દુબઈમાં સોનું સસ્તું થયું! શિપમેન્ટ અટકતા વેપારીઓ આપી રહ્યા છે મોટું ડિસ્કાઉન્ટ

પશ્ચિમ એશિયામાં યુદ્ધના કારણે દુબઈમાં સોનાની નિકાસ અટકી પડી છે, જેના લીધે ત્યાં પ્રતિ ઔંસ 30 ડોલરનું જંગી ડિસ્કાઉન્ટ મળી રહ્યું છે. ભારતીય બજાર પર આની શું અસર થશે તે જાણો.

દુબઈ ગોલ્ડ ડિસ્કાઉન્ટ: સોનાનું શિપમેન્ટ અટકી ગયું, દુબઈમાં અચાનક ભારે ડિસ્કાઉન્ટ પર વેચાઈ રહ્યું છે. વર્ષ 2026 ના માર્ચ મહિનામાં પશ્ચિમ એશિયામાં ફરી એકવાર યુદ્ધના વાદળો ઘેરાયા છે. અમેરિકા અને ઇઝરાયલના હુમલાઓ સામે ઈરાને વળતી કાર્યવાહી શરૂ કરતા દુબઈ અને આસપાસના વિસ્તારોમાં હવાઈ માર્ગો આંશિક રીતે બંધ કરી દેવામાં આવ્યા છે.

આ હવાઈ પ્રતિબંધને લીધે દુબઈથી વિશ્વભરમાં થતી સોનાની નિકાસ સંપૂર્ણપણે ખોરવાઈ ગઈ છે, જેના પરિણામે વિદેશ ન જઈ શકવાના કારણે સ્થાનિક બજારમાં સોનું ઐતિહાસિક રીતે સસ્તા ભાવે એટલે કે ભારે વળતર સાથે વેચાઈ રહ્યું છે.

સામાન્ય માણસને કદાચ પ્રશ્ન થાય કે વિમાનો બંધ થવાથી સોનાના ભાવને શું લેવાદેવા? વાસ્તવમાં આ કિંમતી પીળી ધાતુને દુનિયાના એક ખૂણેથી બીજા ખૂણે પહોંચાડવા માટે સામાન્ય પેસેન્જર વિમાનોના સામાન મુકવાના ભાગનો જ સૌથી વધુ ઉપયોગ થતો હોય છે. પરંતુ યુદ્ધની તંગ પરિસ્થિતિને કારણે અનેક ફ્લાઇટ્સ રદ થતાં સોનાનો જંગી જથ્થો દુબઈના હવાઈમથક પર જ ફસાઈ ગયો છે. આંતરરાષ્ટ્રીય બજારના અહેવાલો મુજબ, માલનો ભરાવો થવાથી દુબઈના વેપારીઓ લંડનના મુખ્ય બજારના ભાવ કરતા પ્રતિ ઔંસ 30 ડોલર સુધીનું તગડું વળતર ગ્રાહકોને ઓફર કરી રહ્યા છે.