Iran US Military Attacks: ઈરાન તરફથી કહેવામાં આવ્યું છે કે દુશ્મનને એ ખબર હોવી જોઈએ કે સીઝફાયરનું ઉલ્લંઘન એ ઈસ્લામાબાદ સમજૂતી જ્ઞાપનની પહેલી કલમનું ઉલ્લંઘન છે અને તેનાથી તમામ પ્રક્રિયાઓ સંપૂર્ણપણે સ્થગિત થઈ જશે.
ઈરાન અને અમેરિકા વચ્ચે સીઝફાયર તૂટવાના આરે પહોંચી ગયું છે. અમેરિકી સેનાએ છેલ્લા 24 કલાકમાં બે વાર ઈરાનના સૈન્ય મથકો પર હુમલા કર્યા છે, જેની પ્રતિક્રિયામાં ઈસ્લામિક રિવોલ્યુશનરી ગાર્ડ કોર્પ્સ (IRGC) એ બહેરીનથી લઈને કુવૈત સુધી મિસાઈલો અને ડ્રોન વડે અમેરિકી મથકો પર હુમલા કર્યા છે. તેણે ચેતવણી પણ આપી છે કે અમેરિકાની કોઈપણ સૈન્ય કાર્યવાહીનો જડબાતોડ જવાબ આપવામાં આવશે.
ઈરાનની નેવીએ નિવેદન જાહેર કરીને જણાવ્યું કે, 'તેની નૌકાસેના અને એરફોર્સે રવિવારે સ્થાનિક સમય અનુસાર સવારે 2 વાગ્યાથી 3 વાગ્યાની વચ્ચે જોઈન્ટ ઓપરેશન ચલાવ્યું હતું, જેમાં કુવૈતના અલી અલ સલેમ એરબેઝ અને બહેરીનના પોર્ટ સલમાન સ્થિત અમેરિકી 5મા કાફલાના હેડક્વાર્ટર સહિત 8 અમેરિકી સૈન્ય મથકો પર બેલિસ્ટિક મિસાઈલો અને ડ્રોન દાગવામાં આવ્યા હતા.' ઈરાને કહ્યું કે આ મિલિટરી ઓપરેશન તાજેતરમાં થયેલા અમેરિકી હુમલાના જવાબમાં ચલાવવામાં આવ્યું હતું.
દુશ્મનની આદત છે વચનો તોડવાની- IRGC
IRGC એ કહ્યું કે, 'આક્રમણખોર દુશ્મન, જેની આદત જ વચનો તોડવાની અને કરારોનું ઉલ્લંઘન કરવાની છે, તેણે આજે સવારે ઈસ્લામિક રિપબ્લિકની 5 દરિયાકાંઠાની ચોકીઓ પર હુમલો કર્યો. આ હુમલો IRGC નેવી દ્વારા નિયમોનું ઉલ્લંઘન કરનારા એક જહાજ સામે કરવામાં આવેલી કાર્યવાહીના બહાને કરવામાં આવ્યો હતો.'
હોર્મુઝથી પસાર થતા જહાજો માટે નિયમો કડક- IRGC
ઈરાન તરફથી એવું પણ કહેવામાં આવ્યું છે કે તે હોર્મુઝની સામુદ્રધુની (Strait of Hormuz) માંથી પસાર થતા જહાજો માટેના નિયમોને વધુ કડક બનાવશે. તેણે કહ્યું કે, 'હવેથી, નિયમોનું ઉલ્લંઘન કરનારા જહાજો સામે પહેલા કરતા વધુ કડક હાથે કામ લેવામાં આવશે. ભવિષ્યમાં કોઈપણ પ્રકારની શત્રુતાપૂર્ણ આક્રમકતા, પછી ભલે તેનું બહાનું ગમે તે હોય, તેને જડબાતોડ જવાબ આપવામાં આવશે- ભલે, ગઈકાલે રાત્રે અને આજ રાત્રના હુમલાઓમાં થયું તેમ, તે ઓછા મહત્વના મથકોને ટાર્ગેટ બનાવે.'
ઈરાને ઈસ્લામાબાદ સમજૂતીનો આપ્યો હવાલો
IRGC એ ઈસ્લામાબાદ સમજૂતીનો હવાલો આપતા અમેરિકા પર સીઝફાયર તોડવાનો આરોપ લગાવ્યો. તેણે કહ્યું કે, 'દુશ્મનને એ ખબર હોવી જોઈએ કે સીઝફાયરનું ઉલ્લંઘન એ ઈસ્લામાબાદ સમજૂતી જ્ઞાપનની પહેલી કલમનું ઉલ્લંઘન છે અને તેનાથી તમામ પ્રક્રિયાઓ સંપૂર્ણપણે સ્થગિત થઈ જશે.'
ટ્રમ્પે ઈરાનને આપી હતી ધમકી
રાષ્ટ્રપતિ ડોનાલ્ડ ટ્રમ્પે અમેરિકી સૈન્ય કાર્યવાહી બાદ ઈરાનને ધમકી આપી હતી. તેમણે કહ્યું કે અમેરિકી વિમાનોએ યુદ્ધવિરામ કરારનું વારંવાર ઉલ્લંઘન કરવા બદલ ઈરાનના મિસાઈલ, ડ્રોન ભંડાર અને રડાર મથકો પર હુમલો કર્યો છે. ટ્રમ્પે કહ્યું કે જો ઈરાન પોતાની હરકતો બંધ નહીં કરે તો અમેરિકા આગળ વધુ મોટી સૈન્ય કાર્યવાહી કરશે. તેમણે ચેતવણી આપી કે જો એવું થયું તો ઈસ્લામિક રિપબ્લિક ઓફ ઈરાનનું અસ્તિત્વ જ સમાપ્ત થઈ શકે છે.