‘કાં તો ડીલ સ્વીકારો, નહીંતર પાવર પ્લાન્ટ અને પુલ....’, પાકિસ્તાનમાં વાતચીત પહેલા જ ટ્રમ્પની ઈરાનને ખુલ્લી ધમકી

પાકિસ્તાનના ઈસ્લામાબાદમાં યોજાનારી વાટાઘાટો પહેલા ટ્રમ્પે સ્પષ્ટ કહ્યું છે કે જો ઈરાન ડીલ નહીં સ્વીકારે તો તેના પાવર પ્લાન્ટ્સ અને પુલ ઉડાવી દેવામાં આવશે.

trump warns iran accept deal or face destruction islamabad talks 2026

Source : https://truthsocial.com/@realDonaldTrump

Show Quick Read

Key points generated by AI, verified by newsroom

• ટ્રમ્પની ઈરાનને કડક ચેતવણી: ડીલ સ્વીકારો અથવા સંપૂર્ણ વિનાશ માટે તૈયાર રહો.
• ઈરાન દ્વારા યુદ્ધવિરામ ભંગ બદલ ટ્રમ્પે ગંભીર આરોપો લગાવ્યા.
• પાકિસ્તાનમાં વાટાઘાટો માટે 'વાજબી ડીલ' ઓફર, પરંતુ આક્રમક વલણ જાળવ્યું.
• અમેરિકા-ઈરાન સંઘર્ષ વચ્ચે સોમવારે ઈસ્લામાબાદમાં મહત્વની મિટિંગ યોજાશે.

Trump Iran ultimatum: અમેરિકા અને ઈરાન વચ્ચેનો ટકરાવ હવે એક અત્યંત નાજુક અને ખતરનાક વળાંક પર આવી ગયો છે. પશ્ચિમ એશિયામાં ચાલી રહેલા યુદ્ધ અને રાજદ્વારી ગૂંચવણ વચ્ચે, અમેરિકાના રાષ્ટ્રપતિ ડોનાલ્ડ ટ્રમ્પે પોતાની પરિચિત આક્રમક શૈલીમાં ઈરાનને એક આખરી અને સીધી ચેતવણી આપી દીધી છે. ટ્રમ્પે ઈરાનને સ્પષ્ટ શબ્દોમાં કહી દીધું છે કે "કાં તો ડીલ સ્વીકારી લો, નહીંતર સંપૂર્ણ વિનાશ માટે તૈયાર રહો." એક તરફ તેઓ ઈરાનનો નકશો બદલી નાખવાની એટલે કે પાવર પ્લાન્ટ્સ અને પુલ ઉડાવી દેવાની ધમકી આપી રહ્યા છે, તો બીજી તરફ પાકિસ્તાનના ઈસ્લામાબાદમાં 20 એપ્રિલના રોજ યોજાનારી વાટાઘાટો માટે 'વાજબી ડીલ'ની ઓફર પણ આપી રહ્યા છે. આખા સમાચારનો સાર એ છે કે અમેરિકા હવે આર યા પારની લડાઈના મૂડમાં છે.

ખરેખર તો, ટ્રમ્પના આટલા ગુસ્સા પાછળનું મુખ્ય કારણ ઈરાન દ્વારા કરવામાં આવેલું યુદ્ધવિરામ (સીઝફાયર) નું ઉલ્લંઘન છે. ટ્રમ્પે પોતાના સોશિયલ મીડિયા પ્લેટફોર્મ "ટ્રુથ સોશિયલ" પર ભડાસ કાઢતા ઈરાન પર ગંભીર આરોપો લગાવ્યા છે. તેમણે લખ્યું છે કે, "ઈરાને ગઈકાલે હોર્મુઝ સ્ટ્રેટમાં ફાયરિંગ કરીને આપણા યુદ્ધવિરામ કરારનું સરેઆમ ઉલ્લંઘન કર્યું છે. આમાંથી ઘણી ગોળીઓ ફ્રાન્સ અને બ્રિટનના માલવાહક જહાજો પર ચલાવવામાં આવી હતી, જે બિલકુલ યોગ્ય નથી."

આ ધમકીઓ વચ્ચે પણ ટ્રમ્પે વાતચીતના દરવાજા ખુલ્લા રાખ્યા છે. તેમણે જણાવ્યું કે તેમના પ્રતિનિધિઓ સોમવારે (20 એપ્રિલ) સાંજે વાટાઘાટોના બીજા રાઉન્ડ માટે પાકિસ્તાનની રાજધાની ઈસ્લામાબાદ પહોંચી રહ્યા છે. ત્યાં તેઓ એક એવી ડીલ ફાઇનલ કરવાનો પ્રયાસ કરશે જેને ટ્રમ્પ એકદમ "વાજબી અને યોગ્ય" ગણાવી રહ્યા છે. આ સાથે જ હોર્મુઝ સ્ટ્રેટ બંધ કરવાની ઈરાનની ધમકી પર કટાક્ષ કરતા ટ્રમ્પે કહ્યું કે, ઈરાન આ રસ્તો બંધ કરવાની વાત કરે છે, પણ અમારી નાકાબંધીના કારણે તે પહેલેથી જ બંધ છે. તેઓ અજાણતા જ અમારી મદદ કરી રહ્યા છે. આ રસ્તો બંધ થવાથી ઈરાનને દરરોજ 500 મિલિયન ડોલરનું જંગી નુકસાન થઈ રહ્યું છે, જ્યારે અમેરિકાને કોઈ જ ફેર પડતો નથી. ઉલટાનું, હવે ઘણા જહાજો ઇંધણ ભરાવવા માટે અમેરિકાના ટેક્સાસ, લુઇસિયાના અને અલાસ્કા તરફ આવી રહ્યા છે.

ટ્રમ્પે પોતાની વાત પૂરી કરતા ઈરાનને 'નો મોર મિસ્ટર નાઇસ ગાય' (હવે કોઈ ભલમનસાઈ નહીં) વાળો કડક સંદેશો આપ્યો છે. તેમણે ચેતવણી આપી કે, "જો ઈરાન આ ડીલ નહીં સ્વીકારે, તો અમેરિકા ઈરાનના દરેક પાવર પ્લાન્ટ અને દરેક પુલને ઉડાવી દેશે. હવે કોઈ શિષ્ટાચાર નહીં રખાય." ટ્રમ્પે તો ત્યાં સુધી કહી દીધું કે છેલ્લા 47 વર્ષમાં જે કામ અમેરિકાના અન્ય રાષ્ટ્રપતિઓ નથી કરી શક્યા, તે તેઓ સન્માનભેર કરીને બતાવશે અને ઈરાનના 'કિલિંગ મશીન'નો હંમેશા માટે અંત લાવશે.

નોંધનીય છે કે, 28 ફેબ્રુઆરીએ અમેરિકા અને ઈઝરાયેલ દ્વારા તેહરાન પર થયેલા હવાઈ હુમલા બાદ આ બંને દેશો વચ્ચે સીધો સંઘર્ષ શરૂ થયો હતો. પાકિસ્તાનની મધ્યસ્થીથી બે અઠવાડિયાનો યુદ્ધવિરામ થયો હતો, પરંતુ ગયા અઠવાડિયે ઈસ્લામાબાદમાં થયેલા પહેલા રાઉન્ડની વાતચીતનું કોઈ પરિણામ આવ્યું ન હતું. અત્યારે અમેરિકાએ નાકાબંધી ચાલુ રાખી છે, જ્યારે શનિવારે ઈરાને અમેરિકા પર "વિશ્વાસઘાત" નો આરોપ લગાવીને ફરીથી અમુક પ્રતિબંધો લગાવ્યા છે, ત્યારે હવે સૌની નજર સોમવારે ઈસ્લામાબાદમાં યોજાનારી બીજા રાઉન્ડની આ મહત્વપૂર્ણ મિટિંગ પર ટકેલી છે.

આ પણ વાંચો

અમેરિકાની 'ચિઠ્ઠી' લઈને પાકિસ્તાની જનરલ પહોંચ્યા ઈરાન! શું યુદ્ધના નગારા વાગતા અટકશે?