US-Iran War: તેહરાને ઈરાન અને અમેરિકા વચ્ચે મધ્યસ્થી તરીકે પાકિસ્તાનની વિશ્વસનીયતા પર સવાલ ઉઠાવ્યા છે. ઈરાની સાંસદ ઈબ્રાહિમ રેઝાઈએ પ્રાદેશિક વાટાઘાટોમાં મધ્યસ્થી તરીકે પાકિસ્તાનની ભૂમિકા અંગે શંકા વ્યક્ત કરતા કહ્યું કે પાકિસ્તાન એક સારો પાડોશી હોઈ શકે છે, પરંતુ અમેરિકા સાથેના તેના સંબંધોને જોતાં મધ્યસ્થી તરીકે તેની નિષ્પક્ષતા શંકાસ્પદ છે. ઈરાની સાંસદનું આ નિવેદન એવા સમયે આવ્યું છે જ્યારે ઈસ્લામાબાદ પ્રથમ રાઉન્ડ રદ થયા પછી અમેરિકા-ઈરાન વાટાઘાટોના બીજા રાઉન્ડને સરળ બનાવવાનો પ્રયાસ કરી રહ્યું છે.
રેઝાઈએ શું કહ્યું?
રવિવારે (26 એપ્રિલ) સોશિયલ મીડિયા પ્લેટફોર્મ X પર એક પોસ્ટમાં રેઝાઈએ અમેરિકા સાથે પાકિસ્તાનના દાયકાઓ જૂના સંબંધોનો ઉલ્લેખ કરીને મધ્યસ્થી તરીકે પાકિસ્તાનની ભૂમિકા પર સવાલ ઉઠાવ્યા હતા. તેમણે લખ્યું હતું કે, "પાકિસ્તાન એક સારો મિત્ર અને પાડોશી છે પરંતુ તે વાતચીત માટે સારો મધ્યસ્થી નથી. પાકિસ્તાનમાં મધ્યસ્થી માટે જરૂરી વિશ્વાસનો અભાવ છે."
આ આરોપ પાકિસ્તાન પર લગાવવામાં આવ્યો હતો
રેઝાઈએ વધુમાં આરોપ લગાવ્યો હતો કે ઈસ્લામાબાદ ખુલ્લેઆમ વોશિંગ્ટનની ટીકા કરવાનું ટાળે છે અને એવા કિસ્સાઓને પ્રકાશિત કરવામાં નિષ્ફળ જાય છે જ્યાં અમેરિકાએ તેના વચનો પૂરા કર્યા નથી. તેમણે કહ્યું હતું કે, "મધ્યસ્થી નિષ્પક્ષ હોવો જોઈએ અને હંમેશા એક પક્ષ તરફ પક્ષપાતી ન હોવો જોઈએ." તેમણે ઉમેર્યું કે લેબનોનમાં યુદ્ધવિરામ અંગે અમેરિકા પાછળ હટી ગયું. પાકિસ્તાન પણ આ અંગે પ્રશ્ન ઉઠાવવાને બદલે મૌન છે. તેઓ એ પણ જાહેર કરવામાં નિષ્ફળ રહ્યા છે કે અમેરિકાએ જપ્ત કરવામાં આવેલી સંપત્તિઓ અંગે ચોક્કસ વચનો આપ્યા હતા પરંતુ આ વચનો પૂરા થયા નથી.
અગાઉ ઈરાને અમેરિકા સાથેની વાટાઘાટોમાં ભાગ લેવાનો ઇનકાર કર્યો હતો, જેના કારણે ગયા અઠવાડિયે બંને પક્ષો વચ્ચે બીજા રાઉન્ડની વાટાઘાટો નિષ્ફળ ગઈ હતી. દરમિયાન, ઈરાનના વિદેશ પ્રધાન સૈયદ અબ્બાસ અરાઘચી પાકિસ્તાનના પ્રવાસે પહોંચ્યા હતા. તેમના ગયા પછી યુદ્ધ સમાપ્ત કરવા માટે કરાર પર પહોંચવાના પ્રયાસો અટકી ગયા હોય તેવું લાગે છે. અગાઉ ઈરાન અને અમેરિકા વચ્ચે યુદ્ધવિરામ અંગેની વાટાઘાટો પહેલીવાર પાકિસ્તાનમાં યોજાઈ હતી, પરંતુ તે નિષ્ફળ રહી હતી.
પાકિસ્તાને આ વાટાઘાટો દ્વારા પોતાને વિશ્વસનીય મધ્યસ્થી તરીકે સ્થાપિત કરવાનો પ્રયાસ કર્યો હશે પરંતુ શાહબાઝ સરકારે ફાઇવ સ્ટાર સેરેના હોટેલનું બિલ પણ ચૂકવવામાં નિષ્ફળ રહી, જેને વાટાઘાટોનું આયોજન કરવા માટે પસંદ કરવામાં આવી હતી. હોટેલના માલિક આગા ખાન ડેવલપમેન્ટ નેટવર્કને દખલ કરવી પડી અને સમગ્ર ખર્ચ ઉઠાવવો પડ્યો. પાકિસ્તાન ગંભીર આર્થિક સંકટનો સામનો કરી રહ્યું છે. પાકિસ્તાનની આર્થિક ગરીબી અને તેના રાજદ્વારી દાવાઓની પોકળતા સ્પષ્ટપણે છતી થાય છે.