Iran Israel War: મધ્ય પૂર્વમાં યુદ્ધ ફરી એકવાર શરૂ થઈ ગયું છે. ઈરાને રવિવારે મોડી રાત્રે ઈઝરાયલ પર હુમલા શરૂ કર્યા, જેના જવાબમાં ઈઝરાયલે સોમવારે વહેલી સવારે અનેક ઈરાની લશ્કરી ઠેકાણાઓને નિશાન બનાવીને મોટો હવાઈ હુમલો કર્યો હતો. ઈરાની સમાચાર એજન્સી IRNA અનુસાર, દેશના અનેક સ્થળોને નિશાન બનાવવામાં આવ્યા હતા. ઈઝરાયલે રાજધાની તેહરાન, ઈસ્ફહાન, તબ્રીઝ અને પશ્ચિમ ઈરાનના કેટલાક ભાગો પર મિસાઈલ હુમલો કર્યો હતો. લેબનોનની રાજધાની બેરુતમાં પણ વિસ્ફોટો સંભળાયા હતા.
નોંધનીય છે કે ટ્રમ્પે અગાઉ ઈઝરાયલના વડાપ્રધાન બેન્જામિન નેતન્યાહૂને ઉત્તરી ઈઝરાયલ પર ઈરાની હુમલાનો બદલો ન લેવા કહ્યું હતું. એવા અહેવાલો હતા કે નેતન્યાહૂ ટ્રમ્પની વિનંતી પર સંમત થયા હતા. તેમ છતાં ઈઝરાયલે અનેક ઈરાની લક્ષ્યોને નિશાન બનાવ્યા હતા.
ઈરાને હુમલાની પુષ્ટી કરી
ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ સોમવારે સવારે એક નિવેદન જાહેર કરીને પુષ્ટી કરી કે " દુશ્મન" (ઈઝરાયલ) એ ઈરાની પ્રદેશની અંદર હુમલો કર્યો હતો. IRGC અનુસાર, હુમલામાં હવાઈ બેલિસ્ટિક મિસાઈલોનો ઉપયોગ કરવામાં આવ્યો હતો. ઈસ્ફહાનમાં ઓછામાં ઓછા ત્રણ મોટા વિસ્ફોટો સાંભળવામાં આવ્યા હતા. તેહરાન, તબ્રીઝ અને કરજમાંથી પણ વધુ ભારે વિસ્ફોટો સંભળાયા. જોકે, ઇઝરાયલનો દાવો છે કે ઇઝરાયલી વિમાન ઇરાની હવાઈ ક્ષેત્રમાં પ્રવેશ્યું નથી. બોમ્બમારા ઇરાકી હવાઈ ક્ષેત્રમાં અને ભૂમધ્ય સમુદ્રમાં તૈનાત યુદ્ધ જહાજો દ્વારા કરવામાં આવ્યા હતા.
ઇઝરાયલ હાઇ એલર્ટ પર, અંડરગ્રાઉન્ડ હશે હોસ્પિટલો
ઇરાન પરના હુમલા બાદ ઇઝરાયલે કોઈપણ સંભવિત બદલો લેવા માટે તૈયારી કરવા માટે રાષ્ટ્રીય ચેતવણી જાહેર કરી છે. ઇઝરાયલના હોમ ફ્રન્ટ કમાન્ડે સુરક્ષા કારણોસર બધી શાળાઓ બંધ રાખવાનો આદેશ આપ્યો છે. વધુમાં બધી હોસ્પિટલોને ભૂગર્ભમાં કાર્યરત રહેવાની સૂચના આપવામાં આવી છે. રવિવારે ઇરાન દ્વારા છોડવામાં આવેલી મિસાઇલો બાદ ઇઝરાયલે તેના સુરક્ષા પગલાં વધુ કડક કર્યા છે. દેશની અંદર પરિવહન હાલમાં 75 ટકા ક્ષમતા પર કાર્યરત છે. જો કે, ઇઝરાયલ એરપોર્ટ ઓથોરિટીએ સ્પષ્ટતા કરી છે કે એરપોર્ટ કામગીરીમાં કોઈ ફેરફાર કરવામાં આવ્યો નથી.