Donald Trump Tariff: અમેરિકાના રાષ્ટ્રપતિ ડોનાલ્ડ ટ્રમ્પે મધ્ય પૂર્વમાં વધતા તણાવ વચ્ચે મોટો નિર્ણય લીધો છે. તેમણે બળજબરીથી કરાવવામાં આવતા શ્રમ (Forced Labour) સાથે જોડાયેલા ઉત્પાદનો સામે કડક કાર્યવાહી કરતાં ભારત સહિત 17 દેશોમાંથી આયાત થતી કેટલીક વસ્તુઓ પર વધારાનો ટેરિફ લાદ્યો છે.
અમેરિકાએ ભારતમાંથી આયાત થતા ઉત્પાદનો પર 10 ટકા વધારાનો ટેરિફ લાગુ કર્યો છે. અમેરિકાના વેપાર પ્રતિનિધિ કાર્યાલય (USTR)એ Trade Act, 1974ના Section 301 હેઠળ આ નિર્ણય લીધો છે.
આજથી અમલમાં આવશે નવો ટેરિફ
અમેરિકાનો નવો ટેરિફ 24 જુલાઈથી અમલમાં આવશે. USTRના જણાવ્યા અનુસાર, જે દેશોએ બળજબરીથી બનેલા ઉત્પાદનોની આયાત સામે પૂરતી કડક કાર્યવાહી કરી નથી, તેમના વિરુદ્ધ આ પગલું ભરવામાં આવ્યું છે.
મહત્વની વાત એ છે કે અમેરિકાએ ભારતને નીચલા ટેરિફ સ્લેબમાં રાખ્યું છે, જ્યારે કેટલાક અન્ય દેશો પર 12.5 ટકા વધારાનો ટેરિફ પણ લાદવામાં આવ્યો છે. ટ્રમ્પના આદેશ બાદ અમેરિકાએ પોતાના લગભગ 60 વેપારી ભાગીદાર દેશોની સમીક્ષા કરી હતી.
ટેરિફ અંગે ટ્રમ્પે શું કહ્યું?
સમાચાર એજન્સી PTIના અહેવાલ મુજબ, અમેરિકાના વેપાર પ્રતિનિધિ જેમિસન ગ્રીરએ જણાવ્યું કે આ પગલું માનવાધિકારોના ઉલ્લંઘન અને અયોગ્ય વેપાર પ્રથાઓ સામે સુધારાની શરૂઆત કરશે.
ડોનાલ્ડ ટ્રમ્પે કહ્યું કે, "વેપાર પ્રતિનિધિએ મને સલાહ આપી છે કે આ દેશોમાંથી આવતી વસ્તુઓ પર 10 ટકા ટેરિફ લગાવવામાં આવે, જેથી તેઓ આવા પ્રતિબંધોને વધુ અસરકારક રીતે અમલમાં મૂકે."
ભારત-પાકિસ્તાન સહિત કયા દેશો પર લાગ્યો ટેરિફ?
અમેરિકાએ ભારત, પાકિસ્તાન, બાંગ્લાદેશ, શ્રીલંકા, આર્જેન્ટિના, કમ્બોડિયા, કેનેડા, ઇક્વાડોર, એલ સેલ્વાડોર, ગ્વાટેમાલા, હોન્ડુરાસ, ઇન્ડોનેશિયા, જોર્ડન, મલેશિયા, મેક્સિકો, ટ્રિનિડાડ એન્ડ ટોબેગો અને બ્રિટનમાંથી આયાત થતી કેટલીક વસ્તુઓ પર 10 ટકા વધારાનો ટેરિફ લાદ્યો છે.
તે ઉપરાંત કેટલાક અન્ય દેશો પર 12.5 ટકા વધારાનો ટેરિફ પણ લાગુ કરવામાં આવ્યો છે.
ભારત પર 12.5 ટકાના બદલે માત્ર 10 ટકા ટેરિફ કેમ?
અમેરિકાના એક અધિકારીએ જણાવ્યું કે શરૂઆતમાં ભારત પર 12.5 ટકા ટેરિફ લાગુ કરવાની વિચારણા હતી. જોકે, શ્રમ સંબંધિત પ્રથાઓ (Labour Practices) અંગે ભારત સાથે થયેલી સકારાત્મક ચર્ચા બાદ Trade Act, 1974ના Section 301 હેઠળ ભારત માટે ટેરિફ ઘટાડીને 10 ટકા રાખવામાં આવ્યો છે.