શું ફ્રૂટ જ્યુસ પીવાથી બ્લડ સુગર વધે છે? જાણો આ અંગે હેલ્થ એક્સપર્ટ્સ શું સલાહ આપે છે

વિટામિન્સથી ભરપૂર હોવા છતાં જ્યુસમાં ફાઇબર ન હોવાથી તે શરીરમાં સુગર લેવલ ઝડપથી વધારે છે, જેનાથી ટાઇપ 2 ડાયાબિટીસનો ખતરો ઊભો થઈ શકે છે.

ઘણા લોકો પોતાના દિવસની શરૂઆત એક ગ્લાસ ફ્રેશ ફ્રૂટ જ્યુસથી કરતા હોય છે. ફળોનો રસ વિટામિન C અને એન્ટીઑકિસડન્ટ્સથી ભરપૂર હોવાથી તે સ્વાસ્થ્ય માટે ખૂબ જ ફાયદાકારક માનવામાં આવે છે. પરંતુ, શું તમે જાણો છો કે આ હેલ્ધી દેખાતો જ્યુસ તમારા બ્લડ સુગરને ચૂપચાપ વધારી રહ્યો છે? તાજેતરના અભ્યાસો અને હેલ્થ એક્સપર્ટ્સનું માનવું છે કે જ્યુસ કાઢવાની પ્રક્રિયામાં ફળોમાંથી જરૂરી ફાઇબર નીકળી જાય છે અને માત્ર નેચરલ સુગર બચે છે, જેના લીધે શરીરમાં ગ્લુકોઝ લેવલ અચાનક વધી જાય છે.

જ્યારે ફળોમાંથી રસ કાઢવામાં આવે છે, ત્યારે તેમાંથી રેસાવાળો ભાગ એટલે કે પલ્પ (ફાઇબર) સંપૂર્ણપણે નીકળી જાય છે. આ ફાઇબર જ શરીરમાં સુગરને ધીમે ધીમે પચાવવાનું અને લોહીમાં ભળતા અટકાવવાનું મુખ્ય કામ કરે છે. ફાઇબર વગરનો જ્યુસ સીધો જ પાચનતંત્રમાં જાય છે અને લોહીમાં શર્કરાનું પ્રમાણ ઝડપથી વધારે છે. આ પ્રક્રિયા સ્વાદુપિંડ (Pancreas) પર દબાણ લાવે છે કારણ કે તેણે આ વધારાની સુગરને હેન્ડલ કરવા માટે વધુ ઇન્સ્યુલિન છોડવું પડે છે.

આખું ફળ ખાવા અને જ્યુસ પીવા વચ્ચે મોટો તફાવત છે. આખું ફળ ખાવાથી ગ્લુકોઝ લોહીમાં ધીમે ધીમે ભળે છે, જેનાથી શરીરમાં એનર્જી જળવાઈ રહે છે અને સુગર લેવલ અચાનક વધતું નથી. બીજી તરફ, ફાઇબર વગરનો જ્યુસ પીવાથી શરીરમાં ફ્રુક્ટોઝ અને ગ્લુકોઝનો સીધો અને ઝડપી પ્રવાહ જાય છે. જો તમે ડાયાબિટીસના દર્દી હોવ અથવા પ્રી-ડાયાબિટીક હોવ, તો આ સુગર સ્પાઇક તમારા સ્વાસ્થ્ય માટે અત્યંત જોખમી સાબિત થઈ શકે છે.