અમેરિકા અને ઈરાન વચ્ચે ચાલી રહેલા ભયંકર યુદ્ધ વચ્ચે અમેરિકન રાષ્ટ્રપતિ ડોનાલ્ડ ટ્રમ્પે એક બહુ જ મોટો અને ચોંકાવનારો દાવો કર્યો છે. ટ્રમ્પનું કહેવું છે કે ઈરાનના "નવા રાષ્ટ્રપતિ" એ તેમનો સંપર્ક કરીને યુદ્ધવિરામ (સીઝફાયર) માટે અપીલ કરી છે. જોકે, ટ્રમ્પે આ અપીલ સ્વીકારવા માટે પોતાની કડક શરતો મૂકી દીધી છે અને સ્પષ્ટ કર્યું છે કે જ્યાં સુધી 'હોર્મુઝ સ્ટ્રેટ' (Strait of Hormuz) સંપૂર્ણપણે ખુલ્લો અને સુરક્ષિત નહીં થાય, ત્યાં સુધી અમેરિકા યુદ્ધ રોકવા પર કોઈ વિચાર નહીં કરે. બીજી તરફ, ઈરાને ટ્રમ્પના આ દાવાને પાયાવિહોણો ગણાવીને ફગાવી દીધો છે. આ સાથે જ ટ્રમ્પે નાટો (NATO) અને ઈરાનના પરમાણુ કાર્યક્રમ અંગે પણ મોટા નિવેદનો આપ્યા છે.
ટ્રમ્પે સોશિયલ મીડિયા પર શું કહ્યું?
પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર પોસ્ટ કરતા ટ્રમ્પે લખ્યું છે કે, "ઈરાનના નવા શાસનના રાષ્ટ્રપતિ અગાઉના શાસકો કરતા ઘણા ઓછા કટ્ટરપંથી અને વધુ બુદ્ધિશાળી છે. તેમણે હમણાં જ અમેરિકાને યુદ્ધવિરામ માટે અપીલ કરી છે." ટ્રમ્પે પોતાની શરતો સ્પષ્ટ કરતા ચીમકી આપી છે કે તેઓ આ અપીલ પર ત્યારે જ વિચાર કરશે જ્યારે હોર્મુઝ સ્ટ્રેટ સંપૂર્ણપણે ખુલ્લો, મુક્ત અને સુરક્ષિત થઈ જશે. તેમણે ત્યાં સુધી એમ પણ કહી દીધું કે, "જો આવું નહીં થાય, તો અમે ઈરાનનો ખાતમો કરવાનું ચાલુ રાખીશું, અથવા તો તેમના જ શબ્દોમાં કહીએ તો તેમને 'પથ્થર યુગ'માં ધકેલી દઈશું."
ઈરાને ટ્રમ્પના દાવાની કાઢી હવા
ટ્રમ્પે આ દાવો કર્યો કે તરત જ ઈરાને તેનો સણસણતો જવાબ આપ્યો છે. અલ જઝીરાના રિપોર્ટ મુજબ, ઈરાનની રિવોલ્યુશનરી ગાર્ડ કોર્પ્સ (IRGC) એ ટ્રમ્પના દાવાને નકારતા કહ્યું કે, અમેરિકન રાષ્ટ્રપતિના આવા વાહિયાત નિવેદનોથી હોર્મુઝ સ્ટ્રેટ ખૂલવાનો નથી. IRGC એ સ્પષ્ટ કર્યું છે કે, "હોર્મુઝ સ્ટ્રેટની સ્થિતિ અત્યારે સંપૂર્ણપણે અમારા નિયંત્રણમાં છે અને અમેરિકન રાષ્ટ્રપતિના વાહિયાત પ્રદર્શનોથી અમે દેશના દુશ્મનો માટે તેને ખોલવાના નથી."
ટ્રમ્પના દાવા અને 'નવા રાષ્ટ્રપતિ'નું સસ્પેન્સ
આ અગાઉ પણ ટ્રમ્પે એવો દાવો કર્યો હતો કે તેઓ 2 થી 3 અઠવાડિયામાં ઈરાન સામેનું આ યુદ્ધ ખતમ કરી દેશે. હવે તેઓ કહી રહ્યા છે કે ઈરાનના નવા રાષ્ટ્રપતિએ યુદ્ધવિરામની માંગ કરી છે. જોકે, અહીં એક મોટું સસ્પેન્સ એ છે કે ટ્રમ્પ 'નવા રાષ્ટ્રપતિ' તરીકે કોનો ઉલ્લેખ કરી રહ્યા છે તે તેમણે સ્પષ્ટ કર્યું નથી. તેમણે તો ત્યાં સુધી દાવો કરી દીધો છે કે, "અમે ઈરાનમાં શાસન પરિવર્તન (Regime Change) તો ક્યારનુંય પ્રાપ્ત કરી લીધું છે."
પરમાણુ બોમ્બ અને NATO અંગે મોટા નિવેદનો
રોઇટર્સ સાથેની વાતચીતમાં ટ્રમ્પે જણાવ્યું કે તેઓ આગામી થોડા દિવસોમાં ઈરાનમાંથી ખસી જશે. ઈરાન દ્વારા કરવામાં આવતા યુરેનિયમ સંવર્ધન (પરમાણુ કાર્યક્રમ) અંગે તેમણે બિન્દાસ અંદાજમાં કહ્યું કે, "અમને તેની બહુ ચિંતા નથી કારણ કે અમે સેટેલાઇટ દ્વારા તેમના પર સીધી નજર રાખી શકીએ છીએ." આ ઉપરાંત, ટ્રમ્પે યુરોપને લઈને એક બહુ જ મોટો ધડાકો કરતા કહ્યું કે, અમેરિકા હવે નાટો (NATO) માંથી બહાર નીકળી જવાનો ગંભીરતાથી વિચાર કરી રહ્યું છે. તેમણે એવો પણ વિશ્વાસ વ્યક્ત કર્યો કે ઈરાન પાસે હવે પરમાણુ બોમ્બ નહીં હોય અને તેમનો એવો કોઈ ઈરાદો પણ નથી.