Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સામે અત્યંત કડક પગલાં લીધા છે. તેમણે ઈરાન સાથે વેપાર કરતા દેશો પર ટેરિફ જાહેર કર્યા છે. ટ્રમ્પે જણાવ્યું હતું કે અમેરિકા ઈરાન સાથે વેપાર કરતા કોઈપણ દેશ પર 25 ટકા ટેરિફ લાદશે, જેનાથી ઈરાન અને તેના વેપારી ભાગીદારો પર આર્થિક દબાણ વધશે. અમેરિકાના રાષ્ટ્રપતિએ તેમના સોશિયલ મીડિયા પ્લેટફોર્મ ટ્રુથ સોશિયલ પર એક પોસ્ટમાં આ ટેરિફની જાહેરાત કરી હતી.
તેમણે જણાવ્યું હતું કે આ ટેરિફ તાત્કાલિક અમલમાં આવશે. ટ્રમ્પે જણાવ્યું હતું કે ઈરાન સાથે વેપાર કરતા કોઈપણ દેશે અમેરિકા સાથેના તમામ વ્યવસાય પર 25 ટકા ટેરિફ ચૂકવવું પડશે અને આ તાત્કાલિક અમલમાં આવશે. આ આદેશ અંતિમ છે.
ટ્રમ્પનો નિર્ણય વિરોધ પ્રદર્શનોને લઈને અમેરિકા અને ઈરાન વચ્ચે વધી રહેલા તણાવ વચ્ચે આવ્યો છે. ટ્રમ્પે વારંવાર ઈરાનને ધમકી આપી છે. હવે ઈરાનને મજબૂત બનાવવા માટે તેમણે ઈરાન સાથે વેપાર કરતા દેશો પર ટેરિફ જાહેર કર્યા છે. જો કે, આ વૈશ્વિક સ્તરે અમેરિકાના સંબંધોને પણ અસર કરી શકે છે. કારણ કે ઈરાનના ભાગીદારોમાં માત્ર પડોશી દેશો જ નહીં, પરંતુ ભારત, તુર્કી, ચીન અને સંયુક્ત આરબ અમીરાત જેવા દેશોનો પણ સમાવેશ થાય છે.
ટ્રમ્પે હજુ સુધી તેમના નિર્ણયમાં આ ટેરિફ કેવી રીતે લાગુ કરવામાં આવશે, કયા દેશોને અસર થશે અને કોઈને મુક્તિ આપવામાં આવશે કે નહીં તે અંગે કોઈ વિગતો આપી નથી.
અમેરિકા અને ઈરાન વચ્ચે તણાવ
વિરોધ પ્રદર્શનોને કારણે અમેરિકા અને ઈરાન વચ્ચે નોંધપાત્ર તણાવ છે. ઈરાનમાં બે અઠવાડિયાથી વધુ સમયથી સરકાર વિરોધી પ્રદર્શનો થઈ રહ્યા છે. આ વિરોધ પ્રદર્શનોમાં અત્યાર સુધીમાં લગભગ 600 લોકો માર્યા ગયા હોવાનો દાવો કરવામાં આવે છે, જ્યારે 10,670 થી વધુ લોકોની અટકાયત કરવામાં આવી છે.
અમેરિકા અને ટ્રમ્પે પ્રદર્શનકારીઓને સમર્થન આપ્યું છે. વધુમાં વ્હાઇટ હાઉસે કહ્યું હતું કે ટ્રમ્પ ઈરાન સામે કાર્યવાહી કરવા માટે તમામ વિકલ્પો પર વિચાર કરી રહ્યા છે, જેમાં હવાઈ હુમલાનો પણ સમાવેશ થાય છે. દરમિયાન ઈરાનના સુપ્રીમ લીડર અયાતુલ્લાહ અલી ખામેનેઈ અને અન્ય ઈરાની નેતાઓ આ વિરોધ પ્રદર્શનો માટે અમેરિકા અને ઇઝરાયલને દોષી ઠેરવી રહ્યા છે. ખામેનેઈએ પણ ઘણી વખત અમેરિકાને ખુલ્લેઆમ ચેતવણી આપી છે. થોડા દિવસો પહેલા જ તેમણે કહ્યું હતું કે ટ્રમ્પે તેમના દેશને સંભાળવો જોઈએ.