મધ્ય પૂર્વમાં ચાલી રહેલા ભારે તણાવ અને ઇરાન સામેના લશ્કરી અભિયાન વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે એક બહુ મોટો ધડાકો કર્યો છે. ટ્રમ્પે દેશને સંબોધતા સ્પષ્ટ કર્યું છે કે ઇરાનમાં શાસન બદલાઈ ગયું છે (સત્તા પલટો થયો છે) અને હવે અમેરિકા ત્યાંથી પોતાની સેના પાછી ખેંચી લેશે. જોકે, તેમણે એવી ચીમકી પણ આપી છે કે જો ભવિષ્યમાં જરૂર પડશે તો અમેરિકી સેના ફરીથી ત્યાં પહોંચી જશે. આ ઉપરાંત, આ યુદ્ધમાં નાટો (NATO) સાથી દેશોનો સાથ ન મળવાથી નારાજ ટ્રમ્પે નાટોમાંથી બહાર નીકળવાનો પણ મોટો સંકેત આપી દીધો છે અને દાવો કર્યો છે કે ઇરાન હવે ક્યારેય પરમાણુ શક્તિ બની શકશે નહીં.
શું અમેરિકા અને ઇરાન વચ્ચેનું યુદ્ધ હવે પૂરું થશે?
પત્રકારોએ જ્યારે ટ્રમ્પને પૂછ્યું કે આ યુદ્ધ ક્યારે પૂરું થશે, ત્યારે તેમણે કહ્યું કે કોઈ ચોક્કસ તારીખ કે સમય આપવો તો મુશ્કેલ છે, પણ અમેરિકા તાત્કાલિક પોતાની સેના પાછી ખેંચવા પર કામ કરી રહ્યું છે. તેમણે ગર્વભેર દાવો કર્યો કે અમેરિકાની આકરી કાર્યવાહી પછી ઇરાને પોતાની પરમાણુ બોમ્બ બનાવવાની ક્ષમતા મોટાભાગે ગુમાવી દીધી છે, એટલે હવે તેનું પરમાણુ શસ્ત્રોવાળો દેશ બનવું લગભગ અશક્ય છે.
નાટો દેશો પર બરાબરના ભડક્યા ટ્રમ્પ, આપી દીધી આ સલાહ
આ યુદ્ધમાં બ્રિટન (UK), સ્પેન અને ફ્રાન્સ જેવા મિત્ર દેશોએ અમેરિકાને સાથ આપવાની ચોખ્ખી ના પાડી દીધી હતી. આ વાતથી ડોનાલ્ડ ટ્રમ્પ બરાબરના ભડક્યા છે. તેમણે આકરી પ્રતિક્રિયા આપતા કહ્યું કે જે દેશો અત્યારે તેલની અછતનો સામનો કરી રહ્યા છે, તેમણે કાં તો સીધું અમેરિકા પાસેથી તેલ ખરીદવું જોઈએ, અથવા તો થોડી "હિંમત બતાવીને" હોર્મુઝ સ્ટ્રેટમાંથી (Strait of Hormuz) જાતે જ તેલની આયાત કરવી જોઈએ.
28 માર્ચનો એ હુમલો અને ઇરાનનો વળતો પ્રહાર
ઉલ્લેખનીય છે કે 28 માર્ચના રોજ અમેરિકા અને ઇઝરાયલે ભેગા મળીને ઇરાન પર એક મોટો હુમલો કર્યો હતો. ત્યારપછી એવું લાગતું હતું કે યુદ્ધ જલ્દી પૂરું થઈ જશે, પણ પોતાના ટોચના નેતાઓ માર્યા ગયા હોવા છતાં ઇરાને સતત ડ્રોન હુમલાઓ ચાલુ રાખીને આખી દુનિયાને ચોંકાવી દીધી હતી. જોકે, અત્યારની પરિસ્થિતિ જોતા ટ્રમ્પની સેના પાછી ખેંચવાની જાહેરાતને યુદ્ધ રોકવા તરફના એક બહુ મોટા પગલા તરીકે જોવામાં આવે છે. સામે પક્ષે ઇરાને પણ સંકેત આપ્યો છે કે તે આ જંગ ખતમ કરવા તૈયાર છે, પણ તેની કેટલીક શરતો માનવી પડશે.