ગ્રીનલેન્ડ પર ટ્રમ્પનો ખુલ્લો દાવો, નક્શામાં બતાવ્યો અમેરિકાનો કબજો, શેર કર્યો નવો નકશો   

તેમણે સોશિયલ મીડિયા પર એક એવો નકશો શેર કર્યો, જેમાં  ગ્રીનલેન્ડ, કેનેડા અને વેનેઝુએલાને અમેરિકાના પ્રદેશો તરીકે દર્શાવવામાં આવ્યા છે.

ગ્રીનલેન્ડને લઈ ફરી આક્રમક ટ્રમ્પ

Source : PTI

અમેરિકાના રાષ્ટ્રપતિ ડોનાલ્ડ ટ્રમ્પે ફરી એકવાર ગ્રીનલેન્ડને અમેરિકાનો ભાગ બનાવવાની માંગ વધુ તેજ કરી દિધી છે. તેમણે સોશિયલ મીડિયા પર એક એવો નકશો શેર કર્યો, જેમાં  ગ્રીનલેન્ડ, કેનેડા અને વેનેઝુએલાને અમેરિકાના પ્રદેશો તરીકે દર્શાવવામાં આવ્યા છે. આ પગલાથી અમેરિકા અને તેના સાથી દેશો વચ્ચે નવો વિવાદ ઉભો થયો છે.

નાટો સહયોગીઓ પર કટાક્ષ 

અમેરિકી રાષ્ટ્રપતિ ડૉનાલ્ડ ટ્રમ્પે તેમના સોશિયલ મીડિયા પ્લેટફોર્મ ટ્રુથ સોશિયલ પર એક ફોટો શેર કર્યો છે, જેમાં નાટોના ઘણા નેતાઓ ઓવલ ઓફિસમાં બેસેલા જોવા મળી રહ્યા છે. ફોટો પાછળના બદલેલા નકશામાં ગ્રીનલેન્ડને અમેરિકાનો ભાગ બતાવવામાં આવ્યો છે. આ તસવીરમાં ફ્રાન્સના રાષ્ટ્રપતિ ઇમેન્યુઅલ મેક્રો,  ઇટાલીના પ્રધાનમંત્રી જ્યોર્જિયો મેલોની, બ્રિટિનના પ્રધાનમંત્રી કીર સ્ટાર્મર અને યુરોપિયન કમિશનના  અધ્યક્ષ ઉર્સુલા વૉન ડેર લેયેન સામેલ છે.

યુરોપિયન યુનિયન પર નરમ વલણનો દાવો 

આ પહેલા ટ્રમ્પે દાવો કર્યો હતો કે ગ્રીનલેન્ડને લઈ યુરોપિયન યુનિયન વધારે વિરોધ કરશે નહીં. ફ્લોરિડામાં બોલતા તેમણે કહ્યું હતું કે રશિયા અને ચીનના વધતા પ્રભાવને રોકવા માટે ગ્રીનલેન્ડ અમેરિકાની રાષ્ટ્રીય સુરક્ષા માટે જરૂરી છે. તેમણે એમ પણ કહ્યું હતું કે ડેનમાર્ક પાસે ગ્રીનલેન્ડનો બચાવ કરવાની ક્ષમતા નથી. 

"અમને ગ્રીનલેન્ડ જોઈએ છે" - ટ્રમ્પ

ટ્રમ્પે પત્રકારોને કહ્યું, "અમને આ જોઈએ, આ થવું જ જોઈએ." તેમણે ભારપૂર્વક જણાવ્યું હતું કે ગ્રીનલેન્ડ યુનાઇટેડ સ્ટેટ્સનો ભાગ બનવું જરુરી છે. ટ્રમ્પે અગાઉ આ   પ્રદેશ માટેની તેમની માંગણીને નોબેલ શાંતિ પુરસ્કાર સાથે જોડી હતી. નોર્વેના વડા પ્રધાનને લખેલા પત્રમાં તેમણે જણાવ્યું હતું કે તેમને હજુ સુધી આ પુરસ્કાર મળ્યો નથી. તેમણે એવો પણ દાવો કર્યો હતો કે યુએસ અર્થતંત્ર વિશ્વમાં સૌથી મજબૂત સ્થિતિમાં છે.

નાટો પ્રમુખ સાથે વાતચીતનો દાવો

એક અન્ય પોસ્ટમાં, ટ્રમ્પે કહ્યું કે ગ્રીનલેન્ડ અંગે તેમની નાટો મહાસચિવ માર્ક રુટ સાથે ફોન પર "ખૂબ જ સારી વાતચીત" થઈ છે. તેમણે લખ્યું કે ગ્રીનલેન્ડ રાષ્ટ્રીય અને વૈશ્વિક સુરક્ષા માટે મહત્વપૂર્ણ છે અને આ મુદ્દા પર કોઈ પણ પીછેહઠ કરી શકે નહીં.

અમેરિકાને સૌથી શક્તિશાળી દેશ ગણાવ્યો

અમેરિકી રાષ્ટ્રપતિ ડૉનાલ્ડ ટ્રમ્પે કહ્યું કે અમેરિકા વિશ્વનો સૌથી શક્તિશાળી દેશ છે. તેમણે દાવો કર્યો હતો કે તેમના પ્રથમ કાર્યકાળ દરમિયાન સૈન્યને મજબૂત બનાવવામાં આવ્યું હતું અને આ પ્રક્રિયા હવે ઝડપી બની છે. તેમના મતે, વિશ્વમાં શાંતિ ફક્ત તાકાત દ્વારા જ જાળવી શકાય છે.

ગ્રીનલેન્ડમાં અમેરિકન ધ્વજની તસવીર

વધુ એક પોસ્ટમાં ટ્રમ્પે એક તસવીર શેર કરી, જેમાં તેઓ ઉપરાષ્ટ્રપતિ જે.ડી. વેન્સ અને વિદેશ મંત્રી માર્કો રુબિયોની સાથે ગ્રીનલેન્ડમાં અમેરિકન ઝંડો લગાવતા જોવા મળે છે. નજીકમાં એક બોર્ડ પર લખ્યું છે, "ગ્રીનલેન્ડ, અમેરિકી ક્ષેત્ર, 2026."