Iran-US Ceasefire: મિડલ ઈસ્ટમાં ચાલી રહેલા યુદ્ધ વચ્ચે અમેરિકા અને ઈરાન વચ્ચે આખરે યુદ્ધવિરામ પર સંમતિ સધાઈ ગઈ છે. ડોનાલ્ડ ટ્રમ્પે બે અઠવાડિયાના યુદ્ધવિરામની જાહેરાત કરી છે. પાકિસ્તાનના વડા પ્રધાન શાહબાઝ શરીફે પણ યુદ્ધવિરામ પર એક નિવેદન બહાર પાડ્યું છે. શાહબાઝે કહ્યું કે યુદ્ધવિરામની શરતો પર ચર્ચા કરવા માટે અમેરિકા અને ઈરાન વચ્ચે 10 એપ્રિલે ઇસ્લામાબાદમાં એક બેઠક યોજાશે.
શાહબાઝ શરીફે 'એક્સ' પર પોસ્ટ કરી લખ્યું હતું કે , "મને એ જાહેરાત કરતા ખૂબ આનંદ થાય છે કે ઈરાન અને અમેરિકા તેમના સાથી દેશો સાથે લેબનોન અને અન્ય તમામ ક્ષેત્રોમાં તાત્કાલિક અસરથી યુદ્ધવિરામ માટે સંમત થયા છે. હું આ દૂરંદેશી પગલાનું હૃદયપૂર્વક સ્વાગત કરું છું અને બંને દેશોના નેતૃત્વ પ્રત્યે ઊંડો આભાર વ્યક્ત કરું છું."
તેમણે કહ્યું હતું કે, "હું તેમના પ્રતિનિધિમંડળોને શુક્રવાર, 10 એપ્રિલ, 2026 ના રોજ ઇસ્લામાબાદમાં તમામ વિવાદોને ઉકેલવા માટે નિર્ણાયક કરાર પર વધુ વાટાઘાટો માટે આમંત્રણ આપું છું." પાકિસ્તાની વડાપ્રધાને વધુમાં કહ્યું હતું કે, "બંને પક્ષોએ સમજણ બતાવી છે, જે શાંતિ અને સ્થિરતા લાવવાની અપેક્ષા છે. અમે નિષ્ઠાપૂર્વક આશા રાખીએ છીએ કે 'ઇસ્લામાબાદ સંવાદ' કાયમી શાંતિ પ્રાપ્ત કરવામાં સફળ થશે અને આગામી દિવસોમાં વધુ સારા સમાચાર શેર કરવા માટે આતુર છીએ.
ટ્રમ્પે યુદ્ધવિરામની જાહેરાત કરી
ટ્રમ્પે મંગળવારે સાંજે (અમેરિકન સમય મુજબ) તેમના સોશિયલ મીડિયા પ્લેટફોર્મ ટ્રુથ પર યુદ્ધવિરામની જાહેરાત કરી હતી. અમેરિકન રાષ્ટ્રપતિએ પોસ્ટમાં કહ્યું હતું કે, "પાકિસ્તાનના વડા પ્રધાન શાહબાઝ શરીફ અને ફિલ્ડ માર્શલ અસીમ મુનીરે મને વિનંતી કરી કે આજે રાત્રે ઈરાન પર મોકલવામાં આવી રહેલા વિનાશક હુમલાને રોકો, પરંતુ ઈરાને હોર્મુઝ સ્ટ્રેટને સંપૂર્ણપણે, તાત્કાલિક અને સુરક્ષિત રીતે ખોલવો જોઈએ." ટ્રમ્પે કહ્યું, "હું બે અઠવાડિયા માટે ઈરાન પર બોમ્બમારા અને હુમલાઓ સ્થગિત કરવા સંમત થયો છું." તેમણે વધુમાં જણાવ્યું કે આ બે તરફી યુદ્ધવિરામ હશે. તેહરાનમાં ઈરાનની સુપ્રીમ નેશનલ સિક્યુરિટી કાઉન્સિલે કહ્યું કે તેણે બે અઠવાડિયાના યુદ્ધવિરામનો સ્વીકાર કર્યો છે અને શુક્રવારે ઇસ્લામાબાદમાં અમેરિકા સાથે વાતચીત શરૂ કરશે.