એપ્સ્ટીન કેસમાં મોટો ધડાકો: બ્રિટનના કિંગ ચાર્લ્સના ભાઈ પ્રિન્સ એન્ડ્ર્યુની ધરપકડ

બ્રિટિશ રાજવી પરિવારમાં મોટો ભૂકંપ. જેફરી એપ્સ્ટીન ફાઇલ્સ કેસમાં કિંગ ચાર્લ્સ ત્રીજાના નાના ભાઈ પ્રિન્સ એન્ડ્ર્યુની સેન્ડ્રિંગહામ એસ્ટેટ ખાતેથી પોલીસ દ્વારા ધરપકડ કરાઈ.

Prince Andrew arrested

Source : X

Show Quick Read

Key points generated by AI, verified by newsroom

Prince Andrew arrested: બ્રિટિશ રાજવી પરિવાર માટે એક અત્યંત શરમજનક અને આંચકાજનક સમાચાર સામે આવ્યા છે. ગુરુવારે પૂર્વી ઇંગ્લેન્ડમાં આવેલા સેન્ડ્રિંગહામ એસ્ટેટના વુડ ફાર્મ ખાતેથી બ્રિટિશ સ્પેશિયલ પોલીસે વર્તમાન રાજા ચાર્લ્સ ત્રીજાના નાના ભાઈ અને પૂર્વ પ્રિન્સ એન્ડ્ર્યુની સત્તાવાર રીતે ધરપકડ કરી લીધી છે. અમેરિકાના કુખ્યાત યૌન અપરાધી જેફરી એપ્સ્ટીન સાથે જોડાયેલા બહુચર્ચિત 'એપ્સ્ટીન ફાઈલ્સ' કેસમાં સરકારી ગુપ્ત દસ્તાવેજો પૂરા પાડવાના ગંભીર આરોપસર આ આંતરરાષ્ટ્રીય સ્તરની અત્યાર સુધીની સૌથી મોટી કાર્યવાહી કરવામાં આવી છે. આ હાઈ-પ્રોફાઈલ ધરપકડે સમગ્ર દુનિયામાં ખળભળાટ મચાવી દીધો છે.

8 અધિકારીઓ સાદા કપડામાં પહોંચ્યા

બીબીસીના (BBC) તાજેતરના અહેવાલ મુજબ, ગુરુવારના રોજ બ્રિટિશ સ્પેશિયલ પોલીસના 8 જેટલા ચુનંદા અધિકારીઓ બિલકુલ સાદા કપડામાં પૂર્વી ઇંગ્લેન્ડના સેન્ડ્રિંગહામ એસ્ટેટ પહોંચ્યા હતા. કોઈપણ પ્રકારની અફરાતફરી ટાળવા માટે અત્યંત ગુપ્તતા જાળવીને વુડ ફાર્મ ખાતેથી એન્ડ્ર્યુની અટકાયત કરવામાં આવી હતી.

ધરપકડ પાછળનું અસલી કારણ શું છે?

પૂર્વ પ્રિન્સ એન્ડ્ર્યુ પર સૌથી મોટો અને સંગીન આરોપ એ છે કે તેમણે દોષિત યૌન અપરાધી જેફરી એપ્સ્ટીનને બ્રિટિશ સરકારના અત્યંત સંવેદનશીલ અને ગુપ્ત દસ્તાવેજો પહોંચાડ્યા હતા. હાલમાં પોલીસ અને ગુપ્તચર એજન્સીઓ આ સમગ્ર કૌભાંડની ઊંડાણપૂર્વક તપાસ કરી રહી છે. પૂછપરછ દરમિયાન એ જાણવાનો સઘન પ્રયાસ કરવામાં આવી રહ્યો છે કે એન્ડ્ર્યુ દ્વારા એપ્સ્ટીનને બરાબર કયા પ્રકારના દસ્તાવેજો લીક કરવામાં આવ્યા હતા અને તેનાથી રાષ્ટ્રીય સુરક્ષાને કેટલું નુકસાન થયું છે.

ઈમેલ વિવાદ: દીકરીઓના ફોટા એપ્સ્ટીનને મોકલ્યા

યુએસ જસ્ટિસ ડિપાર્ટમેન્ટ દ્વારા ગત 30 જાન્યુઆરીના રોજ જાહેર કરવામાં આવેલા દસ્તાવેજો અને ઈમેઈલ્સે બળતામાં ઘી હોમવાનું કામ કર્યું છે. આ રિપોર્ટમાં એવો મોટો ઘટસ્ફોટ થયો છે કે વર્ષ 2010 અને 2011 ના સમયગાળામાં એન્ડ્ર્યુએ પોતાની સગી દીકરીઓની અંગત તસવીરો યૌન અપરાધી એપ્સ્ટીનને ઈમેલ દ્વારા મોકલી હતી. આ તસવીરો એવા સમયે મોકલવામાં આવી હતી જ્યારે એન્ડ્ર્યુ જાહેરમાં એવો દાવો કરી રહ્યા હતા કે તેમણે એપ્સ્ટીન સાથેના તમામ સંબંધો તોડી નાખ્યા છે.

નવા જાહેર થયેલા દસ્તાવેજો દર્શાવે છે કે 21 ડિસેમ્બર 2011 ના રોજ 'HRH ધ ડ્યુક ઓફ યોર્ક' ના સત્તાવાર ઈમેલ આઈડી પરથી એક ક્રિસમસ કાર્ડ મોકલવામાં આવ્યું હતું, જેમાં બંને બહેનોની બરફમાં રમતી તસવીર હતી અને નીચે એન્ડ્ર્યુની સહી હતી. ત્યારબાદ 20 ડિસેમ્બર 2012 ના રોજ બીજું એક કાર્ડ મોકલાયું જેમાં 4 તસવીરો હતી. આ તસવીરોમાં ફેબ્રુઆરી 2012 માં પ્રિન્સેસ બીટ્રિસને મોન્ટ બ્લેન્ક પર્વત પર ચઢતા અને જૂન 2012 માં પ્રિન્સેસ યુજેનીને એક ચેરિટી સાયકલ ઈવેન્ટમાં ભાગ લેતા દર્શાવવામાં આવી હતી. બ્રિટિશ અખબાર 'ધ સન' ના અહેવાલ મુજબ તે સમયે યુજેની માત્ર 21 વર્ષની અને બીટ્રિસ 23 વર્ષની હતી.

ગંભીર યૌન શોષણના આરોપો અને પરિવારમાં તિરાડ

આ વિવાદો માત્ર દસ્તાવેજો લીક કરવા સુધી સીમિત નથી. બીબીસીના એક અન્ય સનસનીખેજ રિપોર્ટમાં એક મહિલાના વકીલે દાવો કર્યો છે કે, જેફરી એપ્સ્ટીને તે પીડિત મહિલાને બળજબરીપૂર્વક પ્રિન્સ એન્ડ્ર્યુના નિવાસસ્થાન 'રોયલ લોજ' ખાતે મોકલી હતી, જેથી એન્ડ્ર્યુ તેની સાથે શારીરિક સંબંધ બાંધી શકે.

આવા ગંભીર અને શરમજનક આરોપો સતત સામે આવતા રાજવી પરિવારમાં મોટો તિરાડ પડી છે. અહેવાલો મુજબ, આ જ મહિનાની શરૂઆતમાં પ્રિન્સેસ યુજેનીએ પોતાના પિતા એન્ડ્ર્યુના આવા કૃત્યોથી નારાજ થઈને તેમની સાથેના તમામ અંગત સંપર્કો કાયમ માટે તોડી નાખ્યા છે.

આ પણ વાંચો

અમેરિકા ઈરાન યુદ્ધ નિશ્ચિત? ટ્રમ્પે 150 કાર્ગો અને 50 ફાઈટર જેટ્સ મધ્ય પૂર્વમાં મોકલ્યા