Gold price today: ચાંદીનો ભાવ 60,000 ઘટ્યો, સોનું પણ તૂંટ્યું, જાણો 10 ગ્રામ સોનાનો લેટેસ્ટ ભાવ

આસમાને પહોંચેલા ભાવોથી પરેશાન ગ્રાહકોને મોટી રાહત; વૈશ્વિક બજારની મંદીના કારણે સ્થાનિક માર્કેટમાં પણ વેચવાલીનો દોર

સોના અને ચાંદીના આસમાને પહોંચેલા ભાવોથી પરેશાન ગ્રાહકો અને રોકાણકારો માટે રાહતના મોટા સમાચાર આવ્યા છે. વૈશ્વિક બજારમાં સુસ્તી અને રોકાણકારોની સાવચેતીના કારણે છેલ્લા એક મહિનામાં કિંમતી ધાતુઓના ભાવમાં ભારે ઘટાડો નોંધાયો છે.

મલ્ટી કોમોડિટી એક્સચેન્જ (MCX) પર સોનાના ભાવમાં પ્રતિ 10 ગ્રામ લગભગ 10,000 રૂપિયાનો ઘટાડો થયો છે. તેની સામે ચાંદીના ભાવ પ્રતિ કિલોગ્રામ 60,000 રૂપિયાથી વધુ તૂટી ગયા છે, જેનાથી સામાન્ય ખરીદદારોને મોટી રાહત મળી છે.

આજે 9 જૂને, અઠવાડિયાના બીજા ટ્રેડિંગ દિવસે પણ સોના અને ચાંદી બંને બજારો ભારે દબાણ હેઠળ જોવા મળ્યા હતા. જો આપણે ગત મહિનાના સર્વોચ્ચ ભાવો સાથે આજના ભાવોની સરખામણી કરીએ તો બજારમાં બહુ મોટો તફાવત જોવા મળ્યો છે.

સોનાના ભાવની વાત કરીએ તો, 13 મેના રોજ MCX પર સોનાનો ભાવ પ્રતિ 10 ગ્રામ 1.64 લાખ રૂપિયાને વટાવી ગયો હતો. આ કિંમત આજે (9 જૂન) ઘટીને લગભગ 1.54 લાખ રૂપિયાની આસપાસ આવી ગઈ છે.

બીજી તરફ ચાંદીના ભાવમાં પણ મોટો કડાકો બોલાયો છે. 13 મેના રોજ ચાંદીનો ભાવ પ્રતિ કિલોગ્રામ 3.04 લાખ રૂપિયાથી વધુ નોંધાયો હતો, જે આજે ઝડપથી ઘટીને 2.44 લાખ રૂપિયા સુધી પહોંચી ગયો છે.

મલ્ટિ કોમોડિટી એક્સચેન્જ (MCX) પર આજે સવારે સોના-ચાંદીના વેપારની શરૂઆત પણ નબળા નોંધ સાથે થઈ હતી. શરૂઆતના સત્રમાં ચાંદીના વાયદા 2,457 રૂપિયા (લગભગ 1%) ઘટીને 243,932 રૂપિયા પ્રતિ કિલોગ્રામ પર ટ્રેડ થઈ રહ્યા હતા.

આ નબળાઈ વચ્ચે સોનાની ખરીદી કરનારાઓને પણ રાહત મળી હતી. આજે સવારના સત્રમાં સોનાના વાયદાના ભાવ 388 રૂપિયા ઘટીને 153,396 રૂપિયા પ્રતિ 10 ગ્રામ પર આવી ગયા હતા.

સ્થાનિક બજારમાં આવેલા આ મોટા ઘટાડા પાછળ વૈશ્વિક બજારના સેન્ટિમેન્ટ જવાબદાર છે. હાલમાં મધ્ય પૂર્વમાં ચાલી રહેલી રાજકીય પરિસ્થિતિ, વૈશ્વિક મોંઘવારીની ચિંતા અને દુનિયાની કેન્દ્રીય બેંકો વ્યાજદરમાં શું નિર્ણય લેશે તેના પર રોકાણકારો નજર રાખી રહ્યા છે.

આંતરરાષ્ટ્રીય બજારમાં હાજર સોનાનો ભાવ ઔંસ દીઠ 4,332.50 ડોલર પર સ્થિર રહ્યો હતો, જે ગયા સત્રમાં બે મહિનાના સૌથી નીચલા સ્તરે હતો. યુએસ સોનાના વાયદા 0.1% ઘટીને 4,357.10 ડોલર અને હાજર ચાંદી 0.7% ઘટીને 67.71 ડોલર પ્રતિ ઔંસ રહી હતી.