ યુદ્ધનો ખતરો મંડરાઈ રહ્યો છે. વધતા જતા આ આંતરરાષ્ટ્રીય તણાવ અને મહાસત્તાઓ વચ્ચેની ખેંચતાણને કારણે લોકોના મનમાં એક જ ભયાનક સવાલ ઉઠી રહ્યો છે કે જો ખરેખર અણુબોમ્બ ફૂટશે અને પરમાણુ યુદ્ધ શરૂ થશે, તો શું પૃથ્વી પર કોઈ દેશ કે માનવજાત જીવતી બચશે? નિષ્ણાતોના મતે, આટલા વિનાશક હુમલાઓ વચ્ચે પણ દુનિયાના કેટલાક એવા દેશો છે જે પોતાની ભૌગોલિક સ્થિતિ અને અદભૂત તૈયારીઓના કારણે સુરક્ષિત રહી શકે છે. ચાલો જાણીએ આ દેશો કયા છે અને તેમની તાકાત શું છે.
- ન્યુઝીલેન્ડ: દુનિયાની નજરોથી દૂર અને અનાજનો મોટો ભંડાર
ન્યુઝીલેન્ડને કોઈપણ વૈશ્વિક આફત કે પરમાણુ હુમલા સામે પૃથ્વી પરનું સૌથી સુરક્ષિત સ્થાન માનવામાં આવે છે. તેનો સૌથી મોટો ફાયદો તેનું ભૌગોલિક અંતર છે. દક્ષિણ ગોળાર્ધના એકદમ છેવાડે આવેલો આ દેશ અન્ય શક્તિશાળી દેશોની દુશ્મનાવટીથી એટલો બધો દૂર છે કે કોઈ તેને સીધું લશ્કરી નિશાન બનાવવાનું વિચારે જ નહીં. વળી, ત્યાંની ખેતી અને પશુપાલન વ્યવસ્થા એટલી મજબૂત છે કે જો આખી દુનિયામાં સૂર્યપ્રકાશ ન મળે તેવો 'પરમાણુ શિયાળો' આવે, તો પણ આ દેશ પોતાની જનતાને આરામથી પૂરતું ભોજન પૂરું પાડી શકે તેમ છે.
- ઓસ્ટ્રેલિયા: અફાટ જમીન અને છૂટીછવાઈ વસતીનો ફાયદો
ન્યુઝીલેન્ડની જેમ ઓસ્ટ્રેલિયા પણ ભૌગોલિક રીતે દુનિયાના મુખ્ય સંઘર્ષોથી એકદમ અલગ પડે છે. તેની પાસે વિશાળ જમીન વિસ્તાર અને વિપુલ પ્રમાણમાં કુદરતી સંપત્તિ છે. ભલે પશ્ચિમી શક્તિશાળી દેશો સાથે તેના સૈન્ય સંબંધો સારા હોય અને દુશ્મનો તેને નિશાન બનાવવાનો પ્રયાસ કરી શકે, પરંતુ ત્યાંની વસ્તી અને મુખ્ય શહેરો એટલા બધા છૂટાછવાયા છે કે કોઈ મોટો હુમલો થાય તો પણ જાનહાનિ અને નુકસાનનું પ્રમાણ ખૂબ જ ઓછું રહે છે.
- સ્વિટ્ઝર્લેન્ડ: અભેદ્ય બંકર વ્યવસ્થા અને તટસ્થ નીતિ
સ્વિટ્ઝર્લેન્ડ પોતાની ભૌગોલિક સ્થિતિ કરતા પોતાની આગોતરી તૈયારીઓ અને બુદ્ધિમાની માટે વધુ જાણીતો દેશ છે. દાયકાઓથી આ દેશે નાગરિકોના રક્ષણ માટે દુનિયાની સૌથી મોટી વ્યવસ્થા ઊભી કરી છે. દુનિયાભરમાં આ એકમાત્ર એવો દેશ છે જેની પાસે પોતાની 100 ટકા કરતા પણ વધુ વસ્તીને સાચવી શકાય તેટલા વિશાળ અને મજબૂત પરમાણુ બંકર ઉપલબ્ધ છે. આ બંકરોમાં ઝેરી અને જીવલેણ કિરણોત્સર્ગથી બચવા માટે ખાસ હવા શુદ્ધ કરવાની આધુનિક સિસ્ટમ લાગેલી છે. વળી, આ દેશ હંમેશા તમામ યુદ્ધોમાં તટસ્થ રહ્યો છે, તેથી કોઈની સાથે તેને સીધી દુશ્મનાવટ નથી.
- આઇસલેન્ડ: શાંતિનો પ્રતિક અને સેનામુક્ત દેશ
આઇસલેન્ડ દુનિયાના સૌથી શાંત અને સલામત દેશોમાં અગ્રેસર ગણાય છે. સૌથી મોટી નવાઈની વાત એ છે કે તેમની પાસે પોતાની કોઈ કાયમી લશ્કરી ફોજ પણ નથી અને તેઓ આંતરરાષ્ટ્રીય વિવાદોમાં ક્યારેય પડતા નથી. ઉત્તર એટલાન્ટિકમાં આવેલો આ દેશ મુખ્ય લશ્કરી મથકોથી ઘણો દૂર હોવાથી કોઈ તેને અણુબોમ્બનું સીધું નિશાન બનાવે તેવી શક્યતા નહિવત છે.
- આર્જેન્ટિના: ખેતીવાડીની અપાર શક્તિ
જો દુનિયામાં પરમાણુ હુમલો થાય તો ઉત્તર ગોળાર્ધના દેશોમાં સૌથી વધુ તબાહી મચશે, કારણ કે મોટાભાગના પરમાણુ શસ્ત્રો ત્યાં જ છે. જ્યારે દક્ષિણ ગોળાર્ધમાં તેની અસર અને આબોહવા પર થતું નુકસાન ઓછું જોવા મળશે. આર્જેન્ટિના પાસે ઘઉં અને અન્ય જરૂરી પાકોનું એટલું મોટું અને શક્તિશાળી ઉત્પાદન છે કે જો દુનિયા સાથેનો વેપાર સંપૂર્ણપણે બંધ થઈ જાય, તો પણ તેમની આ વિશાળ ખેતીવાડી પોતાની જનતાને ભૂખમરાથી બચાવી લેશે.
- ચિલી: કુદરતી સુરક્ષા કવચ અને સમૃદ્ધ ખેતી
આર્જેન્ટિનાની જેમ ચિલી પણ ખેતીમાં ખૂબ જ સમૃદ્ધ અને આત્મનિર્ભર છે, પરંતુ તેની પાસે એક અનોખું કુદરતી રક્ષણ પણ રહેલું છે. તેની પૂર્વ સરહદ પર એન્ડીઝ પર્વતમાળા કુદરતી ઢાલ બનીને ઊભી છે અને પશ્ચિમ દિશામાં વિશાળ પેસિફિક મહાસાગર આવેલો છે. આ મજબૂત ભૌગોલિક કવચ અને ખેતીની અખૂટ તાકાત તેને કોઈપણ વૈશ્વિક આફત કે યુદ્ધ સામે લાંબા સમય સુધી ટકી રહેવાની જબરદસ્ત શક્તિ આપે છે.