પાકિસ્તાનમાં ભયંકર તેલ સંકટ: 4 દિવસ કામ, મંત્રીઓનો પગાર બંધ, ઈફ્તાર પર રોક

મધ્ય પૂર્વના યુદ્ધને કારણે પાકિસ્તાનમાં ભયંકર તેલ સંકટ સર્જાયું છે. વડાપ્રધાન શાહબાઝ શરીફે 4 દિવસ કામ, મંત્રીઓનો પગાર બંધ અને ઈફ્તારની દાવત પર કડક પ્રતિબંધ મૂક્યો.

Pakistan oil crisis

Source : ai

Show Quick Read

Key points generated by AI, verified by newsroom

• સરકારી કચેરીઓ અઠવાડિયામાં 4 દિવસ ખુલ્લી રહેશે, 50% કર્મચારીઓ ઘરેથી કામ કરશે.
• મંત્રીઓ, સલાહકારોનો 2 મહિનાનો પગાર બંધ, સંસદસભ્યોના પગારમાં 25% કાપ.
• સરકારી વાહનોનો ઉપયોગ 60% ઘટાડ્યો, બિનજરૂરી વિદેશ પ્રવાસો પર પ્રતિબંધ.
• ઈફ્તાર પાર્ટીઓ અને સત્તાવાર ભોજન સમારંભો પર રોક, ખર્ચ ઘટાડવાના પ્રયાસો.

મધ્ય પૂર્વમાં અમેરિકા, ઈઝરાયલ અને ઈરાન વચ્ચે ચાલી રહેલા ભયંકર યુદ્ધના કારણે આખી દુનિયામાં તેલનું મોટું સંકટ ઊભું થયું છે. આ પરિસ્થિતિને જોતા પાકિસ્તાનના વડાપ્રધાન શાહબાઝ શરીફે પોતાના દેશને આર્થિક બરબાદીથી બચાવવા માટે તાજેતરમાં જ કેટલાક બહુ કડક અને આકરા નિર્ણયો લીધા છે. પાકિસ્તાનમાં હવે સરકારી કચેરીઓ અઠવાડિયામાં માત્ર 4 દિવસ જ ખુલશે અને મંત્રીઓના પગાર પણ આગામી 2 મહિના માટે સાવ બંધ કરી દેવામાં આવ્યા છે. દેશમાં ઈંધણ અને સરકારી તિજોરી બચાવવા માટે આવા આકરા પગલાં લેવામાં આવ્યા છે.

કર્મચારીઓ ઘરેથી કામ કરશે, શાળાઓ બંધ 

આપણા પાડોશી દેશ પાકિસ્તાનમાં અત્યારે ભયંકર આર્થિક મુશ્કેલી ચાલી રહી છે. સરકારની નવી જાહેરાત મુજબ, પાકિસ્તાનમાં હવે તમામ સરકારી કચેરીઓ અઠવાડિયામાં માત્ર 4 દિવસ માટે જ ખુલ્લી રહેશે. બાકીના સમયમાં 50 ટકા જેટલા કર્મચારીઓ પોતાના ઘરેથી જ કામ કરશે, જેથી વાહનવ્યવહાર ઓછો થાય અને ઈંધણની મોટી બચત થઈ શકે. જોકે, આ કડક નિયમ નાણાકીય સંસ્થાઓને લાગુ પડશે નહીં. આ ઉપરાંત, નાના બાળકો અને વિદ્યાર્થીઓની શાળાઓ પણ 2 અઠવાડિયા માટે સંપૂર્ણપણે બંધ કરી દેવામાં આવી છે.

નેતાઓ અને મંત્રીઓના પગાર પર કાતર 

આ સંકટ એટલું મોટું છે કે સરકારી ખજાનો બચાવવા માટે નેતાઓના ખિસ્સા પર પણ સીધી કાતર ફેરવવામાં આવી છે. વડાપ્રધાને જાહેરાત કરી છે કે સરકારના તમામ મંત્રીઓ, ખાસ મદદનીશો અને સલાહકારો આવતા 2 મહિના સુધી એક પણ રૂપિયાનો પગાર લેશે નહીં. આ સાથે જ સંસદસભ્યોના પગારમાંથી પણ 25 ટકા રકમ સીધી કાપી લેવામાં આવશે. નેતાઓ અને મંત્રીઓના બિનજરૂરી વિદેશ પ્રવાસ પર પણ કડક પ્રતિબંધ લગાવી દેવામાં આવ્યો છે.

સરકારી વાહનો અને ઉજવણીઓ પર મોટો પ્રતિબંધ 

વડાપ્રધાને પોતાના ભાષણમાં ચોખ્ખું કહ્યું કે, દુનિયાભરમાં કાચા તેલનો ભાવ 60 થી અચાનક ઉછળીને સીધો 100 ની પાર પહોંચી ગયો છે. પાકિસ્તાન પોતાના દેશનું મોટાભાગનું તેલ અને કુદરતી વાયુ અખાતી દેશો પાસેથી જ ખરીદે છે. હવે જ્યારે ત્યાં જ યુદ્ધ ચાલી રહ્યું છે, ત્યારે પાકિસ્તાન માટે સ્થિતિ બહુ નાજુક બની ગઈ છે. ઈંધણ બચાવવા માટે સરકારે એવો આદેશ આપ્યો છે કે તમામ સરકારી વિભાગોમાં વપરાતા 60 ટકા જેટલા વાહનો આવતા 2 મહિના સુધી રસ્તા પર ઉતારવામાં આવશે નહીં. સરકારી વાહનો પાછળ વપરાતા ઈંધણમાં પણ 50 ટકાનો મોટો કાપ મૂકવામાં આવ્યો છે.

રમજાન અને અન્ય તહેવારોને ધ્યાનમાં રાખીને થતા મોટા ખર્ચાઓ અટકાવવા માટે પણ સરકારે લાલ આંખ કરી છે. પાકિસ્તાનમાં હવે કોઈપણ મંત્રી કે સરકારી અધિકારી દ્વારા યોજાતી ઈફ્તારની દાવત અને સત્તાવાર રાત્રિભોજન પર સંપૂર્ણ રોક લગાવી દેવામાં આવી છે. સરકારનો કોઈ પણ કાર્યક્રમ કે પરિસંવાદ હવે ખાનગી જગ્યાએ નહિ થાય, પણ માત્ર સરકારી જગ્યાઓ પર જ કરવામાં આવશે જેથી ખોટા ખર્ચાઓથી બચી શકાય.

પાકિસ્તાનની આર્થિક હાલત પહેલાથી જ ખરાબ હતી અને હવે આંતરરાષ્ટ્રીય યુદ્ધે તેમને પડ્યા પર પાટું મારવાનું કામ કર્યું છે. પાકિસ્તાન અત્યારે આંતરિક સુરક્ષાની સમસ્યાઓનો પણ સામનો કરી રહ્યું છે. પાકિસ્તાન અત્યારે ખરા અર્થમાં બહુ મોટી અને કપરી મુશ્કેલીમાં ફસાઈ ગયું છે.

આ પણ વાંચો

મધ્ય પૂર્વમાં વિસ્ફોટક સ્થિતિ: ઇઝરાયલ-અમેરિકા બાદ આ દેશે ઇરાન પર કર્યો સીધો હુમલો