મોસ્કો પર યુક્રેનનો ભયંકર ડ્રોન હુમલો: 1 ભારતીયનું મોત અને 3 ઘાયલ, એમ્બેસી દોડતી થઈ

ukraine drone attack moscow: રશિયાની રાજધાનીમાં યુક્રેને અત્યાર સુધીનો સૌથી મોટો હુમલો કર્યો, કુલ 3 લોકોના મોત અને 12 ઘાયલ; ભારતીય દૂતાવાસે પીડિતોને તમામ મદદની ખાતરી આપી.

ukraine drone attack moscow indian employee killed russia war 2026

Source : X

Show Quick Read

Key points generated by AI, verified by newsroom

• મોસ્કો પર યુક્રેનનો મોટો ડ્રોન હુમલો, એક ભારતીયનું મોત.
• ત્રણ ઘાયલ ભારતીયોને દૂતાવાસે મદદની ખાતરી આપી.
• રશિયાએ 120 થી વધુ યુક્રેનિયન ડ્રોન નષ્ટ કર્યા.
• હુમલામાં રહેણાંક મકાનોને નુકસાન, ઓઇલ રિફાઇનરી સુરક્ષિત.

ukraine drone attack moscow: રવિવારે (17 મે, 2026) મધરાતે રશિયાની રાજધાની મોસ્કો પર યુક્રેને અત્યાર સુધીનો સૌથી મોટો ડ્રોન હુમલો કર્યો છે. આ ભયાનક હુમલામાં રશિયામાં કામ કરતા 1 ભારતીય કર્મચારીનું કમકમાટીભર્યું મોત નીપજ્યું છે, જ્યારે અન્ય 3 ભારતીયો ગંભીર રીતે ઘાયલ થયા છે. રશિયા સ્થિત ભારતીય દૂતાવાસે આ ઘટનાની પુષ્ટિ કરતા ઊંડો શોક વ્યક્ત કર્યો છે અને ઘાયલોને તમામ જરૂરી મદદ પૂરી પાડવાની ખાતરી આપી છે. યુક્રેનના આ મોટા હુમલામાં એકંદરે 3 લોકોએ જીવ ગુમાવ્યા છે અને 12 લોકો ઈજાગ્રસ્ત થયા છે. રશિયન સેનાએ પણ વળતો જવાબ આપતા આખા દેશમાં 556 જેટલા ડ્રોન તોડી પાડ્યા હોવાનો દાવો કર્યો છે.

ભારતીય દૂતાવાસે 'X' પર આપી દુઃખદ માહિતી

રશિયામાં આવેલા ભારતીય દૂતાવાસે રવિવારે સોશિયલ મીડિયા પ્લેટફોર્મ 'X' પર આ ઘટના અંગે પોસ્ટ શેર કરી હતી. દૂતાવાસે લખ્યું હતું કે, "મોસ્કો વિસ્તારમાં થયેલા ડ્રોન હુમલામાં 1 ભારતીય કર્મચારીનું મોત થયું છે અને 3 અન્ય ઘાયલ થયા છે." આ ઘટનાની જાણ થતાં જ દૂતાવાસના અધિકારીઓ તાત્કાલિક ઘટનાસ્થળે પહોંચી ગયા હતા અને હોસ્પિટલ જઈને ઘાયલ ભારતીયોની મુલાકાત લીધી હતી. દૂતાવાસે મૃતક પ્રત્યે સંવેદના વ્યક્ત કરતા કહ્યું કે તેઓ અસરગ્રસ્ત કર્મચારીઓને મદદ પહોંચાડવા માટે કંપનીના મેનેજમેન્ટ અને સ્થાનિક રશિયન અધિકારીઓ સાથે સતત કામ કરી રહ્યા છે.

યુક્રેનનો સૌથી મોટો હુમલો, મોસ્કોમાં 120 થી વધુ ડ્રોન નષ્ટ

રશિયન અધિકારીઓના જણાવ્યા મુજબ, યુક્રેનના ડ્રોન હુમલામાં ઓછામાં ઓછા 3 લોકોના મોત થયા છે અને 12 લોકો ઘાયલ થયા છે. રશિયાની સરકારી ન્યૂઝ એજન્સી TASS એ મોસ્કોના મેયર સેરગેઈ સોબ્યાનિનને ટાંકીને જણાવ્યું હતું કે, રશિયન એર ડિફેન્સ સિસ્ટમે મધરાતે મોસ્કો તરફ આવી રહેલા 81 ડ્રોનને હવામાં જ તોડી પાડ્યા હતા. છેલ્લા 24 કલાકમાં મોસ્કોમાં જ કુલ 120 થી વધુ ડ્રોન નષ્ટ કરવામાં આવ્યા છે. મેયરે આ હુમલાને છેલ્લા એક વર્ષમાં યુક્રેન દ્વારા કરવામાં આવેલો સૌથી મોટો ડ્રોન હુમલો ગણાવ્યો હતો.

આ પણ વાંચોઃ મુશ્કેલ સમયમાં આ દેશે ભારતને મદદની આપી ખાતરી, કહ્યું - કોઈ પણ સંજોગોમાં ઇંધણ અને ઊર્જાની અછત નહીં થવા...

ઓઇલ રિફાઇનરી સુરક્ષિત, પણ રહેણાંક મકાનોને નુકસાન

મોસ્કોના મેયરે વધુમાં જણાવ્યું હતું કે, આટલા મોટા હુમલા છતાં મોસ્કોની ઓઇલ રિફાઇનરીને કોઈ જ નુકસાન પહોંચ્યું નથી. જોકે, આસપાસના 3 રહેણાંક મકાનોને જરૂર નુકસાન થયું છે. બીજી તરફ, રશિયાના સંરક્ષણ મંત્રાલયે મોટી માહિતી આપતા કહ્યું છે કે છેલ્લા 24 કલાકમાં મોસ્કો સહિત આખા રશિયામાં યુક્રેનના કુલ 556 ડ્રોનને તોડી પાડવામાં આવ્યા છે.

આ પણ વાંચોઃ ‘અમેરિકા ચોંકી જશે તેવો કરીશું હુમલો!’ ઈરાનની પરમાણુ હુમલાની ધમકીથી ખળભળાટ, વિશ્વભરમાં ચિંતા