Rath Yatra: 'જય રણછોડ, માખણચોર' ના નાદથી ગુંજ્યું મંદિર, અમદાવાદની 149મી રથયાત્રા પહેલા નેત્રોત્સવ વિધિની ભવ્ય ઉજવણી

રસોડા વિભાગ દ્વારા સાધુ-સંતો અને શ્રદ્ધાળુઓ માટે ભોજન પ્રસાદની વિશેષ સ્વાદિષ્ટ અને પરંપરાગત તૈયારીઓ કરવામાં આવી છે

તસવીરઃ એબીપી અસ્મિતા

Ahmedabad Rath Yatra News: અમદાવાદમાં આગામી ગુરુવારે યોજાનારી ઐતિહાસિક અને ભવ્ય 149મી રથયાત્રા પૂર્વે આજે અષાઢ સુદ એકમના પાવન અવસરે પ્રસિદ્ધ જગન્નાથ મંદિરમાં ધાર્મિક વિધિ-વિધાન સાથે ભગવાનના નેત્રોત્સવ પૂજનનું ભવ્ય આયોજન કરવામાં આવ્યું હતું.

નેત્રોત્સવ વિધિની સાથે જ મંદિરમાં ભજન, ભક્તિ અને ભોજનનો અદભૂત ત્રિવેણી સંગમ જોવા મળ્યો હતો. રથયાત્રાના આ મંગલ ઉત્સવ નિમિત્તે જગન્નાથ મંદિર પરિસરમાં એક વિશાળ મહાભંડારાનું આયોજન કરવામાં આવ્યું છે.

આ ધાર્મિક ભંડારામાં દેશભરમાંથી પધારેલા 1 હજારથી વધુ સાધુ-સંતો ખાસ ઉપસ્થિત રહીને આશીર્વચન પાઠવશે અને મહાપ્રસાદ ગ્રહણ કરશે.

આ ઉપરાંત, સમગ્ર ગુજરાત અને અન્ય રાજ્યોમાંથી આવતા 15 હજારથી વધુ સામાન્ય ભક્તો માટે પણ મહાપ્રસાદની ભવ્ય વ્યવસ્થા કરવામાં આવી છે.

રસોડા વિભાગ દ્વારા સાધુ-સંતો અને શ્રદ્ધાળુઓ માટે ભોજન પ્રસાદની વિશેષ સ્વાદિષ્ટ અને પરંપરાગત તૈયારીઓ કરવામાં આવી છે,

જેમાં ખાસ કરીને 500 લીટર દૂધમાંથી તૈયાર કરાયેલો દૂધપાક, 1200 કિલો બટાકાનું મસાલેદાર શાક, ગરમાગરમ પુરી અને પરંપરાગત માલપુઆનો સમાવેશ થાય છે.

સમગ્ર મંદિર પરિસર હાલ 'જય રણછોડ, માખણ ચોર' ના નારાઓ અને ભક્તિમય ધૂનથી ગુંજી ઉઠ્યું છે. ભક્તો ભારે હર્ષોલ્લાસ અને શ્રદ્ધા સાથે ભગવાનના નયનરમ્ય દર્શન કરી ધન્યતા અનુભવી રહ્યા છે.